I EDITORIALI 2001-2002
 
 

ARCHIVIO
de
 Ilfaroligure@email.it


...e la drento se ghe mêue
Ûn figgêu zeneise
Quando mêue 'na lengua mêue ûn popolo asci
Zena , o G-8 e i centri sociali
Ûnna çiviltæ uguale ä nostra ?
Ûn Pappa debole pe 'nna cristianitæ debole ?
Zena , 'nna poula c'a fa puïa
Ruggieuroforia o pëgoin ?
I Savoia ? Primma ne fassan e scûse....
"Dovei parlâ italian : o l'è  pe lezze !!!"
Grassie Vito
Libertæ de parolla ò parolle in libertæ ?
A Rai fedealista a no piaxe a-o rosso e a-o neigro ....
"Fedalïximo oua o mai ciû !" de U.Bossi
Fëo de ëse basco         de Jon Idigoras
"Chi di codice rocco ferisce , ..."

 
...E là drento se ghe meue! 
Son un operäio metalmeccànico,  travaggio pe-o Riva, e l'é tòsto çinqu'anni che passo meitæ da mæ giornâ  in minëa. Eh, zà, perché no ô san miga  tutti che o ciclo à cädo d'unna  fàbbrica de l'äsâ o l'é söo che un scæn ciù in sciù che a minëa! Niätri o   mateiale no ô tiemmo feua d'inta tæra, no, ma ô travaggemmo... che stagghe pëzo de niätri gh'è söo che i minatoî.  Fòscia, avanti che finisce l'anno, saviëmo a fin ch'o faià o forno de  Corniggen.  N'é servïo à ninte manco l'accòrdio de programma, che o  Scindacato e a  Scinistra gh'an fæto  tanti descorsci, e che into gïo de  neuve meixi o doveiva fâ serrâ o forno; stæto firmòu quell'accòrdio lì, o  Scindacato e i partïi da Scinistra an criòu vittöia, perché i pòsti de  travaggio ëan sarvi.  A-i vintineuve d'agosto l'é scæito i neuve meixi, ma o  forno o continua e o continuià de longo  à mangiâ carbon, pellets e mineali e à  spuâ quella ghisa ch'a fa vegnî ricco o  patron. Òua o Biasotti, nemigo do Riva  e che o Scindacato o ne ô presenta  comme un nemigo de chi travaggia, o l'é   vegnùo inta fàbbrica à dîne, megio che  un scindacalista, che un accòrdio pezo che quello o no se poeiva fâ. Un  accòrdio ch'o l'asseguava tutti i   avvantaggi a-o Riva e nisciun pòsto de  travaggio a-i operäi, un accòrdio  firmòu ma che òua o no vâ un belìscimo, o l'é söo che do papê che o Riva o se  ghe porreiva ascì nettezzâ o panê, à  despëto do Mori, da Vincenzi, e de  Sansa-Pericu. A sciâ Vincenzi, in cangio, a n'é vegnùa à dî che belli guägni che ghe faià l'ambiente e o travaggio, co-o forno eléttrico. Se, segondo lê, travaggiâ inte'n forno eléttrico, cointâ à bruxâse de brutto, à vegnî sordi e à ciappâse un de quelli  mâ, respiâ da pùa e do fumme, che s'ammùggian inte quella scàtoa ermética  (saià pe quello che l'ambiente o se  n'avvantaggia, a pùa a finisce tutta  inti pormoin di operäi); se, segondo lê, sta chì a l'é qualitæ do travaggio,  ch'a ghe vegne lê, ò quarche sò portaborse, à moî là drento! A qualitæ  do travaggio, cäa sciâ Vincenzi, a comensa, avanti de tutto, con respettâ  a dignitæ de chi travaggia, e inte  fàbbriche do Riva a dignitæ e i drïti di operäi végnan de longo missi sotta i pê. Guäi à chi reclamma i sò drïti, magara pe vie legale - se s'é constreiti - visto che o Riva o se permette finn-a de levâ i premmi  produçion e de resultato d'in sciô   saläio de quelli che s'en incallæ à   méttighe di sappelli, magara solo  perché gh'an a corpa de voei quello che  ghe pertocca. Intanto, là drento se ghe  meue: l'ùrtimo d'unna longa lista o l'é  stæto un zoeno de trent'anni, furminòu  da-a scàrega eléttrica d'unna màcchina  pe assardâ, ma semmo segùi che, in sciâ  fin, ghe daian tutta a corpa à lê, de   n'ëse stæto raxonòu à basta... Dappeu  de neuve meixi da l'accòrdio de  programma, gh'é ben ben de zoeni co-o contræto à tempo, che l'an lasciæ à cà,  a-a faccia da vittöia scindacale, e di  belli ätri î compagnian a-a sciortïa, con dîghe "graçie pe-a conlaboaçion".             Dappeu de neuve meixi, o Riva o n'à   ancon presentòu, pe fâ o forno   eléttrico, un piano industriale ch'o  segge compïo e ch'o vagghe ben. Dappeu  de neuve meixi da quell'accòrdio  vittoioso, i operäi no san ancon a fin  che faian. No ghe veu guæi à capî che o  Riva o gh'à avùo, e o gh'à ancon òua, di arrembi polìtichi de conto, co-a  compiaxensa di scindacati; do resto, dappeu d'aveighe regallòu a sciderurgia  italiann-a (ghe l'an vendùa pe doamïaçinqueçento miliardi e a ne vâ     quarantamïa: ciù do novanta via çento  de rebascio), òua con st'accòrdio chì  gh'an dæto un tòcco de çittæ pe doe  palanche, millequattroçento franchi à  metro quaddro, ch'o ne peu fâ tutto quello che ghe gïa. Ma o Riva, despiaxe  à dîlo, o fa tutto quello ch'o veu ascì  perché o gh'à l'arrembo da trìplixe scindacale. Se fa sciòpero quand'o ô  veu Lê (e son di sciòperi pagæ: a-a dreitùa fan de prescioin in scî cappi  reparto, tanto che fàssan scioperâ  finn-a i contræti de formaçion-travaggio), se va in ciassa à  manifestâ quande ghe cimbra à Lê, magara se tïa finn-a di scarpoin à chi  o veu Lê. Ricatto a l'é a pòula giusta, segùo: beseugna lottâ insemme a-o Riva, perché niätri ne interessa o pòsto de  travaggio, ma in realtæ a-a fin da föa son segùo che ç'accorziëmo ch'emmo lottòu söo che pe-i seu interesci e  arrestiëmo co'unna magnâ de mosche, comme sempre. Intanto, inta fàbbrica se  meue, in còrpo e ànima: quattroçento personn-e so'anæte in penscion e se  manda a-o sbaraggio di zoeni sensa espeiensa e no guæi ammeistræ. Un  figgeu ch'o l'é intròu da pöchi meixi o  m'à confiòu che o primmo giorno in  fàbbrica, à lê e a-i ätri neuvi  assonti, gh'an dïto: Fæ ciù fïto che poei, à imprende, perché i vegi no ghe son ciù e beseugna che fæ viätri quello che fävan lô. Pìggian di neuvi operäi  da-e liste de mobilitæ, perchè se profïtan ch'an beseugno de travaggiâ e  î assùmman à tempo, con di livelli  basci e, donca, paghe à l'öa ciù basse. E dévan mantegnî moggê e figgi co'un  mïon e mëzo a-o meise!  De vòtte, se giamminn-a à vedde e à  vive de personn-a che vitta e che lòu  da cæn che son sti chì. De feua se  descöre, se firma di accòrdi, se fa di  programmi e di piani industriali,  s'asgrëa di sciummi de pòule... e là drento se ghe meue. 
 P.S. 
St'artìcolo chì o l'é stæto scrïto avanti i vintineuve d'agosto: comme çe  figuämo, l'ærtoforno o continua à  marciâ à ciù no dî, ma intanto l'é cangiòu ben ben de cöse. Tanto pe  comensâ, s'é sacciùo che a valutaçion  de impatto ambientale do piano  industriale do Riva a no ghe tocca ciù  a-o Ministëio de l'Ambiente, ma a-a  Region Liguia. E a-i vintineuve d'agosto o ministro "Tex" Willer Bordon, stæto sponciòu ciù che ätro  da-i Verdi e da-o compagno verde Mattioli, o l'à dæto un urtimato a-o Riva. Avanti i sette de settembre o dovià presentâ un piano industriale e a  region a dovià valutâlo. Into comunicòu  no se parla che fin faià i operäi. O  contrattacco do Riva o no s'é fæto aspëtâ: E mi mando tutti à spassio. A-i  trenta d'agosto emmo fæto sciòpero (ammiæ un pittin, pròpio comme ò dïto avanti, anche stavòtta quelli do personale an sponciòu i cappi reparto e i ascistenti à fâ anâ in stradda i  contræti formaçion-travaggio, e into vegnî in derrê da-o sciòpero s'é sacciùo che inte tanti reparti no an  timbròu o cartellin in sciortïa, perché  "fòscia o Riva o ne paga a giornâ").  Savei ste cöse chì, che semmo strumentalizzæ pe-i interesci do patron, a l'é unna cösa ch'a fa mâ a-a  dignitæ e à l'orgheuggio d'ëse operäio: sfrutæ in sciô travaggio e in sciô sciòpero. Scibben che e mæ idee   polìtiche en de ätre, ò lezzùo con  piaxei o primmo de settembre un  volantin da scinistra estremma, che ô  dàvan feua da-o stabilimento, donde dïvan pöcoassæ e mæxime cöse ch'ò scrïto mi de d'äto (A l'é l'ùnica voxe, insemme a-a FAILM, ch'a contraste e  fäscitæ che FIM FIOM UILM vorrieivan dâne da beive unn'ätra vòtta!). Pe fâve accapî, o volantin o contegniva ciù nì  meno st'idea chì: "defende l'açienda no veu dî defende i operäi". E à defende  l'açienda òua gh'é, ciù che mai, a  trìplixe scindacale. O sciòpero di trenta d'agosto - comme tutti i  sciòperi, à dâ mente a-o scindacato - o l'é finïo co'unna vittöia: à sentîli  liätri, tutti i sciòperi finìscian con  de vittöie, ma - chi ô sa comme mai - dòppo un pittin semmo torna in ciassa à  scioperâ. No vorriæ che e nòstre foïsan  e avvoxæ "vittöie de Pirro"!   (2 settembre 2000)
< vanni a-a toua di argomenti >
 
