BREVI DÄ LIGÛIA

 
 
 
Archeologia ligûe a Monëgia

In sciö Monte Nicolao de Monëgia , in ta provinsa de Spezza , se attrovava o croxevia dë stradde che zuntavan Ligûia , Emilia e Toscann-a , ciammou "Pietra Colice" . Grassie a-i scavi da Sovrintendensa Archeologica da Ligûia son stæte descoverte de struttûe risalenti a-o XII e XIII secolo .
Ancon anchêu son ben vixibili l'impianto originale de l'edifiçio , a forma de croxe con trei absidi semiçircolari in to braçço orizzontale a-o lato da gexa .
Se pêuan ascì vedde i resti de 'n piccin vano rettangolare che foscia o doveiva ëse atomba pe 'n monaco o pe quarche ätro personaggio c'o l'aveiva visciûo li .
Ätre struttûe descoverte in ti reçenti scavi ëan con molta probabilitæ ambienti pe-o refûggio di viandanti . Anchêu , sta zona archeologica , in mëzo a-o verde de l'Appennin a l'è diventâ 'nna meta de tûristi .
Pe avei ciû informassoin in scë sta zona poei ciammâ a :
Cooperativa TerraMare
Tel. 0185/41023
o in alternativa poei fâ riferimento ä :
Pro Loco Moneglia
Tel. 0185/490576
www.apttigullio.liguria.it
A SANN-A SCHÊUA IN RIVA A-O MÂ
Svilûppâ o processo de insegnamento e de cosciensa dë ricchesse do nostro territöio . Cangiâ a mænn-a in te ûn contesto formativo de apprendimento . Questo l'è o senso de l'inissiativa "Edûcassion ambientale in riva a-o mâ" che a Provinsa de Sann-a con l'agiûtto do Comûne de Lengueggia han promosso  . Ûn tentativo de rende parteçipi i studenti de l'importansa de l'ambiente marin . A proposta a l'è articolâ pe module e esperiense : dä biologia marinn-a finn-a a-i sport dægua eco-compatibili . 
E settemann-a de sto corso son strûtturæ comme gite de istrûssion didattica e saieivan contæ comme effettivi giorni de schêua  garantendo coscì a-i istitûti de restâdrento i 200 giorni do calendäio scolastico . O l'è donca rivolto no söo a-e schêue ligûi ma ascì a quelle do nord Italia , da Lombardia , do Piemonte o da Val D'Aosta dove e lessoin commensan primma . O saieiva coscì ûnna forma pe poei allungâ a stagion tûristica con soggiorni stûddio . 
 
 
 

