Comme za da 'n pò de
tempo aivo scrïto a mæ famiggia a sta öumentando e donca
gh'ò a necescitæ de dedicâghe ascì quello poco
tempo libëo che ancon g'aveivo e che finn'òua dêuviavo
pe passâme 'n pò in sciä ræ .
Eh scì , doppo 3
anni l'è arrivòu o momento , no diggo d'afermâme
, ma d'anâ 'n pittinin ciû cianin . O Faro Ligûe o
no sëra ma o cangià mainea de presentâse ; no ciû
in veste de revista menscî ( ve paià strano ma in te sti 3
anni chi ò riçevûo ascì de e-mail da di lettoî
che m'adomandavan comme poeivan fâ l'abbonamento !!!) , ma comme
scïto 'n pò ciû dinamico , in aggiornamento ... dimmo
coscì .... casuale . Da anchêu çerchiò de aggiornâ
o scîto quande porriò , quande g'aviò 'n pò
de tempo pe tradûe i articoli che me paiàn meitevoi d'ëse
missi in sciä ræ .
Son stæti pe mi 3
anni belli e pin : ancon m'arecordo quelli giorni c'aivo commensòu
a vedde o mæ primmo scïto lì , in sciä ræ
, ä vista de tûtto o mondo . N'arrivavo da 'n esperiensa e soviatûtto
da 'nna speansa secescionista , 'nna spensa de vëa libertæ .
LIGURIA
LIBERA l'aivo ciammòu e g'aivo dæto pe quarche meise 'n
aggiornamento quæxi giornaliero , con tanto de tradûssion in
spagnollo . M'arecordo ben , comme fuise vëi , l'emossion de avei
visto i segni de primme vixite ..... d'avei riçevûo a primma
mail de complimenti ....... e ascì quella do primmo rassista
italian che ghe dava fastidio vedde che i Ligûi poeivan issâ
a testa ....... d'avei scoverto che in Internet se "parlava" zeneize e
che gh'ëa ascì 'n bello gïo de dialettofoni ....... d'avei
scoverto che o mæ scïto o l'ëa stæto inserïo
in scë de connescioin preferïe de ätri scïti sensa
manco aveime domandòu o scangio de favore ........ d'avei riçevûo
agiûtti e conseggi pe amegioâ e pagine web da gente che manco
me conosceivan .......... d'avei riçevûo a primma mail da
'n c'o viveiva fêua da sêu Zena e da 'n ätro che a Zena
o no gh'ëa mai stæto ma c'o saveiva che sêu poæ
o gh'ëa nasciûo ...... I primmi 3-4 meixi ëan stæti
propio belli , ma fadigoxi : arrivavo a câ da-o lòu e sûbito
a çercâ e notissie pe dâ l'aggiornamento giornaliero
a-o scïto . Da sto primmo esperimento l'e dappêu nasciûo
o spûnto pe 'nna revista virtuale : IL FARO LIGURE , revista
d'attualitæ , politica , sport , cultûa ligûe , ma tûtto
scrito in italian . Esattamente 'n anno dòppo m'ëa deciso a
provâ a scrive in ta mæ lengua , ben o mâ no l'importa
, quello che importa l'è che mi comme tanti ätri in te sti
anni chi aggimo descoverto ancon l'amô pe-o dialetto . Pe duì
splendidi anni se semmo tegnûi compagnia : mi co-i articoli e voiätri
co-e vostre vixite . O Faro Ligûe comunque o no sëra
: söo o no g'avià ciû l'aggiornamento menscî co-i
editoriali ( e a no l'è cösa da pòco çercâ
ogni meize ûnze-dozze articoli nêuvi da tradûe e pûbblicâ
) , ma ogni quarvòtta g'aviò 'nna notissia o 'n articolo
a mettiò sensa aspëtâ a fin do meise , quande magara
, comme e ciû vòtte l'è dappêu passòu
, quella notissia a l'ëa za vëgia . No stæ donca a aspëtâ
i nûmmeri nêuvi , che no existian ciû , ma vixitæ
o scïto ciû vòtte in to meise pe vedde se ghe son de
novitæ .....
Ancon òua vêuggio
chi rengrassiâ pûbblicamente i mæ primmi contatti zeneixi
in sciä ræ : o Lûsciandro Guazon , o Conrad Montpetit
e o Bruno Rûbattin e o Franco Bampi ...... foscia m'ascordo de quarchedûn
e allöa c'o me scûse . L'è ascì grassie a sti
"amixi virtûali" c'ò descoverto o piaxei de scrive
in zeneize e spëo propio de chêu che ascì o mæ
scïto in te sti anni chi o segge servïo de spron pe fâ
sci che ätra gente , vixitandolo magara pe cäxo , a se segge
dappêu interessâ 'n pò de ciû ä sêu
lengua moæ . Ciao e sempre ..........Ligûia Libëa
IGÛE