Un figgeu zeneise 
No l'é guæi che nàvego e che gïo inte quello mondo de informaçioin ch'a l'é Internet, ma pe dî a veitæ no m'aspëtava d'attrovâghe di sciti che pàrlan da  lengua lìgure. E sta cösa chì, l'é ciæo, a peu fâme solo che piaxei.. Son segùo che Internet a peu ëse, ansi a dev'ëse un instrumento importante pe no perde arrëo i elementi coltuali, istòrichi e lenguìstichi da nòstra tæra. Ma me despiaxe de dî ch'a no peu ëse a Ræ à tiâ sciù d'inta pùa a nòstra lengua e a nòstra coltùa. Internet a peu ëse un arrembo, un aggiutto, unna scròssoa, ma  a no peu piggiâ o pòsto de quella ch'a dev'ëse a base da formaçion da  personn-a, comme à dî a scheua. Pe nòstra desgraçia a scheua italiann-a a l'à  fæto un di guasti ciù gròsci, quello de fâ scentâ d'inta bocca di figgeu a  lengua do pòsto; no solo che inta Liguia, se capisce, ma inte ätre regioin  ascì. Dæ ben a mente che sto guasto chì, in realtæ, a l'ëa pròpio a raxon  prinçipâ da scheua: creâ unna coltùa italiann-a e spantegâ a lengua italiann-a  inte tutta a penìsoa, con demonizzâ i dialetti e fâ de mainëa che òua i figgeu  conscìdian caroggê ò paisæn tutti quelli che deuvia a lengua do pòsto. A    televixon ascì, inti sceneggiæ, a ne fa vedde comme di imbriægoin ò ignoanti  che parla in dialetto de fronte à un gòtto de vin, e coscì a dà unna man à  mandâ à quaterno quello ch'arresta da coltùa locale. Comme se fa à attrovâ recatto à sta scituaçion? A-o conträio de quelli che veu tegnî o problema lenguìstico e coltuale lontan da-a polìtica, mi me creddo ch'a segge pròpio a polìtica quella ch'a peu in sciâ fin ëse d'aggiutto a-o  zeneise. Se a polìtica italiann-a a l'é arriescïa mai tanto ben à scassâ e  nòstre tradiçioin e a nòstra coltùa, òua co-a polìtica se peu fâle nasce  torna, basta söo che mette e personn-e giuste a-o pòsto giusto e aveighe a    voentæ polìtica de travaggiâ pe sostegnî l'identitæ regionale. A region Véneto  a daià inte scheue, pe l'anno scolàstico 2001, un testo con de noçioin  lenguìstiche, istòriche e coltuale, intanto che l'é neuva de pöco giorni fa  che ascì inte'n Comune in provinsa de Bèrgam daian de badda unna santacroxe in  lengua bergamasca a-i figgeu de scheue elementare, segge pùbbriche che privæ.  O travaggio ch'o l'é appreuvo à fâ  l'assessô regionale lombardo a-a coltùa  locale, professô Albertoni, o l'é lödeive. Bisà donca che ascì inta nòstra region se stagghe in sce sta rotta, se no voemmo vedde tra un pò d'anni scentâ  arrëo o zeneise d'inte nòstre case. In Liguia e instituçioin regionale en inte'n corpeive retardio, appreuvo che a parte polìtica lìgure che ciù che  tutte a s'interessa dell'identitæ locale a l'è meno fòrte de pe coscì,  confronto à de regioin comme a Lombardia e o Veneto donde gh'è de perçentuale ben ben despæge e gh'é ancon tanti zoeni che parla a lengua locale. À sto ponto, inte grænde çittæ lìgure, à parlâ in bon zeneise gh'é söo che i ansiæn e inti paixi piccin quelli che gh'à ciù de çinquant'anni. Solo inte campagne gh'é quarche zoeno ch'o parla o zeneise bello affionòu, magara con  italianizzâlo un pittin. Ma gh'é quarchidun ch'o conosce di figgeu con meno de          dex'anni che ô sàccian parlâ? De sti tempi en de mosche gianche, ma mi gh'ò  avùo a fortunn-a d'incontrâne un. Vorriæ contâve a scena: a pâ tòsto unna föa, ma v'assegùo ch'o l'é un fæto vëo e ch'o m'à misso unn'allegrìa de drento e  unna satisfaçion da no poei imaginâ. A stæ passâ me trovava à'nna festa de  paise e, da-a vexin à mi, ò sentïo unna scignöa ch'a fäva quelli comprimenti  che se fa pe comun à un figgeu, ma a no l'aiva nisciunn-a respòsta. A scignöa  a continuava domandandoghe o nomme, ma lê ninte. Allöa l'é intervegnùo o poæ,   ch'o gh'à dïto: "Scignöa, s'a no ghe parla zeneise o no ghe responde!" E allöa o figgeu, cinque ò sei anni pöcoassæ, o l'à dïto à sò poæ: "Ti t'ê italian e ti parli italian, mi son zeneise e parlo zeneise!" e tutti quelli che gh'ëa  da-a vexin son scciuppæ à rïe. Quarche meise appreuvo l'ò visto pe-a stradda e l'ò sentïo torna ch'o parlava in zeneise con sò moæ e sò seu. Gh'é da dî che  fäva unna strannia imprescion stâ à sentî un figgeu ch'o descorriva in zeneise  mai tanto de quello ben, ma a l'ëa unn'imprescion che a-a spedïa a s'é cangiâ  in allegrìa. Unna grandìscima allegrìa!
< vanni a-a toua di argomenti >
 
Quande meue unna lengua, meue un pòpolo ascì
M'è cäo tornâ in sciô mæ artìcolo de l'ätra vòtta e in sce quello ch'ò dïto do rappòrto tra lengua e scheua, tra lengua e polìtica. Into mæximo tempo, vorriæ dî che n'aiva intension de fâ di paragoin tra a Liguia e o Nordeste, ma solo che segnalâ e despæge mainëe polìtiche de trattâ che gh'à de ätre regioin,  inti confronti da tutela da seu lengua e de seu tradiçioin, finn'òua stæte  trascuæ da de polìtiche goernative che se bàsan in sce'n fòrte çentralìximo,  no söo che polìtico, ma ciù che tutto coltuale. Quande meue unna lengua, meue un pòpolo ascì. No bisà mai ascordâse, e arregordâlo de longo, à tutti, che a scheua, dòppo o "risorgimento", a l'à misso a-o bando i "dialetti" co-a scusa di "fâ i italiæn"; in cangio a l'à desfæto e lengue locale - ò a l'à contribuïo à desfâle - quande pròpio da lô a l'aiva da partî, stante che ëan e sole lengue che i ciù tanti allevi conosceivan. Ma con l'unitæ d'Italia, comme à dî de 'n Stato mai existïo avanti, con unna lengua, unna vitta polìtica e  coltuale da constrùe, beseugnava avanti de tutto desfâ e lengue locale,  appreuvo che quelle ëan o parlâ do pòpolo, e o pòpolo da sempre o l'ëa tegnùo  feua da-a vitta de 'n Stato ch'o no se ô sentiva o sò, e ch'o l'ëa, allöa  comme ancheu, padron. Quello chi sta a-a base de ògni pòpolo, l'è a lengua,  perché l'identitæ d'unna tæra a s'arreixa inta tradiçion locale, ch'a l'à inta lengua parlâ (inti "dialetti") a seu esprescion ciù vertadëa. E sto fæto chì ô  san ben i De Mauro, i Berlinguer e tutti quelli che l'é stæto a-o Ministëio da Pùbbrica Instruçion tutti sti anni chì, à parlâ de scheua e de fedealìximo, ma  con avvardâse ben da reformâ a scheua segondo e exigense coltuale di pòpoli  italiæn. Perché o regime o no veu dâ in derrê a-e gente a lengua locale, ma ansi o fa de tutto pe dâghe contra? Perché mostrâ inte scheue e lengue locale  a saieiva unna neçescitæ? A respòsta à ste doe dimande conträie a l'é unn-a sola: o "dialetto" inte scheue o faieiva accapî a-i studdenti chi semmo, de donde ne vegnimmo e donde voemmo anâ. No se peu fâ de meno de fâ i conti co-o passòu: e a lengua locale, a lengua di poæ, a pòrta à descreuve torna o passòu.  Eive perché o regime o veu fâ moî o dialetto: pe asconde o passòu e e identitæ locale. Me son zà trovòu à dî che a famiggia e a scheua son e ùniche che peuan fâ a guardia a-e tradiçioin e tiâ sciù i figgeu segondo ste mæxime tradiçioin. D'ätra parte a famiggia a l'é de longo stæta a chinn-a do dialetto. In cangio, pe-a scheua no se veu segùo che a lengua locale a segge mostrâ comme unna lengua strangëa, stante ascì a complescitæ da scituaçion da lengua lìgure, pe de ciù drento à di schemi scolàstichi, ma saieiva fondamentale fâ accapî a-i allevi l'importansa da lengua locale pe no finî de pèrdila arrëo. Eive perché   besorrieiva dâ a-e scheue di testi, comme dïva inte l'artìcolo do meise passòu, che pòssan aggiuttâ chi mostra à guiddâ i allevi a-a descoerta de sò reixe e à apprexâ a coltùa locale, che bisà partî de de lì pe avvexinâse a-e ätre coltùe inta mainëa giusta. Unna lengua a l'è de longo l'esprescion de'nna çiviltæ, e no veu dî ninte ch'a segge unna lengua grande ò piccinn-a: tante belle pàgine d'istöia son stæte scrïte da di pòpoli piccin: conta quarcösa, in cangio, che o patrimònio lenguìstico de 'nna tæra, che e gente ghe sta da di  millenni, o no segge refuòu e scassòu, appreuvo che a mòrte de 'nna lengua, grande ò piccinn-a, a ne fa vegnî ciù pövei e a fa anâ in derrê a çiviltæ. Che se fasse de mainëa che a scheua a cacce e base formative e coltuale, che méttan coæ a-i allevi de studdiâ e descreuve i dialetti e confrontâse co-e ätre coltùe. Perché o regime o sa ben che, quande meue unna lengua, veu dî che l'è mòrto un pòpolo ascì.

< vanni a-a toua di argomenti >
Zena , o G-8 e i centri sociali
Semmo à quarche settemann-a da-i previsti giorni cädi do G-8. Zena a l'è passâ ömai in sciâ bocca de tutti pe-e zà finn-a tròppo annonsiæ bæghe e proteste di çentri soçiali e de ätre assoçiaçioin che son contra sta magnâ de potenti, che veuan aveighe o drïto de deçidde a vitta do mondo. Ò zà avùo mòddo de criticâ in sciô Faro Lìgure a mainëa de comme o Scìndico de Zena Pericu o l'à tesciùo i rappòrti no solo co-i gruppi paxìfichi, ò che dìxan d'ësilo, che fan parte do Genoa Social Forum, ma ascì con quella brancâ de disadattæ soçiali, che se mésccian co-i manifestanti tutte e vòtte che gh'é a poscibilitæ de fâ do casin e di danni. Semmo arrivæ pròpio a-o cormo: an fæto finn-a de conferense stampa pe spiegâ pe fï e pe segno comme anâ à l'attacco di poliçiòtti. Ghe veddiëmo, se dòppo tutti i danni ch'avian fæto , î anian à ciappâ, de zà che î conóscian pe nomme e cognomme: me scappa da rïe à pensâ che gh'è di giùdiçi, pe no fâ di nommi o Papalia de Veronn-a, ch'o l'é appreuvo à çercâ tutte e mainëe de mette in galëa e Camixe Verde, assoçiaçion volontäia desarmâ, e nisciun no fa ninte contra da gente ch'a va in gïo a dî e cöse illegale ch'a veu fâ e ch'a faià, de zà che no l'é a primma vòtta che fan de ste sciollaie. 
O l'é un peccòu, perchè sta remenaia chì a fa passâ in segondo cian e raxoin de quelli che protesta. No l'é un caxo che dòppo che o goerno o l'à tiòu feua a propòsta de dialogâ co-i manifestanti, o Genoa Social Forum l'à dïto de scì, e in cangio i ätri di çentri soçiali an torna mandòu tutto a-o mittente. L'è donca chì che se vedde ben ben ciæo cöse l'é che veuan sti desandiæ politiçizzæ: lô se n'infocciäran da lòtta contra a globalizzaçion, quello che ghe premme l'è söo che fâ do casin, rompî di veddri de butteghe, inciastrâ de muäge, piccâ i poliçiòtti, solo pe 'nna raxon polìtica e ninte de ciù. 
A l'è a mæxima "coltùa" do Bertinotti e do Manu Chao, che no à cäxo se son de sprescia tiæ da parte da fâse càrego d'unna poscìbile mediaçion. E allöa quelle che son e giuste raxoin di contestatoî saian inciastræ da quelle leggere co-e tute gianche, finansiæ da di ambienti da Scinistra che veuan söo che creâ da confuxon, e vegnian coscì crovïe da-e sciamme de mòlotov, da-o fumme di lagrimògeni, da de imàgine che faian o gïo do mondo: 'nna brancâ de nesci co-i caschi e i bacchi che çèrcan à piccâ quarche sbïro, comme ô ciàmman loiätri. Sto G8 chì o saià coscì l'ùrtimo, de zà che da-o pròscimo i "grændi" da tæra se veddian pe vidioconferensa. 
E giuste proteste son contra a globalizzaçion e contra e deçixoin stæte piggiæ da pöchi e restreiti paixi, e de belle vòtte influensæ da-e grænde industrie mortinaçionale. Pe piggiâve un spegio de no guæi tempo fa e ch'o ne tocca da vexin, ammiæ a stöia da lezze votâ da-o parlamento éuropeo, da ciccolata ch'a se pêu fâ ascì sensa cacàvao; a l'é stæta emanâ pròpio pe aggiuttâ e grænde industrie. 
Con fâ de coscì, fan do mâ a-o produttô piccin ch'o travaggia in sciâ qualitæ, ma fan do mâ ascì à quelli paixi pövei ch'an into cacàvao unn-a de produçioin che fan intrâ un pittin de scùi into sò paise. 
Ê, scì che de cöse da dî contra a globalizzaçion ghe ne saieiva abbrettio, mæximo perchè finn'òua a globalizzaçion a l'à dæto söo che di problemi: basta ammiâ a BSE, ascì dïta scìndrome da vacca matta. Sta chì a l'é solo, ò a l'è fæta passâ, 'nna conseguensa de l'aviditæ de mortinaçionale che, pe aveighe ciù guägni e meno speise deuvian di métodi de allevamento conträi a-e lezze da natùa. A-i tempi de mæ messiäo, e vacche ê lasciàvan giâ in sciô pròu, ghe dàvan da mangiâ do fen, e fävan accobbiâ co-o töo, e a beusa a se deuviava comme grasciùa. 
A nòstra geneaçion, in cangio, a l'è vegnùa grande graçie a-e vacche serræ inte stalle, che ghe dan da mangiâ da fænn-a fæta co-e carcasce de ätre bestie, che végnan fecondæ da-o mëgo co-a sböra do töo inte 'nna sciringa, che fan ciù de sciuscianta litri de læte a-o giorno e co-i boccin che inte pöco tempo végnan grændi, ma co-a carne che dappeu d'aveila cheutta a se restrenze. Ma sti mæximi metodi d'allevamento se deuvian ascì pe-i pollastri, pe-i pesci, pe-i coniggi. 
Da ste cöse ven feua un sacco de domande: 
1) Perchè s'é arrivòu a tanto ? 
2) Perchè l'ommo o l'è anæto contra a natûa ? 
3) Perchè i verdi, ò ambientalisti comme ghe dìxan, se son piggiæ a breiga de serrâ a caccia, de sterilizzâ i gatti, ma no son mai anæti à vedde inte che condiçioin viveiva e vacche ò e bestie de allevamento? 
4) Perchè a BSE a s'é formâ inte l'Éuròpa e no, pe fâ un exempio, inte l'Östralia? Donca bisà dî che e caxoin de sti danni fæti da-e mortinazionale no son solo da çercase into guägno, ma ascì inte l'acceleraçion de l'evoluçion de l'òmmo. E allöa, segondo o mæ sencio e personale pæi, a respòsta à ste quattro domande a l'é unn-a sola: perchè a-o fenòmeno da globalizzaçion econòmica se gh'é accobbiòu o fenòmeno do mondialìximo e da grande quantitæ de gente che vivan, e de quelli che sta pe anâ à vive, inti stati tecnologicamente avansæ. 
I antiG-8 veuan da-i potenti ciù mëgio condiçioin de vitta pe-i òmmi do terso mondo, veuan che quelle gente pòssan stramuâ inti paixi ciù avansæ sensa tegnî da conto de 'nna cösa fondamentale: se inte 'nna tæra a presensa de l'òmmo a passa quelli che l'é i lìmiti de produçion de alimenti de quella mæxima tæra, l'é ciæo che beseugna anâ contra a-a natùa pe poei dâ da mangiâ à tutti e coscì s'é eubbrigæ à deuviâ e cortivaçioin in særa, i mangiæ transgénichi e fænn-e di animæ pe fâ cresce vacche,pollastri e coniggi ciù fïto che se peu. 
Finn'òua nisciun, nì i G-8 e nì i antiG-8, no l'à fæto presente sto problema chì: a neçescitæ de dâ di inçentivi pe limitâ a presensa di òmmi inte scìngole regioin da tæra. Pe fâ questo, l'è neçessäio investî de græn palanche inti paixi pövei pe poei dâghe, à cà seu, a poscibilitæ de fâse 'nna vitta dignitosa e lìbea, e no portâli clandestin inti paixi oçidentali pe poeine fâ i neuvi scciavi do duemilla a-o servixo de pöchi ricchi, boin solo da sfrutâ i òmmi. 
Bastieiva ammiâ inta Neuva Zelanda ò inte l'Östralia donde a tæra a dà de ciû de quello che a gente a peu deuviâ e donde coscì no gh'é de beseugno de anâ contra a natùa. Pe poei vive sensa mangiæ transgénichi, sensa fænn-e animæ e sensa cortivaçioin e allevamenti intenscivi bisà ammiâ donde, comme e inte quante gente se peu vive inte 'n tòcco de tæra, pe poei coscì vive tutti e ben. Ma son segùo che da sto G-8 no sciortià ninte de bon, comme ninte de bon l'è sciortio tutte e ätre vòtte...
< vanni a-a toua di argomenti >
ÛNNA ÇIVILTÆ  UGUALE Ä NOSTRA ?