 
GHE SAIÀ 'N ÄTRO MOMENTO D'ÖU PE ZENA ?
Ûn libbro-analixi do Poulo Lengua ä scoverta di 3 momenti d'öu de Zena e di zeneixi 
Da-i antighi ligûi , popolo indoeuroppeo ciû antigo rispetto a-i latin , a-o G-8 , in atteisa do 2004 anno in to quæ Zena a saià a capitale europpea da cultûa . Sto chi o l'è o viægio istorico , politico , cultûale e soçiale , cö quæ o Poulo Lengua o guidda i lettoî in ta "Breive istöia di zeneixi" , edito da-o Laterza , da quarche settemann-a in te librerie .
Istöia di zeneixi e no de Zena , comme o dixe o Lengua in ta prefassion :Zena a l'è söo ûnna scatöa c'a tegne drento realtæ ben ben despægie . A vicenda ...... a l'è invece a stöia de ûnna aggregassion de gente e soviatûtto de famigge che , in te l'ûrtima parte do XI secolo , aivan dæto vitta a ûn scistema c'o no l'ëa completamente pûbblico . Pûbblico e privou , finn-a da-e so origini se mesc-cian in ta stöia di zeneixi , ommi bicci , che conservatoî in te l'animo , han però sempre sacciûo ammiâ avanti , antiçipando i tempi . A Zena l'è nasciûa a primma banca , a Zena gh'ëa a primma Borsa italiann-a , a Zena l'è nasciûa l'idea de 'nna politica economica e commerçiale ciû elastega , ciû fluida , pronta a cangiâ co-i cangiamenti do mercou . A gestion pûbblico-privou a l'ha caratterizzou tanti periodi storiçi de Zena , dominâ da-e grendi famigge : i Döia , i Fieschi .....
Giornalista , romanzê , e da quarche anno ascì storico , o Poulo Lengua  o piggia i tre momenti d'öu in ta stöia di zeneixi : o XII secolo quande Zena a l'ë stæta 'nna potensa commerçiale e economica , o segondo Çinqueçento dove a çittæ a l'ëa cresciûa no söo economicamente ma ascì artisticamente , e pe finî o segondo êuttoçento , quande grassie a-o Cavour a l'ëa diventâ a çittæ italiann-a ciû forte economicamente .
A stöia ciû reçente a l'è fæta de crisi , ciû o meno gravi , ma ascì de pronti rescatti . I anni '80 mettan Zena e i sò abitanti propio in zenoggio , ma co-e çelebrassoin colombiann-e commensa 'nna inverscion de tendensa .
Zena a se scrêuve çittæ d'arte e de cultûa , mentre o porto o commensa torna a travaggiâ . Doppo o G-8 Zena a se vedde "ciû bella , ciû interessante , ciû organizzâ , ascì comme traffico , disegnâ a livelli internassionali " .
O Lengua o finisce dunca con ûn segno de speransa e ottimismo . 
Foscia che stemmo pe intrâ in te ûn nêuvo periodo d'öu ?
O RITORNO DO GRECHETTO
Gioan Beneito Castiggion  dïto o Grechetto, nasciûo a Zena in to 1609 e visciûo in ta nostra çittæ realizzando di travaggi importanti , finn'oua o l'ëa esposto söo in te l'Accademia Ligûstica . Pe 'n breve perido invece , finn-a  a-o 13 de òttobre ,  sò "intrâ de bestie in te l'arca" a l'è stæta ammirâ ä Galleria Nassionale de Palasso Spinoa . A stansia pe-a quæ l'ëa stæta fæta sta öpea chi a l'ëa da Maddenn-a Döia ä fin do '700 , destinâ a-e occaxoin offiziali .
O teito o l'ëa affrescou da-o Tavaron co-i trionfi da famiggia , mentre in te miage gh'ëan öpëe  de pittoî zeneixi che contavan a parteçipassion da famiggia ä vita cultûale e politica da çittæ .
 
 
 
 
 

 

Quande i gûsti intran in te 'n mûseo
Originale progetto cultûale in te l'impëieize , magara da esportâ pe ätre realtæ da nostra region .
In to comûne de Chiusavecchia , in provinsa de Impëia , i gûsti se pêuan ascì descovrî in te 'n mûseo ò in te 'nna biblioteca . L' è o progetto che , assemme a ätre belle iniziative , o saià fïto realizzou drento o franzòu de Roccaneigra , vixin a Chiusavecchia , in ta Val Impëo . Chi porriemo attrovâ ûn mûseo e 'nna biblioteca mûltimediale in sciä stöia e a cultûa de l'entrotæra , con esposission e assazzi de êuio d'öia estravergine e de tanti ätri prodotti do ponente ligûe . Ma saiàa ascì poscibile attrovâ di laboratöi de artigien e ûn ristorante cö mëgio da tradission da cûxinn-a e do vin impëieize .
O franzòu de Roccaneigra , c'o l'è ciû o meno do 1600 , o l'ëa stæto accattou meixi in derrê dä comûnitæ montana "dell'Olivo" e da-o grûppo assion locale pe ëse misso a posto . 
O costo de sta operassion chi o l'è stæto de dûi mioin e seiçento milla  euro ,con finansiamenti da region e de ätri enti .
 
 
 

Ûnna immagine de Chiusavecchia , o ponte in sciö sciûmme Impëo