S'è fæto tanto bordello  in te settemann-e passæ e impïo pagine de giornali e reviste  de 'n mûggio de ciatelle in sce çiviltæ "superiori"  . Manco a dïlo son sartæ fêua i paladin de l'antiglobalizzassion e da scinistra europea pe dî che no existan çiviltæ sûperiori a-e ätre , ma tûtte stan a-o mæximo cian . Saieiva ûn po comme  'nna forma de comûnismo de çiviltæ mondiali . E comme a-o solito son sciortie comme razzi e solite accûse de rassismo . E zû a chinn-â a testa e a domandâ scûsa . In ta realtæ besêugna dî che de sûperiore a çiviltæ oçidentale in questo momento a no g'ha ciû ninte .
Oua comme oua l'oçidente o l'è comme 'nna scatöa vêua , 'nna facciâ c'a l'asconde ûn gran vêuo de valori c'o fâ puïa . Valori che ûn tempo ean dæti proprio dä cultûa cristiann-a  c'a l'ha caratterizzou a crescita e  l'evolûssion de l' oçidente . Propio quelli valori che n'han permisso de ottegnî tante e tante vittöie storiche pe-a libertæ e a democrassia . Libertæ e democrassia che caratterizzan a cultûa oçidentale e no çertamente  quella islamica arestâ ferma a-o medioevo .
Ma anchêu de cristian in ta nostra çiviltæ  no gh'è manco ciû 'nna freguggia . Vivemmo , ò ne fan vive , in te 'n periodo dove o consûmismo , o materialismo e sta mancanza de valori a fan da padroin . E comme o l'ha dïto giûstamente o Baget Bozzo , o mûssulman o no pêu vedde proprio ste cöse chie : materialismo , consûmismo e nichilismo . Queste 3 cöse chie rappresentan pe l'Islam o grande Diäo da corrussion , nemigo nûmmero 1 di mûssulmen .
Doppo i atti terroristiçi  de töri de New York , media e intellettuali de scinistra son montæ in sci spëgi pe spiegâ che existe ûn Islam bon e ûn cattïo . Che i cattïi  son söo di terroristi e ninte ciû . Pe contra se deve dî che tûtta sta differensa che ne vêuan fâ beie a no l'existe .  Primmo perchè i atti terroristiçi de l'11 settembre fan leva e son inspiræ dä fede religiosa . Perché pe i kamikaze islamiçi  fâ di atti de terrorismo vêu dî diventâ di martiri che saian sempre recordæ con tûtti i onori . Quella di kamikaze a l'è 'nna morte santa , sacra , 'nna cösa approvâ da o Coran . Ûnna votta morti pe o lö Segnô , anian in çë ä drita de Allah con 78 moggê vergini e con sciûmmi de alcool . Ûnna religion c'a spuncia a ammassâ i infedeli e ûn terrorismo c'o sfrûta e poule do Coran pe ammassâ .
Ûnna cultûa c'a i fà sentî vittime faxendo da violenza , che i fà ëse di eroi ammassando de personn-e  innoçenti . Questa morte santa ätro a no l'è che o premmio pe avei ammassou l 'infedele . Gh'è in te questo terrorismo islamico 'nna dimenscion religiosa spaventosa : existan nassoin dove a cultûa islamica a l'è dominante  e dove l' intolleranza religiosa e o fanatismo son a base da politica de quelli Stati . Governanti che sfrûtan l'islamismo pe mantegni o lö potere . L'è söo in te sti  paixi chi che stato e a religion son a mæxima cösa . E a stöia a n'ha insegnou che quande o potere temporale e o potere spirituale se mesc-cian coscì fortemente , no ne pêu sciortî ätro che ûn stato illiberale e intollerante .
E quello çentana de zûeni di çentri sociali che son anæti pë stradde de Torin a manifestâ co-i mûssulmen , söo spunciæ da ûn sentimento antiamerican e antioçidentale ,  lö che fan de l' ateismo a so dottrinn-a ,  foscia no san che pe i mûssulmen a personn-a atea a l'è ben ben pëzo do cristian . L' islam o l'è bon , dixan i Agnoletto e i Casarin , ma no se sà comme mai miggia de cristien in ti ûrtimi meixi son stæti massacræ comme peccetti in Sudan , in tanti stati africhen ,  in Malesia , in te Filippinn-e , pe no parlâ de quello che passava in Afghanistan dove chi parlava de Cristo o l'ea arrestou e dove vegnivan distrûte e stattue millenäie do Buddha . Voemo parlâ de l'islam e di stati islamiçi ? Voemo ammiâ cöse succede in te quelli stati ? Nisciûn ne parla , tanto son boin , i cattïi semmo noiatri . In te l' Arabbia Saudïa l'è vietou professâ , ascì in to privou , 'nna religion despægia da l' Islam e tûtte e personn-e che vestan o g'han di scimboli de ätre fedi religiose vegna perseguitæ dä poliscia religiosa . Chi no l'è mûssulman o vegne misso in prixon . In to Pakistan i cristien vegnan emarginæ : chi offende o Coran o g'ha a prixon a vitta , chi bestemmia Maometto o g'ha a penn-a de morte . In te l'Iran i zûeni son costreiti a stûddiâ testi de propaganda islamica , offenscivi verso a religion cristiann-a .
Interessante l'è stæto l' articolo che Achille Lega o l'ha scrïto in sce WWW.AFFARITALIANI.IT dove o parlava de schêue islamiche de jihad .
Là i diritti de donne no existan : a donna a no pêu anâ a schêua , a no pêu travaggia , a no g'ha o drïto de vötâ , a deve sciortî de cä coverta finn-a a-i êuggi . Ma quello c'o lè ciû grave pe 'nna çiviltæ c'a dovieiva ëse scimile ä nostra o l'è o rito crûdele de l'infibulassion , a mutilassion di organi genitali femminili . E no parlemmo dappêu de tortûa e penn-a de morte .
L' Italia e tûtta l' Europpa no s'acorzan che stan sûbindo 'nna forma de islamizzassion : finn-a in te schêue italiann-e , dove gh'è di figgêu mûssulmen se levan e croxi da-e miage . Pe o mæximo motivo a Torre Baldone , in provinça de Bergamo , e meistre han cancellou a poula Natale , rinunciando a onorâlo pe no offende l'Islam . E l'infibulassion a l'ha za riguardou in Italia 'nna dexenn-a  de miggia  de figgêue mûssulmann-e .
Ma in Italia semmo söo a l'inizio : in França stan ben ben pëzo de noiatri : o chador o l'è stæto legalizzou  e ascì l'è stæta açettâ a poligamia !!!!! E se son  anæte creando de sitûassoin paradossali , comme quello ommo maghrebin con 3 moggê e 20 figgi che in to 1997 o l'ha avûo da o comûne de Marseggia 150 millioni de lïe in te 'n anno comme agiûtti de assistenza sociale !
Dappêu , pe fortunn-a , i proclami di Imam , cappi religiosi , che stan chi in Italia a difeisa propio di atti terroristi , n'han averto finalmente i êuggi . A cultûa islamica a no l'è inferiore ä nostra , ansi a l'è superiore pe a forsa di valori c'a contegne e propio pe questo a l'è ûn pericolo grandiscimo .
L'opera de islamizzassion in Italia e in Europpa a l'è za comensâ : a l'è legalizzâ . N'han  impio a testa de frasi comme : "son amixi" , " no son poi coscì cattïi" "meschin besêugna ëse solidali " ... e via coscì .  Guai se quarchedûn o voese oua issâ a testa , perché sûbito o vegneiva indicou comme rassista da 'nna scinistra italian-a e europea sempre ciû autolesionista . Pe quante tempo ancon doviemo continuâ a sentî proclami antioçidentali e anticristien da quelli boin islamici che vivan tra de niatri ? Lö pêuan dî "Viva Bin Laden " , mi no posso dî che se chi no se trêuvan ben se ne pêuan anâ a cä lö . A 'nna reçente manifestassion islamica a Milan , gh'ean di cartelli con sciû scrïto :
" Islamismo sciû , Cristianeximo zû " e ancon " Trinitæ=politeismo" .
Nisciûn giudiçe o l'ha applicou o reato di "Vilipendio ä religion " , nisciûn giornale o l'ha condannou sto fæto chi . Se stemmo dando de picconæ in sce balle da soli , e ne semmo contenti .  E moschee , o san tûtti da Prodi a Berlusconi a Bertinotti , son di nïi de intolleranza , da dove nascian propio quelli kamikaze che corpiscian o chêu da nostra çiviltæ .  L'emmo piggiæ in ti nostri paixi in nomme di Diritti de l'ommo  e pe 'nna politica solidaristica e de tolleranza di nostri governanti che invece de portâ là o travaggio han portou chi di terroristi .
"Grassie a-e vostre lëzzi democratiche e grassie a-e nostre lëzzi religiose ve leviemo de mëzo " coscì o dixeiva quarche tempo fa ûn erto cappo religioso islamico in Italia . Han visto ciæo che a mancanza di veri valori in ta nostra çiviltæ , a mancanza de 'nna vera fede , a perdita da fede cristiann-a , a saia o pê de porco pe scardinâ o nostro mondo . A debolessa de l'oçidente a se vedde asci in te poule do Pappa . Mai c'o l'agge criticou e stragi de cristien da parte islamica in gïo pe-o mondo : pâ quæxi c'o l'agge poïa a mostrâ a realtæ . E sensa 'nna guidda spirituale forte comme a deve ëse quella do Pappa , asci a cristianitæ , c'a l'ea za in forte crisi , a va sempre ciû perdendo credibilitæ no söo davanti a-i nostri êuggi, ma asci davanti a-i êuggi di mûssulmen .
Ûn arcivescovo de Izmir , in Tûrchia , o l'ha dïto :" O dominio islamico o l'è comensou co-i petrodollari , dêuviæ no pe dâ travaggio e agiûtta e lö popolassoin , ma pe tiâ sciû de moschee e di çentri cultûrali islamiçi in ti paixi europei . L'esempio ? A ciû grande moschea europpea l'han constrûia a Romma , scimbolo da cristianitæ . Domandeghe ûn po a loiatri se ne fan constrûî  'nna cattedrale   ä Mecca !!!! "

< vanni a-a toua di argomenti >
ÛN  PAPPA  DEBOLE  PE 'NNA  CRISTIANITÆ  DEBOLE

Aivo terminou l' editoriale do meise passou parlando da debolessa da Gëxa , in moddo particolare do silençio do Pappa e de guidde spirituali cristiann-e , riguardo a-e stragi de fedeli cristien  in Africa e in Asia . Manco a fâlo apposta quarche giorno doppo  gh'è stæto o massacro cristian in ta çittæ de Bahawalpur , in to Pakistan .
A cristianitæ mai comme oua a l'è scimile pe tûtto e in tûtto a-o Pappa de Romma : vëgia , debole , tremante . Vëgia perchè l'ëtæ di praticanti cattolici a l'è sempre ciû erta , se va meno in gexa , mentre i ätri pregan due votte a-o giorno ; debole perche a nostra societæ a manca de vëi valori , sorvia tûtto perchè se semmo ascordæ de ëse cristien ; tremante perchè l'è bastou ûn Osama bin Laden e quattro figgi do deserto pe mette in allarme mëzo mondo .
Ho lezûo i dati riferïi a l'anno passou : 601 , tra o 1990 e o 2000, son stæti i miscionäi trûçidæ söo perchè diffondeivan a poula do Segnô , 165000 personn-e ammassæ in te l'anno  2000 , ommi , donne , vëgi e figgêu , massacræ sensa pietæ söo perchè aivan a colpa de ëse cristien . E i 18 de Bahawalpur ätro no son che l'ûrtima lista de martiri  .
Ma questa ne dixan c'a no l'è 'nna guæra de religion e visti i dati pâ sempre ciû diffiçile creddîlo . Ma se no son morti pe 'nna guæra de religion vêu dî che son stæte  de vittime innoçenti sacrificæ in nomme de 2 cöse : de l'  islam e do "politically correct" oçidentale .
Analizemmo i dûi motivi : ho dïto l' islam e no l' integralismo islamico , perchè seguendo e poule do Coran  i mussûlmen dêuvian  quarsevêuggia moddo pe fâ fêua i infedeli ; e quande no ghe riescian co-e lezze e co-e menasse , alloa tian fêua i Kalasnikov . I 18 protestanti do Pakistan l'han dimostrou : han sacrificou a lö vitta pe Cristo ,  cristien in ta tæra de Allah . E no parlemmo dappêu di cristien de Molucche : i ommi vegnan çirconcisi e e donne infibûlæ comme segno de appartenenza a ûn mondo islamico .
L 'islam o l'ha dunca cacciou a maschëa , e no söo co-i massacri , ma asci co-e poule di imam de Milan e Torin , che no lascian nisciûn dûbbio in scë reali intensoin di islamiçi . Mi continuo a dî che no gh'è nisciûnn-a differenza tra islamiçi moderæ e integralisti , asci perchè finn'oua nisciûn mussûlman moderou o l'ha ancon condannou i atti de bin Laden . Emmo dappêu visto e sentïo e poule che rappresentanti di mussûlmen in Italia han dïto in trasmiscioin televixive , paragonando Gesu Cristo a " ûn cadaverin appeiso , co fâ puïa a-i figgêu " e a "ûn delinquente c'o l'ha fæto söo a fin de 'n delinquente " . Cösa ancon ciû grave l'è che vixin a sta personn-a  chie gh'ea ûn preve c'o no l'ha mesciou 'nna poula pe difende Gesu Cristo , ma g'ha dovûo pensâ  'n laico comme o Cacciari !!! Dixan che a religion islamica a l' è contra a violenza ma no condannan a "Guæra Santa" , che anzi a fâ parte da lö religion . Pûrtroppo  gh'e ancon chi l' ha puïa de dï  che in ti paixi arabi regna primma de tûtto l' intolleranza ; manca sorvia tûtto l' applicassion de ûn di prinçippi fondamentali pe 'nna bonn-a e paxifica convivenza : a reçiproçitæ !
Ma o problema de l'integralismo islamico saieiva ninte se o no se fuise ûnïo a 'n ätro grande problema : l' indifferenza do mondo oçidentale pe quello che sûccede a-i nostri fræ in ti paixi islamiçi e l' indifferenza graviscima da Gexa .  Lezendo l'articolo do meise passou riguardo ä battaggia de Lepanto se poeiva vedde quante o l'ea forte o sentimento cristian in to difende a çiviltæ europpea , e a Gexa a l'ea asci forte in to difende a Croxe do Cristo .  Da quella battaggia l'è derivâ a nostra çiviltæ : 2000 anni de Cristianeximo n'han portou a vëi , asci se no completi , prinçippi de libertæ e de democrassia , 1400 anni de Islam han tegnûo millioni de personn-e in te l'ignoranza e a povertæ , sotta regimmi dittatoriali e teologici .
Oua l' Europpa di governi rosci  a l'ha fæto intrâ sciummi de arabi , o Pappa o l'ha baxou o Coran , i Vescovi continuan a parlâ de tolleranza e accoglienza . I cardinali che dixan a veitæ , comme o Biffi e o Maggiolini , vegnan isolæ .  A debolessa da Gexa a se vedde in to no l'ëse determinâ a tegni erto o nome  de Cristo e da Croxe . Ûn Pappa che in to so pontificato o no l'ha fæto ätro che domandâ perdon : perdon a-i cineixi , perdon a-i arabi , perdon a-i protestanti e a-i ortodosci , perdon pe l' inquisiçion . Ninte da dî : a Gexa a doveiva chiedde perdon pe quello c'a l'aiva fæto , ma o Pappa o l'avieiva dovûo domandâ conto a-i arabi , a-i cineixi e a tanti ätri de lo malefatte contra i cristien . Dappêu vegne inûtile che o Pappa o parle da difeisa di valori , quando o no l'è manco bon lë a tegni erti i valori da Gexa Cristiann-a . E chi dovieiva pensâ a difendîli se no o Pappa ? Foscia o Don Gallo ? Ò o Don Vitaliano ? Quelli son previ che ciû che avvixinnâ nêuvi fedeli ,  tegnan ä larga i vëgi ......
L'ea za di anni che no faxeivo ciû o presepio , ma da quest'anno o Bambin o tornià a nasce in ta mæ câ perchè o Bambin o rappresenta no söo o mæ credo , ma o rappresenta  a mæ çiviltæ . A Gexa cattolica dappêu s'a vêu restâ attaccâ a-i penscei di so fedeli , c'a lasce perde çerti buonismi e c'a segue invece e indicassoin do Biffi e do Maggiolini , senza stâ a sentî quello che dixan Prodi e D'Alema ò senno o nostro futûo o saià ben ben tragico e cûpo . A politica portâ avanti da l'Europpa di post comunisti  a ne sta portando ä morte : ciammëla "politically correct" , ciammëla indifferenza , ciammëlo autolesionismo : ma no l'è poscibile che i prinçippi de tolleranza e i diritti ûmen devan vai söo pe i foresti o pe i diversci , ma quande noiatri o i nostri fræ vegnimmo sottoposti a ûnna ingiûstissia da parte di foresti o di diversci , alloa besêugna fâ finta de ninte e scordase de tûtto . E se finn-a o Pappa o se gïa da l'ätra parte e o fa finta de ninte , vêu dî che semmo arrivæ propio ä fin .
< vanni a-a toua di argomenti >

ZENA , 'NNA POULA C'A FA PUÏA

No son arestou pe ninte mäveggiou pe-a bûgna sc-ciûppâ in ti primmi giorni de dixembre  riguardo a-o cartello ZENA  che, da abûxivo, o dava o benvegnûo a chi l' intrava in ta çittæ e che quarche solerte italian o l'ha pensou ben de fâ levâ . G'ha pensou pe-a precixon ûn tale Scimunetti de Camoggi , ûn che o ghe deve avei tanto da fâ , pe avei o tempo de ciammâ o Secolo XIX e lamentâse  da tradussion in zeneize da so çittæ !!!
Interessante che ûn solerte çittadin italian o se preoccûpe de ûn cartello abûxivo , che o no fa ninte de mâ , quande de abûxivo in gïo pe-a çittæ gh'è de tûtto : abûxivi son i zingæi , abûxivi son tanti venditöi ambûlanti extracomûnitäi pe-i mercoei çittadin , abûxivi son i zueni di çentri sociali in ti edifiçi che han occûpou , abûxivi ean i stûdenti che primma de feste aivan occûpou e schêue . Ma mentre tûtti questi abûxivi costan de palanche ä comûnitæ , quello cartello o no ne costava ninte . O travaggiava in silençio , a gratis , dando o benvegnûo a-i zeneixi e a-i foresti che intravan a Zena . O l'ea li sitto sitto , o salûava , o dava allegria , o l' impîva o chêu de 'nn aïa nêuva . A mi , che tûtti i giorni intro in Zena pe quella stradda , o me fava vegnî in chêu i tempi passæ , i tempi de quande o mæ messiavo o l'anava a travaggiâ a-o mercou de ZENA cö carretto tïou da-o cavallo .
E comme lë , tanti nostri vëgi che da li passavan pe intrâ a ZENA , "non a GENOVA" , cäo Scimunetti .  Ma tant'è quello cartello o faxeiva puïa . Tra l'ätro o solerte italian Scimunetti  o l'ha rimarcou che no semmo ancon in Padania pe avei i cartelli scrïti in dialetto . E t'ou li che arrivemmo a-o punto baxilare . L'iniziativa do Scimunetti pe conto mæ a l'è söo politica : no cazzieiva çerto da-e nûvie se me dixessan che o solerte çittadin italian Scimunetti o g'avesse 'nna tessïa de partïo . Questo solerte camoggin , pardon italian , o l'è arrivou a mette insemme dialetto e secession . Ma alloa se l'è vëo che o Scimunetti o parla zeneize , cöse dovemmo pensâ ? C'o segge ûn secessionista lë ascì ????  Ûnna poula , ZENA , c'a fà ancon puïa . Çerto cäa ZENA t'æ cheita ben ben in basso se l'è vëo che primma ti faxeivi puïa in te tûtto o mediterraneo pe-a to potensa economica e commerciale , e oua ti spaventi söo o primmo Scimunetti c'o passa de li .
Ma a corpa a no l'è çerto do Scimunetti , che compatimmo pe-a so pochessa intellettuale , ma a l'è de quella brancâ de politiçi che in ti ûrtimi anni ätro no han fæto che demonizzâ i dialetti . Se dappêu g' azzûnzemmo che l' ûnico partïo politico chinn-ou in campo a difeisa de tradissoin locali e de lengue locali a l'ea a Lega Nord assemme a-i väi movimenti indipendentisti o autonomisti regionali capimmo perchè pêu sciortî ûn Scimunetti quarsevêuggia a fâ levâ o cartello con sciû scrïto ZENA . No l'è corpa de ZENA cäo Scimunetti se i ûniçi comûni italien , a parte quelli de regioin ötonome , che aggian misso di cartelli bilingue (Alassio , Acqui e tanti comûni lombardi e veneti ) ean con scindichi da Lega Nord o de partïi ötonomisti , ma a corpa a l'è di D'Alema o di Storace o de väie Francescato de tûrno che vêuan che ti , cäo Scimunetti , ti t'ascordi d'ëse zeneize .
E no credeive che ghe segge ûn solo Scimunetti : de Scimunetti a ZENA coscì comme in tûtta Italia ghe n'è a miggiâ .... L'è za passou ciû de 'n meise e o cartello o l'è ancon li , ma tanti "scimunetti" se son divertïi a paciûgâlo , a mettighe adexivi de squaddre de ballon . Paciûgâ o cartello e a scrïta ZENA , l'è comme avei 'nna mancansa de respetto pe-i lêughi che ne ospitan . L' è 'n atto da vëi colonizzatoî .
L'è propio a frase " no semmo ancon in Padania .... " c'a ne fà , grassie a-o Scimunetti , ûn sunto da situassion politica di ûrtimi dexe o chinze anni . Che o Scimunetti o g'agge 'nna tessïa de scinistra o de drïta l'ha poca importanza : pægi son .  Ma questo o serve pe fâne capî mëgio o perchè a devolussion e o vëo fedealiximo  fassan coscì puïa e ä drïta e ä scinistra : devolussion e vëo fedealiximo l'è ciû ötonomia , devolussion e vëo fedealiximo vêu dî 'nna schêua ciû ligâ a-o territöio , vêu dî 'nna descoverta cultûale da nostra tæra . Oua invece ne vêuan fâ ascordâ a nostra cultûa in nomme de 'n multicultûaliximo uniformante . I antiglobalizzatöi son i globalizzatöi da cultûa e dë lengue ....... E semmo arrivæ a-o punto che anâ a descoverta de propie reixe vêu dî ëse di rassisti . Emmo lezûo tûtti , in sciö Secolo XIX , i commenti che ötorevoli personaggi han fæto riguardo a sta stöia chie : o Crozza o dixe :" S'o vêu ëse ûn fæto rassiale o me fà schifo .." . Avei capïo : scrïve ZENA vêu dî ëse rassisti ...... Luca e Paolo dë "Iene" dixan : " A secession a no ne piaxe , o vanto çittadin sci ..." A poula Zena pe sti dûi chie vêu di secession ........ Cöse voei che ve digghe : vêu propio dî che no han capïo ûn belin . Pe arrivâ dappêu a l' intervento do lenguista Coveri c'o l'arriva a contraddîse in to so mæximo articolo . " ..... O zeneize o no l'è ûnna lengua , ma 'n dialetto ..... Che differenza gh'è tra lengua e dialetto ? Nisciûnn-a , söo che nisciûn dêuvia o dialetto in te 'nna funsion pûbblica (schêua , tribûnalli , testamenti o cartelli stradali  ........) !" .  O prinçipâ giornale çittadin o se mette contra e nostre stesse tradissoin e alloa cäi amixi l'è pe questo che no me mäveggio pe-o sciô Scimunetti : semmo noiatri che femmo i Scimunetti , anzi l'è molto probabile che dentro de noiatri ghe segge ûn Scimunetti ascoso ....... E finn-a che comandian i Scimunetti , pe-i dialetti e i costûmmi locali ghe saià poco spazio ......
< vanni a-a toua di argomenti >
RUGGIEUROFORIA O PËGOIN ?
Doppo ûn meise che giornali e televixoin n'han impïo o çervello co-e fraxi entûxaste do Prodi e di banchê tedeschi e françeixi pe-a monëa ûnica , e doppo che l'euro o l'ha commensou a gïâ pë nostre stacche , a mente ciû fresca poemo oua sc-ciarîse ûn po a testa . Gh'è vosciûo ciû de 40 anni pe arrivâ a avei 'nna monëa ûnica pe tûtto o vëgio continente , ma oua vegne da domandâse se tûtti sti vantaggi de quæ n'han parlou ghe son pe 'n davvei . 
E i vantaggi dappêu pe chi son ? Pe o normale çittadin o pe-i commerçi ? Pe i çittadin de tûtti i paixi o pe quarche paise ciû che pe ätri ? Perchè me fasso ste domande ?
Ma perche emmo ascistïo a 'nna vëa e propia caccia a chi no l'ea Ruggieuroentûxasta !!! O foscia se credeivan che tûtti fuisan di europëgoin , comme quella brancâ de gente che o 15 de dixembre faxeivan a fïa pe piggiâ e monëe . In Finlandia ädritûa han za levou de mëzo i tocchi ciû piccin : 1 e 2 citti . Ma ve pensæ s'a fuise stæta l'Italia a levâ ste monëe chi ? Ghe saieiva stæto 'nna marea de scioperi , se saieiva criou a l'emarginassion do nostro paise in Europpa e via coscì ....... I finlandeixi , che son çertamente ciû bicci , se ne son strabattûi e cugge ; pe no parlâ dappêu di ingleixi che manco l'han vosciûa a nêuva monëa , però se permettan d'accûsane de Euroscetticismo.
L'è propio o colmo . E invece devo dî che a me piaxe l'idea de cacciâ zû i confin europei e poei dêuviâ ûnna monëa in tûtti i stati , ma no pe questo devo perde ogni drïto de critica e obbedî a tûtto quello che o Prodi ò o Rutelli o ancon pëzo i "pedofili"  belgi me ordinan . Emmo ascistïo ä farsa do figgio d'Agnelli , o Ruggiero , c'o s'è dimisso söo perchè di ministri , ascì economiçi , aivan espresso di dûbbi in sciä validitæ de l'Euro . S'è fæto tanto cancan pe l'Euro , ma l'è za da 1999 che l'è poscibile operâ con questa monëa chi .  Pâ quæxi che l'Euro  o dovesse ëse açettou ben pe forsa , comme se finn'oua , sensa Euro , fuiscimo stæti in ta merda . Eppû di dûbbi ne dovieiscian sciortî tanti , perchè s' attrovemmo ûnna mæxima monëa pe paixi che no son omogenei ; che no son omogenei economicamente e politicamente . S'attrovemmo pë  man ûnna monëa ûnica , ma a mi me vegne ûnna domanda : de fronte a ûnna crixi economica , finn'oua l'ûnica mainea pe frontezzâla l'ea quella da svalûtassion da monëa nassionale  ò de fâ leva in scï tasci . Ma comme ben savei , oua e banche çentrali di väi paixi no g'avian ciû ötonomia d'assion . Questo o porrià significâ che d'oua in avanti crixi economiche de 'nna çerta entitæ dannezzian i paixi ciû deboli ( Grecia , Portogallo , Italia , Spagna ) ò e crixi de singoli stati dannezzian tûtti i ätri ??? . Chi ne avià di vantaggi saian paixi comme Germania e França che g'han de economie solide , con pochi debiti e basci livelli de disoccupassion , ò asci i paixi forti dipendian da-e economie di paixi deboli ?
Ma oua besêugna arvî ben i êuggi perchè doppo l'ûnificassion monetäia son sûbito sciortïi con l'ûnificassion politica . Ne vêuan fâ credde che a monëa ûnica a l'agge 'n potere ûnificante , cösa c'a no l'è vëa . Gh'è son di esempi illûstri : o rublo ,  c'o l'ea in corso in tûtta l'URSS , ma o no l'ha impedïo a disgregassion ò ancon o Franco CFA ( o franco da comûnitæ finanziäia africann-a) che da ciû de 50 anni o l'è dêuviou in 14 paixi africhen , sensa che questi stati aggian sentïo o besêugno ò a coæ de zûntâse . Avei a stessa monëa o no l'è dunca ûn fenomeno ûnificante . 
A ciû grande belinata l'ha comme a-o solito sparâ quello scemellan do Prodi : " Emmo fæto l'Europpa , oua dovemmo fâ i Europpei " . Preferiscio no commentâla , porrieiva ëse troppo offescivo verso quello c'o no l'è ätro che a pessa da pê da grande finansa !
Ma se se deve arrivâ a avei ûnna politica comûne , allöa besêugna stâ attenti a no fâse fregâ . Besêugna stâ attenti a che Europpa se vêu . No besêugna açettâ tûtto a êuggi serræ , comme emmo fæto finn'oua . E sci cäi amixi , perchè n'han portou in Europpa , n'han cangiou a monëa , ne stan cangiando e lezze , ma nisciûn n'ha interpellou . O nostro pai o no conta ûn belin . Saià ûn caxo che in tûtti quelli paixi dove han fæto i referendum pe intrâ in Europpa , aggian vinto i NO ?
Ä scinistra europpea , doppo c'a comensa a perde i goerni nassionali (doppo a Spagna , ascì l'Austria , l'Italia , a Svessia , e oua o Portogallo ) , a sta çercando de sciaccâ in scë l'açeleratô pe dâ origine a-o Sûper stato çentralizzou europpeo . Ûnna nêuva Ûnion Sovietica , foscia ancon ciû burocratizzâ . E sci perchè in te l'URSS no se mesûavan e banann-e o e carotte , no se ammiava a lö forma , no se stabiliva pe lezze , comme in te questa Europpa , quante doveivan ëse grandi e meie ò e peie , ò se a ciccolata a poese ascì ëse fæta sensa cacao . Ûnn' Europpa c'a l'ha fæto sciortî , pë sò lezze astrûse fæte a ûso e consûmmo dë grandi murtinassionalli , o morbo da vacca matta ò i polli ä diossina . E allöa ò faiemo comme e pëgoe anando derrê a-o Prodi e ä sò nêuva Europpa comûnista o doviemo çercâ de fâ nasce ûnna Europpa di popoli e de regioin . 
Dovemmo fâ nasce ûnna Europpa c'a tegne conto dë väie realtæ e de väie identitæ c'a componn-an . Invece oua emmo a che fâ con di comûnisti che ne vêuan imponn-e l'economia comme ûnica regola de vitta , creando ûn sûper stato antidemocratico , çentralizzou , monocratico , dove o potere o no l'è da politica ma o l'è dë poche famigge da finansa . E allöa se l'Europpa a no crescià da-o basso , da-i popoli , dä gente , se a no saià 'n Europpa dë regioin , allöa a saià 'n Europpa grigia , affaristica , comme a Repûbblica de Weimar . 
< vanni a-a toua di argomenti >

I SAVOIA  ? PRIMMA NE FASSAN E SCÛSE ......

E va a finî che gh'a faian ! L'è anni oramai che ne stan sûssando o belin con sta stöia di Savoia che vêuan intrâ torna in Italia . Gh'è da dî che in ti ûrtimi dexe anni , dappêu , ascì a televixon a g'ha dæto 'nna bella man : da-e apparissoin do "prinçipe" a-e trasmiscioin do Fabio Fazio in veste de tifoso manco a dîlo juventin ( poeiva ûn prinçipe tegnî pe 'nna squaddra de ravatti comme o Chievo ò o Lecce ?) , pe finî ascì co-i sceneggiati monarchiçi . A m'è piaxûa l'immagine con a quæ o Gilberto Oneto in te 'n so articolo o l'ha presentou i Savoia : lì , fermi a-o confin svissero , co-e valixe in man e i êuggi pietoxi , in atteisa de varcâ o confin da tæra promissa . E sci perchè l'è propio coscì che l'informassion a ne presenta anchêu a famiggia Savoia : baussæ comme di figgêu c'han visto ûn tocchetto de ciccolata . Oua , a mi comme a tanti ätri pövei cristi che tûtti i giorni dovemmo ïsâse de mattin fïto pe anâ a travaggiâ  , che intren in Italia  i Savoia  a no l'è 'nna cösa c'a ne cangià a vitta . Do resto in tûtti questi anni son intræ fïe e fïe de delinquenti albaneixi o nordafrichen , che aveighe due extra comûnitäi in ciû a no fa 'nna grande differensa . Sta riflescion a se pêu fâ da normali çittadin . Se invece anemmo a vedde a question da-o punto de vista politico ò storico a cösa a piggia  di connotati ben ben despægi . 
Tanto pe comensâ a no me va zû che , grassie a-o voto comûne de maggioranza e opposission , possan intrâ sensa poei domandâ o pai a-e gente . A gente a l'è stæta a scurïli , a gente a deve ëse a dî che oua pêuan intrâ . Ûnna cösa importante saieiva dappêu che i Savoia riportessan a-i italien i scûi che o sciö  Re , sbattendosene e cugge do popolo italian , o l'avia röbou scappando da-o paise dove oua vêuan intrâ : a-o cangio de anchêu faieivan quæxi 500 miliardi de lïe . No l'importa che no ghe l'aggen : pêuan de segûo travaggiâ a gratis pe pagâ sto puffo chi . 
Ho lezûo in tanti giornali lettïe de quarche lettö c'o rinfacciava a-i Savoia tante corpe , sorviatûtto quella de avei lasciou via libera a-o fascismo .  Mi penso invece che a corpa ciû grande a segge quella de aveine levou a libertæ : e non söo a-i Ligûi , ma a tûtti i popoli italien . E derè no gh'ëa nisciûn spuncion nazionalista italian , ma söo ambission e sæ de potere .  Ûnna sæ de potere c'a l'ha privou i popoli da penïsoa da lô indipendensa , magara comme in to cäxo da Ligûia sensa manco i soliti referendum fäsi .
E alloa se propio vêuan intrâ in Italia , primma saieiva d'obbligo che domandessan scûsa a tûtti i popoli italien pe-i tanti massacri e stragi c'aivan ordinou , comme pe fâ 'n esempio quella de Zena do 1849 . 
Aivo za misso ûn articolo in sce sto fæto storico , che poei anâ a lëze in te l'archivio  ; ommi ammassæ , donne violentæ , questi ëan i Savoia , ma i Tg de ste cöse chi no ne parlan ............ 
< vanni a-a toua di argomenti >
 
 

"DOVEI PARLÂ ITALIAN : O L'È PE LEZZE !!!"

" Cöse vêuan ancon sti rassisti ? Vêuan parlâ i lö dialetti ? Pövei illûxi , sti lombardi , sti piemonteixi , sti ligûi , sti rassisti veneti , sti sardegnolli , sti mafiosi siçilien ............... " . Eive li quello che pensan , in nomme da solita Repûbblica indivixibile , in nomme de quella fascista idea de ûnitæ nassionale , tanti e tanti depûtæ che magara propio in Ligûia han piggiou , o foscia saieiva megio dî röbou , de çentanæ de voti da tante e tante gente che parlan e vorrieivan continuâ a parlâ a lengua che i lö vëgi g'aivan insegnou .
E coscì l'è comensou i attacchi a-i dialetti italien . Pe-o novanta pe çento di depûtæ italien , quante contan anchêu e millenäie lengue che milioni e milioni de çittadin veneti , ligûi ecc..ecc.. parlan ancon fra de liätri ? Ninte ! Pe-o Parlamento Italian conta söo a lengua italiann-a . E guai a chi se prêuva a difende i dialetti : son sempre lö , quelli rassisti do Nord , leghisti , adritûa nazisti segondo quello che tûtti i giorni o scrive quello gentilòmmo do direttô de l' Ûnitæ , o Fûrio Cömbo  . Eh sci ! Nazisti pe sto scignoro chi son quelli che difendan e minoranse lenguistighe , i boin invece son quelli che voendo costitûssionalizzâ a lengua italiann-a , çercan de fâ möî quelle za deboli cultûe regionali che propio attraverso i dialetti riescian ancon a esprimîse .
E alloa davanti a-e proposte de AN e da scinistra ( comme ho sempre scrïto , fascismo de drïta e fascismo de scinistra pe mi pægi son ) ancon d'assæ che ghe seggian quelli 4 gatti de leghisti rassisti , barbari e inçivili , i ûniçi che g'han a chêu e nostre cultûe e che han vosciûo ancon 'nna votta arecordâ a-o parlamento italian che a lengua italiann-a a no l'è l'ûnica lengua che se parla in sciö territöio nassionale . Scibben quello c'o dixe o Fini , c'o parla de Gens Italica . E ghe l'han vosciûo arecordâ ascì a costo de ëse linciæ da l'informassion de regimme e de ëse fæti passâ pe-i soliti paisen da ostäie , quelli che , imbrieghi , parlan in dialetto cö naso rosso pe-i litri de vin gollæ .
O bello l'è che i Verdi , a Marghëita e i fascisti de AN , han trovou comme primma scûsa pe poei costitûssionalizzâ l'italian comme lengua offiziale a puïa de l'omologassion cultûale causâ dä globalizzassion !!!! A lö reçetta dunca a saieiva che pe sarvâ 'nna lengua l'è mëgio ammassane  'nna ventenn-a : bella röba ! Hitler ò o Tito ò o Stalin no avieivan posciûo fâ de mëgio .
Ma comme ho sempre dïto e no me stanchiò mai e poi mai de dî , a corpa a no l'è di Fini ò di Rutelli ò di Bornacin : a corpa a l'è söo da gente , noiätri , che sti scignori  chi l'ha mandou a goernâne ò a rappresentâne in parlamento . Perchè no se pêu continuâ a mugugnâ contra quello c'o fà levâ o cartello ZENA , ò dappêu piggiâsela con quelli che vêuan fâ de l'italian a lengua offiziale italiann-a , se doppo in ta cabinn-a elettorale s'ascordemmo de tûtte ste cöse chi .
L'è pe questo che mi no ho mai mandou mail de mugugni contra o Pericu pe-o cartello Zena c'o l'ha fæto levâ ò contra o parlamento pe-a nêuva lezze , perche o sciô Pericu e i depûtæ ghe l'emmo missi noiätri savendo chi ëan e che idee aivan . Gh'è ûn dïto : "Chi è causa del suo mal , pianga se stesso !" e o s'adatta propio ben pe sti caxi chie .
Ma scignori , ûn che 'n anno fa o l'è anæto a votâ o Bornacin ò o Bûrlando ò Intini cöse o poeiva aspëtâse da questi chi ??? Che voesan difende o zeneize ??? Che ghe poese importâ quarcösa di nostri dialetti ???
L'avei mandæ a Romma ??? E oua , cäi scignori , besêugna tegnîseli  e gödîseli .
< vanni a-a toua di argomenti >


GRASSIE VITO

Cäo Vito Elio Petrucci
vêuggio chi arecordâte con due righe , e do resto no avendo mai avûo o piaxei de conoscite no saieiva in graddo de dî de ciû  . T'æ stæto finn-a a-o meise passou o protagonista prinçipale da cultûa e da lengua zeneize . Poeta , attô , scrittô , regista , ötô de testi pe-o teatro e pë cansoin . Scibben tûtto questo , mi no l'è guæi anni che conoscio o tò nomme . Do resto ëan i anni che o dialetto locale o l'ëa ancon ciû disprezzou che oua . Ëo ûn figgêu de 10-11 anni quande pe-a primma votta aivo sentïo o tò nomme pronunçiou con grande respetto : "Vito Elio Petrucci " . Coscì t'aivan ciammou o mæ messiavo e o sò vixin parlando fra de liätri in zeneize , no sò de cöse . O m'ëa arestou in mente , foscia pe quelli due nommi . Petrucci , ma chi o saià ? Quarche lö amigo de l'ostäia , o de bocce ?. Petrucci ! Foscia me paiva de avei visto quello nomme in scë di fascicoli che davan insemme cö giornale de Zena . Boh . L'ëa passâ ûnn' ätra dexenna d'anni e 'n giorno gïando pe-i canali televixivi m'afermo in scë 'nna tv locale perchè sento parlâ zeneize . E t'ëi ti , o Petrucci . Vanni 'n pò a ammiâ che foscia te immaginavo propio coscì  , mustasci e cavelli gianchi , speggetti e quello parlâ 'n po stanco , strascicou . E dappêu quello "Scignoria" cö quæ ti terminava a trasmiscion o m'aiva fæto descrovî  'n ätro mondo . Ma cöse belin vorrià dî scignoria , me domandavo ?
L'ëa diffiçiliscimo sentî parlâ dialetto in televixon e mi çercavo sempre de veddite . Sci , o posso propio dî : se son passou da italian a zeneize , no söo comme lengua ma propio drento comme animo , l'è pe merito fra i ätri ascì do Petrucci . Ancon oua quande poeivo çercavo de ammiâte in quelli belliscimi dûetti con Maria Vietz in scë TeleZena . Bastava veddite lì , pe poei capî l'amô che t'aivi pe Zena , comme te brillava i êuggi quande ti t'arecordavi da çittæ do doppo guæra o de quello caruggio , che oua o no ghe ciû , o de quande Zena a l'ëa ancon Zena .
E dappêu tûtti quelli ravatti , quelli strufoggi de 'n tempo antigo che ti tïavi fêua e che te faxeivan fâ ancon due risate . Ti te n'è  anæto in silençio , venerdi dïsette , propio doppo avei compïo i anni , settantenêuve . O giorno doppo vaggo a çercâ in scë internet a notissia da tò morte . Arvo "O Secolo XIX" in sciä pagina da cultûa e ninte . T'aivan misso in te notissie dä Ligûia , 'n articoletto in mëzo a-i problemi fiscali di artigien e a 'n incidente in sciö lou . Foscia doveivan impî quello spaçio lì !
Vaggo alloa a vedde a "Repûbblica-O Lou" , ma mi no ho attrovou ninte . Pêu dâse che in te l'edission de papê a ghe fuise...... Coscì i giornali çittadin difendan e diffondan a nostra cultûa . 
O TG3 regionale invece a-o lûnedi o l'ha mandou o serviçio in sciö tò funerale comme ûrtima notissia . Mëgio no commentâ ! Cäo Vito , ti meritavi de ciû da sta çittæ e se ûn giorno avian o bon senso de dedicâte armeno un caroggio , comme ti ti voeivi , saià çertamente ûnna mainea ûn po tardiva pe domandâte scûsa ..........
Ti , Vito Elio Petrucci , vëo cûstodde da nostra zeneixitæ . Oua te immaginn-o , mentre ti  t'avvixinn-i cö tò passo lento a San Pê con 'n man ûn tocco de fugassa ancon cäda , de quella con l'êuio da Sciâ Marinetta , e ti g'ou dæ pe fâghe sentï i savoî da tò  Zena .
Scignoria Vito Elio Petrucci !
< vanni a-a toua di argomenti >
 
 


LIBERTÆ DE PAROLLA O PAROLLE IN LIBERTÆ ?

Quante contan anchêu e parolle ? Quante peisan , quante vän ? L'è za da 'n po de anni che ogni tanto , periodicamente , sta domanda a se me cianta in ta testa . Saià che mi , fin da quand'ëo ûn gardetto , son sempre stæto de poche parolle : o vëgio stereotipo do zeneize diffidente e serrou o se me adatta ben . Cöse l'è che m'ha fregou , l'è che mi ho sempre dæto ûn gran valô a-e parolle : ciû che dî 'nna parolla in ciû o sempre preferïo dîne ûnn-a in meno . E no per avariçia , perchè tanto e parolle son de badda . Ma perchè pe mi a parolla a l'è sempre stæta dêuviâ pe çerca de dî quarcösa de vëo , de ciæo , quarcösa c'o no fuise dïto coscì tanto pe dî .
Quante contan anchêu e parolle ? Quante peisan , quante vän ? Ho sempre çentellinou i sêunni che sciortivan dä mæ bocca , perchè pe mi a parolla a doveiva avei 'n fin , bello o brûtto c'o fuise , costrûttivo o destrûttivo , ma avei ûn fin . Attrovâme assettou in cöa da-o mëgo e ciætezzâ cö vixin de carega in sciö tempo o in sciö ballon , pe mi ëan parolle sprecæ , cacciæ via . Tanto ciû perchè quelle nostre parolle no avieivan avûo moddo de poei cangiâ ni o tempo , ni e squaddre de ballon . L'è bella a libertæ de parolla , ma e parolle in liberte pêuan ëse ben ben pericolose . Ho visto e sentïo çerte telecronache RAI a-i mondiali de ballon quande zûgava l'Italia da fâ vegnî a pelle d'oca : ädritûa se negava quello che tûtti poeivan vedde . S'ammiava i erroî di arbirtri invece che ammiâ e criticâ i madornali erroî davanti ä porta do Vieri o do Tommasi o do Gattuso . E parolle do Pizzul e do Bulgarelli son stæte e saian pericolose : o giorno de Corea-Italia ëo ä menn-a e doppo c'a l'ëa finïa a partia  ho sentïo figgêu de 7-8 anni plagiæ da-e parolle d'odio do Pizzul . Ma comme o fâ o Pizzul dappêu a criticâ a violensa in ti staddi , quande lë o l'è o primmo a fomentâla co-e sò parolle . O sacro furô italico o g'ha inorbïo o çervello : poscibile che tûtte e partïe fuisan di complotti contra l'Italia ? E i motivi ? Nisciûn l'ha dïti !! O foscia l'è ciû probabile c'o complotto o fuise l' alibi çercou fin da l'inissio pe giûstificâse ?
Internet , satelliti , bit , telefoni , e parolle viägian in pochi segondi da 'nna parte a l'ätra do mondo ma dappêu in realtæ quante contan anchêu e parolle ? Quante peisan , quante vän ? E a parolla a l'è soggettiva ? A l'è quello c'a vêu dî ò a  pêu voei dî 'nna cösa pe mi e ûnn'ätra cösa pe ätre personn-e ? Ma se 'nna parolla a l'ha ûn scignificato , a pêu pe contra avei 'n ätro scignificato magara opposto ? Sto tarlo de parolle o m'è sciortïo seguendo a politica ä fin di anni '80 : a l'epoca tutto l'ëa ciæo , i ommi e e donne de gexa votavan democraçia cristiann-a , i comunisti votavan partïo comunista , i fascisti votavan movimento soçiale . Dappêu l'è cangiou tûtto : e han commensou a cangiâse o nomme , a dâse di titoli dêuviando o nêuvo nomme pe mëgio accreditâse . E alloa son sciortïi i progrescisti , i riformisti , i democratiçi , i democratiçi de scinistra , Forsa Italia , forsa de chi e forsa de là . Ûn tempo l'ëa ciû sencia a cösa :  se primma mi ëo do partïo comunista voeiva dî che i ätri che no a pensavan comme mi no ëan comunisti , ma soçialisti o repûbblichen o democristien ; ma oua se mi son ûn politico progrescista vêu dî che chi no a pensa comme mi o l'è ûn c'o no vêu o progresso ? Se mi son un politico democratico , o mæ avversaio o saià antidemocratico , se mi son ûn democratico de scinistra vorrià dî che a scinistra i ätri no son democratiçi , se mi son ûn riformista o mæ avversaio o saià ûn c'o no vê fâ e riforme ? E quelli mæximi che se dan sti belli nommi chi , i dan ascì a-i avversäi ciammandoli , quande va ciû che ben , conservatoî . Ma comme a l'è alloa che i conservatoî fan ciû riforme dei riformisti ?
E parolle no g'han ciû o scignificato de 'n tempo . No pensala comme çerta gente  l'è suffiçiente  pe ëse ciammæ rassisti e csenofobi . Emmo visto in Fransa movimenti de estrema scinistra çercâ de bloccâ e vendite do libbro de Oriana Fallaci , portandola in tribûnalle : ma alloa me domando dove o l'è o prinçippio , sancïo dä Convenscion di drïti de l'ommo , da libertæ de esprescion ? In Italia no semmo da meno : semmo arrivæ a di punti coscì bassi in ta politica italiann-a che anâ pëzo penso saià molto diffiçile . N'ho avûo a prêuva provâ seguendo i ûrtimi fæti politiçi relativi ä nêuva lezze in scë l'immigrassion . Parolle sparpaggiæ in parlamento a-i 4 venti , aggettivi tiæ comme cotellæ , fraxi dêuviæ comme kalasnikov da-i terroristi , parolle de quæ no se conosce manco a forsa e o scignificato .
Ho sentïo politiçi parlâ de rassismo e de schiavismo söo perchè no tûtti pe fortûnn-a a pensan comme liätri . E alloa ho piggiou a lezze in te man e ho provou a çercâ dove l'è o rassismo e o schiavismo in te sta lezze , ma no l'ho attrovou , a-o conträio ho attrovou 'nna lezze c'a vêu impedî a-i bacchen de sfrûtâ a miseia di pövei clandestin . Ascì perchè ste parti che dixan ëse rassiste son ben ben dêuviæ in tanti paixi "progrescisti" . A parte ciû rassista dixan ëse quella in scë impronte digitali : ma alloa quande me l'han piggiæ pe-o serviçio militare , m'han discriminou ?
Ho sentïo o prescidente da Camera che manco o sa cöse vêuan dî çerte parolle e manco o conosce o codiçe penale : ma l'è poscibile sto fæto chi ? Pe fâ 'n esempio a quæ ho ascistïo , doppo che o sciö On.Violante o l'aiva parlou , etichettando o discorso de 'n ätro parlamentare comme "nêuvo manifesto do rassismo e de l'odio çivî" , sûscitando e rimostranse do "rassista" , o Casini o l'è intervegnûo dixendo che o Violante quella frase o a poeiva dî perchè "o no g'aveiva miga dïto c'o l'ëa ûn delinquente" !!!!!!!
Comme no ! O Gexûmmaia , ma Casini , ma cöse belin ti dixi !!! O rassismo o l'è ûn reato perseguitou da-o codiçe penale , o rassista o l'è foscia pëzo de 'n delinquente pe-a lezze italiann-a , sciô Casini .
A libertæ de parolla a vegne dêuvia molto sovente ,e ascì da mi , pe sparpaggiâ a drita e a manca parolle en libertæ . Ma ûn conto son e mæ parolle , ätra cösa e parolle de 'n parlamentare .
Son söo parolle : ma çerto che se dovescimo dâ a menti a-o scignificato de parolle , ûn c'o se ciamma Casini , ò se ciamma Violante , comme o partiçipio presente do verbo  Violâ , l'è tûtto dî  .............
< vanni a-a toua di argomenti >

A RAI FEDEALISTA A NO PIAXE A-O ROSSO E A-O NEIGRO ...

E t'ou li che finarmente tûtti quelli in te sti ûrtimi dozze anni se son impïi a bocca con 'nna parolla nêuva pe loiätri  e  han imparou ûn nêuvo modello de organizzascion statale ( fedealiximo ) , a-i primmi açenni de vëo fedealiximo son sûbito pronti a straçâse i vestî e a crïâ a-o scandalo : pe-o primmo reale esperimento de Rai Fedealista .
L'è da capî , lö che pe deçenni son stæti abituæ a forme de potere çentraliste , stataliste e romanoçentriche . Forme de potere che se esprimeivan ascì grassie a-e televixoin e a-e radio de stato . Tanto l'è che oua , cangiou con ûn anno de retardo o prescidente da Rai , gh'è de grendi difficûltæ pe tiâ fêua da questi çentri de potere mediatico quelli servi de l'informascion ( Santoro , Biagi e compagnia bella .....) che finn-a a vantëi ëan a-o serviçio do baccan roman .
Con e nomine de l'Albertoni in to CDA e do Marano a cappo de Rai2 ( o canale ciû in crixi ) , o prescidente Baldassarre o l'ha dæto di ciæi segnali de cangiamento da Rai in senso ciû regionalista , tanto che finn-a da-o giorno da sò nomina o Marano o l'ha fæto vedde de voei ûnna Rai2 divisa in trei . Programmi , che in çerte fasce oräie , se possan distinguen tra Nord , Çentro e Sûd . O tûtto pe differensiâ l'offerta in sciä base di gûsti e de aspettative pe di pûbbriçi molto despægi .
Saieiva a dî che in te çerte öe , se ad Aosta o a Meran in te Rai2 veddian a finale do campionato de Hockey in sciö giasso , che in Sicilia o l'ha söo 3 praticanti , a Palermo veddian ûn programma ciû vixin cultûalmente .
E , o 7 de lûggio , a-o primmo esperimento de sto tippo chi , l'è za sc-ciûppâ a bûgna da parte de quelli che in te tûtte e campagne elettorali straparlan de fedealïximo ma che dappêu quande arriva o momento de applicâlo mostran ciæmente i lö vëi istinti romanoçentriçi e statalisti . No l'è ûn caxo che contra a nêuva Rai fedealista ( o leghista comme dixan in scë l'Ûnitæ ) se seggian missi l'Ulivo e i estremisti da drïta , za che i estremmi sempre se toccan . L'è da o primmo nûmmero do Faro Ligure , scrïto ancon in italian ,  che no fasso distinscioin tra fascismo de drïta e fascismo de scinistra perchè pe mi pægi son ( ansi vëgi ex-comûnisti me han sempre dïto che i fascisti de scinistra son ben ben pëzo e in te sti anni ho imparou a verificâlo ) . De fæti doppo a proposta do Baldassarre de spostâ fêua da Romma o 25% de produscioin televixive da Rai ( che vegnivan dæte in appalto a ditte esterne ) o Veltroni e o Storace , o rosso e o neigro , se son inalberæ . "Saian ascì ditte esterne ä Rai , ma son sempre posti de travaggio de Romma !" dixan .

Ma  o Veltroni e o Storace , quande taggiavan 2000 posti de travaggio a-e sedi Rai do Nord dove ëan ??? O san in che condissoin a l'è a sede Rai de Zena ???Emblematiche dappêu e dichiarassoin do Romano Bracalini , viçedirettô do TG3 , che han fæto anâ in scë tûtte e fûrie i vertiçi de l'Ulivo :" Gh'è 'n asse fascio-comûnista c'o blocca e riforme in Rai !" . E se o dïxe lë c'o l'è a-o TG3 , gh'è da creddighe ......
Ädritûa se ironizza in scë a coccina lombarda do Marano : e a l'è benvegnûa , diggo mi , finarmente di sêunni despægi da-e  comiche fraxi sgrammaticæ do Biscardi nassionale , ò da-e pronunçie italomeridionali do Arbore ò do Frassica o do Banfi e de tanti ätri che pe anni han imperversou in sciä Rai . E no parlemmo dappêu de vöxi romanesche tippo  Magalli , Proietti , Bonolis , Ferilli e via de sto passo chi .......... A l'è stæta pe tanti anni 'nna Rai romana , l'è vegnûa finarmente l'öa de cangiâ registro , e de avei 'nna Rai c'a segge ligûe , piemonteize , lombarda , calabreize , siciliann-a .......... Ma figgêu se g'han avûo a faccia comme o cû da fâ 'nna fiction in sciö Pappa Gioan XXIII dove a Bergamo parlavan quæxi in napoletan !!!!!
O 7 de Lûggio 2002 Rai 2 a l'è diventâ a primma ræ fedealista italiann-a : a-e 9.30 de domenega mattin i telespettatoî de Ligûia , Piemonte , Val d'Aosta , Lombardia , Friuli Veneçia Giulia , Veneto , Trentin Erto Adige , han posciûo vedde ûn Festival Mûxicale Internassionale che da-o 1997 o se tegne a Courmayeur , sotta o Monte Gianco , "Celtica 2002"  , con ciû de 500 grûppi cultûali provegnenti da tûtta Europpa . Pe ûnna öa e mëza son stæti proposti i momenti ciû scignificativi de questa manifestascion , che pe-a primma votta a l'ha avûo o piaxei de ëse irradiâ in te tûtto o nord italia .
E , scibben a 'nna öa tarda , saià dæto spaçio in futûo ascì a grûppi e cantanti dialettali : o Van de Sfroos o l'ha za posciûo esibîse in conçerto in scë Rai2 e za o l'è stæto etichettou "leghista" scibben o no segge . Doppo anni e anni de Festival da canson napoletann-a , de primmi mazzi mûxicali in bandëa rossa , de "Denâ in câ Cupiello" , gh'è stæta ûnna piccinn-a inverscion de tendensa c'a l'è però ancon troppo poco . O problema l'è che sti  fedealisti de l'ûrtima öa , e di direttoî che aivan misso a dirizze a Rai ,  pensavan che a somma di localïximi a poese dâ 'nna programmassion nassionale , mentre invece finarmente gh'emmo in Rai chi pensa che se debban attrovâ  de tematiche e di programmi  che possan zûntâ territöi con 'nna stöia comûne , pe fâ da Rai ûn vëo e propio serviçio pûbbrico .
Pe avei finarmente ûnna Rai fedeale e popolare : propio quello c'o fâ puïa a-i çentralisti in camixa rossa e neigra ......... 
< vanni a-a toua di argomenti >
 
 

FEDEALIXIMO , OUA O MAI CIÛ !
" A revolûssion a votte a l'è comme 'nna vacca c'a deve sgraiâ , se no l'agiûttemmo perdemmo vacca e vitello insemme "
de  Umberto Bossi

[...]L'è ben fâve savei sûbito che semmo in to pin da battaggia pe razzunze quello che se proponemmo . G'aviemo ancon di tempi diffiçili , scontri violenti e vixin , ma noiätri no dovemmo mai ascordâse che semmo i eredi da tradission do Carroccio e che tocca a noiätri , fëi da tradission popolare e popolann-a , mette sciû  'n nêuvo paise .
A dichiarassion de Veneçia do 15 settembre 1996 a l'è stæta a prïa miliare pe-a fin do çentralïximo roman .
[...] Gh'è çertamente 'n parrallelïximo tra a dichiarassion de Veneçia e o storico zûamento de Pontida contra o progetto libertiçidda do Barbarossa . Alloa mercanti e artigien dë 20 çittæ ciû importanti da Padania , da Torin a Treviso , a Bologna , s'ëan radûnæ in to convento de Pontida e aivan zûou de defende i lö Comûni , saieiva a dî a Padania , da-e preteise feudali de l'Imperatô .
L'è nasciûa alloa , cö spirito da Padania , a primma çiviltæ liberale . E coscì ëan nasciûi i Comûni , ûnna istitussion rivolûssionäia che a Lega a l'aiva sacciûo defende da-o Barbarossa , che invece de avei quello c'o voeiva , o l'aiva riçevûo 'nna  baccâ c'a l'aiva segnou a fin do Feudalëximo .
T'ou lì perchè a Padania a l'è in ta stöia , perchè a l'è o catalizzatô da nêuva epoca fedeale , comme a l'ëa stæta alloa , a Pontida , inventando o mondo moderno . Noiätri semmo chi anchêu no pe 'n armistissio o , pëzo , pe arrendîse , ma perchè emmo deciso de rilansâ a nostra battaggia pe-a libertæ e o fedealïximo .
[...] O Belgio in to '93 o l'è diventou ûn Stato Fedeale . In Inghiltæra gh'è stæta a devolûssion pe-o Galles e a Scoçia . In Spagna gh'è stæto o potensiamento dë Comûnitæ Ötonome . Con l'avvento do processo de integrassion europpea tanti stati , primma ûnitäi , se son deçentræ mettendo sciû 'n processo de fedealïximo .
[...] Tûtto sto remescio chi no pà vai pe-o Stato Italian c'o resta ancon o ciû refrattäio ä sensibilitæ fedealista . Funsoin e competense restan sardamente ligæ a-o çentraliximo roman : i enti periferiçi e i lö popoli pêuan aspëtâ . E a Padania a l'ha aspëtou pe de lungo , mugugnando contra o clericalçentraliximo italian finn-a a-o 15 settembre do 1996 , quande se semmo rotti e chi a Veneçia emmo proclamou a secescion da Padania da-o Stato Italian . Alloa saveivimo che se l'Italia a fuise intrâ in te l'Euro ghe saieivan stæte de bonn-e condissoin pe-a 'nna transformassion fedealista do Stato , pe contra avieiscimo dovûo lottâ dûo pe-a nostra libertæ , ma a tûtti i moddi a fuise anâ , 'n atto de rottûa comme quello da secescion o se rendeiva necessäio , ò pe preparâse ä lotta ò pe mette i nostri paletti a-o cangiamento fedealista pe via democratica .
[...] Doppo l'intrâ in te l'Euro , pe no perde l'occaxon de 'nna poscibile reforma fedealista emmo partiçipou ä creassion da Câ dë Libertæ cö patto , e de commensâ a devolûssion verso o basso de competense fondamentali comme schêua , sanitæ , poliçia locale , e de limitâ o passaggio de funsoin e de sovranitæ nassionale a l'UE c'o mette in peigo i tradissionali prinçippi democratiçi. [...] O programma do goerno o doveiva ëse donca ligou co-a volontæ popolare , attraverso a devolûssion verso o basso : a Devolûssion , o Fedealiximo , a Regionalizzassion da Corte Costitussionalle  , o Senato Fedeale , o Coordinamento de Regioin , a Famiggia , l'agiûtto dæto a-i ceti ciû bassi ecc..ecc.. Tûtto l'è fermo , ascì pe volontæ interne ä nostra coalission .
[...]Da 'nna parte , in sciö cian de reforme ordinäie ( sociali , economiche ...) o Goerno o l'ha realizzou foscia ciû do programma . Invece in sciö cian de reforme costitûssionalli o Goerno o l'ha realizzou de meno , scibben seggian propio ste reforme chi a caratterizzâ a nostra alleansa de goerno , che in ti patti a no doveiva ëse basâ in sciä gestion de l'existente , ma in scë  'n programma de cangiamenti costitûssionalli .
Gh'è stæto 'n cangiamento do quotidian , gh'è stæto o patto pe-o svilûppo e quello de penscioin minime portæ a 'n milione , doppo i 70 anni , e antiçipæ de 'n anno ogni 5 anni  de versamenti , pe-i ommi e pë donne silenti ( saieiva a dî pe quelli che non ha razzunto i minimi de versamento pe poei piggiâ a penscion ) . Ma ancon no gh 'è stæto reforme sostansiali da giûstiçia , tant'è che ancon s'attrovemmo o penale pe-i reati d'opinion , e , ciû in generale , i eletti da-o popolo son ä mercè di magistrati .
Gh'è stæta a nêuva e fondamentale lezze in scë l'immigrassion  c'a liga l'intrâ in to paise a-o contræto de travaggio e c'a se proponn-e de levâ de mëzo o graviscimo fenomeno da clandestinitæ c'a l'è 'nna menassa pe-i nostri popoli . Ma ancon a no gh'è stæta a reforma do scistema istitûssionalle c'a l'è ä base da presensa da Lega in ta Câ da Libertæ . L'è necessäio , arrivæ a sto punto chi , che a coalission de Goerno a l'evite o rischio da stagnassion politica .
Besêugna vinçe a puïa do cangiamento , da  'nna man a-e reforme pe impedî a nascita de disegni alternativi attraverso a creassion de nêuvi partïi politici çentralisti .
Tra o 2002 e o 2003 besêugna che se possan serrâ quanto meno due de prinçipali reforme istitûssionalli previste :a Devolûssion e a Corte Costitûssionalle , assemme ä realizzassion de reforme in matëia de prostitûssion , segûessa , lou e stato sociale , fisco . Coscì comme o 2004 o deve vedde nasce o Senato Fedeale cö Coordinamento dë Regioin quæ organo de proposta de lezzi in matëia de competense , e o Presidensialiximo . A tûtti deve ëse ciæo che a Lega Nord a no l'è ûn fattore estemporaneo de potere , o pëzo ancon de bassa cuxinn-a politica . A Lega a-o conträio a no l'è söo ûn formidabile fenomeno de carattere storico , ma a l'è soviatûtto 'n catalizzatô c'o l'ha demostrou de poei açelerâ o tempo . A pêu consciderâse , sensa arrogansa e sensa enfaxi , 'nna forsa da natûa , e a l'ha confermou tûtte ste cöse chi primma cacciando zû e basi da partitocraçia , e oua arvendo 'n nêuvo capitolo de stöia .E questo capitolo o g'ha 'n söo nomme , o nomme ciû grande da revolûssion democratica : o sò nomme l'è Fedealiximo .
[...]Noiätri savemmo ben che , o riuscimmo a guagnâ a nostra battaggia , o ätrimenti a s'asmortià pe molto tempo a lûxe fedealista che a Lega a l'ha açeiso in to scûo da corrussion çentralista .
Mi m'ou griddo e o griddo a-o popolo : FEDEALIXIMO OUA O MAI CIÛ !
[...] Söo 'n cataclisma provocou da 'nna violensa revolûssionäia ( comme in Fransa in to 1789 e in Ruscia in to 1917 )  o pêu sradicâ 'nna çerta nomenclatûa e arvî  'n nêuvo periodo storico . Ma ascì a vëa democraçia a pêu diventâ forsa revolûssionäia  , bonn-a pe dâ iniçio a 'nna epoca nêuva cö Fedealiximo .
Quande me attroviò in seia difficûltæ pe fâ avansâ a reforma fedealista , ve ciammiò a dâ di scrolloin a-i palassi sûppi  de farisaica fäsitæ , de avverscion pe-i nostri popoli , ve indichiò i nommi di rassisti che da-e lö careghe finzan democraçia , ma in ta realtæ son contra o popolo , soviatûtto o nostro popolo e a sò libertæ .
Pe-i elettoî moderæ , comme tûtti san , a proposta a deve anâ primma da protesta , ma tant'è quande a proposta a vegne sistematicamente avversâ , alloa l'è ben recordâ che noiätri no poemo rischiâ 'nna subalternitæ a-e ätre forse politiche . O popolo anchêu o torna in ciassa , no pe fâ de rionde do rincianto pe-o potere oramai perdûo irrimediabilmente , ma pe dâ ûnna açelerâ ä revolûssion fedealista che i boiardi insidian . Gh'è chi dixe che a revolûssion a votte a l'è comme 'nna vacca c'a deve sgraiâ , se no l'agiûttemmo perdemmo vacca e vitello insemme . L'è pe questo che se mescemmo , pe riportâ a nostra anima in mëzo ä gente , in te 'n momento storico dove i poteri mondialisti çercan de scoraggiâ tûtti i "ismi" a favô de l'"ismo" ûnico e ciû grande , propio o mondialiximo .
Integraliximo , fondamentaliximo , nazionaliximo , secescioniximo , tûtto l'è vietou . Ma a mæ imprescion a l'è che o scistema o çerche de mettise sotta i tacchi ascì l'aspirassion fedealista , perche o fedealiximo vêu dî ötonomia e l'ötonomia vêu dî cultûa locale e a cultûa locale a produçe indisponibilitæ a l'omologassion di popoli . E cultûe locali troppo forti paggian ëse conscideræ 'n peigo , perchè stabilendo 'n scistema de çiviltæ , de fæto orientan o goerno politico e porrieivan impedî l'integrassion a-e immigrassoin che o scistema o dêuvia pe diluî e cultûe ben ben radicæ . I popoli paggian vêuæ da lö sostansa da 'nna piovra basâ in sce l'economia e a tecnocraçia . L'è ciæo che 'n scistema che o l'annienta ogni passou cultûale o no l'è ûnna çivilizzassion , ma o l'è a-o contraio  'n scistema c'o rende tûtto indifferensiou , comme e cellule de 'n mä cattïo , e ciû o l'è indifferensiou ciû o l'è cattïo . Çertamente a vitta di popoli a se mette contra ä crescita do scistema-tûmore e contra i popoli se scatenn-an i miscionäi do socialiximo riparatô dë ingiustiçie verso o terso mondo , do paxifiximo mondiale ecc.. , pe dîla in breive i "egualitaristi" .
E collettivitæ son completamente disorientæ perchè sto mâ cattïo o cancella o princippio storico nassionale e quello politico territoriale perchè i sò criteri de appartenensa son economiçi e tecniçi .  Pe poei fâ ascordâ i valori tradissionali , a New Economy e l'ideologia egualitarista da scinistra e de çerto cristianeximo , han fæto credde che a ricchessa a no g'aveiva fin e che donca l'ospitalitæ a poeiva ëse sensa limmiti . Che a çircolassion a l'ëa sensa limmiti . Gh'è stæta a creassion de l'ideologia da çircolassion comme s'o fuise ûn ben : çircolâ l'è bello e poscibile perchè a ricchessa a no l'ha ciû limmite . O tûmore-scistema o sosteniva che a ricchessa a l'ë 'n ben de l'ommo creatô e moltiplicatô , o mito de Lûçifero pe dîla tûtta . O sosteniva che i fondamentali da ricchessa ëan stæti fæti da l'ommo e no ëan fæti da-o Segnô ; no l'ëa ciû o travaggio , o petrolio , l'êuio , o gran , ma a ricchessa a poeiva ëse moltiplicâ sensa limmiti con l'economia  finansiäia . L'economia  a l'è coscì passâ da capaçitæ organizzativa da mente a sêugno onirico , a droga .
G'ha pensou a gente a risponde a-e balle da Borsa .  A crixi de l'economia finansiäia in ti Statti Ûnïi a l'aveiva za razzunto o sò apice 6 meixi primma do famoso 11 de settembre 2001 . O popolo o l'ha dêuviou a sò arma totale , c'a l'è a fiduccia e o l'ha levâ a sti moltiplicatoî de ricchessa .
Anchêu semmo tra a crixi de l'economia virtuale , do ben e a ripreisa di valori , de l'economia reale , do prinçippio storico nassionale e de quello politico territoriale . O mondo o cangia . E o mette in crixi i progetti di "grembiulini egualitaristi" , dë bande e di riondin , a nêuva variante di giacobin che ballavan in gïo a l'erbo comme oua ballan in gïo a-o parlamento .
In to 1996 a secescion a l'ha dæto o via a-o fedealiximo . In to 2002 commensa a volata finale pe realizzâlo . E donne , i ommi , i zoeni da libertæ son ciammæ ä mobilitassion permanente .
[...]Fedealiximo oua o mai ciû ! Viva a Padania Libëa in te 'nna Italia fedeale .

"FËO DE ËSE BASCO"
de  Jon Idigoras
(piggiou da Batasuna.org)

Sabbo ho avûo , 'nna votta de ciû, l'opportûnitæ de sentîme òrgoggioso do mæ popolo , da mæ gente . Scöo , con i êuggi irritæ , ho visciûo assemme ä mæ gente 'nna giornâ que no ascordiò tanto façilmente . Molte dexenn-e de miggiæa de baschi e basche de quarsevêuggia condiscion , ûnïi braço con braço , contra l'impoziscion , a brûtalitæ da polissia e rivendicando i nostri drïti e poei ûnna votta pe tûtte deçidde do nostro futûo , vive in paxe fra a nostra gente , sensa dovei sopportâ che i spagnolli seggian chi a dirigge o nostro futûo . E manco che di goerni "baschi" staggan comme bambocce , intimidïi e sensa savei difende i nostri drïti  e ciegæ ä macchina represciva da polissia , di giudiçi e di media , do nêuvo e arrogante fascismo spagnollo . No m'ascordiò tanto façilmente de quelle facce , segnæ dä raggia e da l'impotensa , manco a fëessa e a dignitæ con a quæ han risposto ä brûtale e ingiûstificabile aggrescion dä polissia che con raggia e dispresso , a l'ha tiou ancon 'nna votta , gas , cannoin de ægua a prescion e a l'ha dêuviou i manganelli a-o serviçio do fascio spagnollo e de 'n goerno "basco" pin de puïa ,  indegno de rappresentâne e incapaxe de difende e poche competense de 'n Statûto mätrattou e ogni votta de ciû calpestou . Miggiæa de baschi e basche davanti a l'oddio e ä brûtalitæ , söo co-a forsa da propia dignitæ , co-a sò coerensa politica e co-a sò convinsion in te 'n futûo de libertæ .
Assettæ pe ciû de 'n öa sotta i spari e a-o griddo ûnanime de "Euskal Herria aurrera!" han dæto ûnna lession de fermessa a quelli che , dêuviando a menassa de 'n lehendakari spagnollo , se son profittæ pe poei piggiâse 80000 voti che mai han avûo e che , sensa imbarasso han dêuviou a-o serviçio di lö bacchen de Madrid .
Emmo da imparâ sta lession chi , pe no fâ o mæximo errô , za che Madrid a no g'ha besêugno de'n lehendakari spagnollo visto che Ibarretxe o difende ben i lö interessi e sabbo emmo avûo 'nna nêuva e ciû vergognosa prêuva . Ascì a l'è stæta 'nna prêuva pe forgiâse in vista de futûe resposte a-o fascismo spagnollo e in ta lotta pe-i nostri drïti e pe-a nosrta libertæ , lotta che a saià ben ben lunga . Che nisciûn pense che aniemo a commette l'errô de isolâse o che se faiemo piggiâ dä disperassion , che dappêu o l'è quello che çercan de fâ . Ciû precisamente l'è Aznar e i sò satelliti do Psoe che stan mostrando premûa e disperassion pe çercâ de sciaccâ a scinistra abertzale . E noiätri torniemo pë stradde tûtte e votte che saià necessäio .
Emmo visto o ritratto de 'n goerno spanollo fascista , bon a tïâ insûlti e menasse a 'n goerno basco sottomisso , spaventou , söo bon a çercâ de giûstificâ a sò debolessa , çercando de dâ a colpa a-e vittime e de assolve i boia .
Emmo visto a figûa  vergognosa de 'n potere giûdiçiale ciegou a 'n goerno dûo e a predispozission antibasca do Baltazar Garzon , o quæ "io" marotto o l'ha portou ä ëse pëzo de 'n matto e a sartâ a sò legittimitæ e piggiâse competense che no g'aspetan . Competense que son do Conseggio di Interni .
E alloa me domando perchè Ibarretxe o vêu ciû compentense se dappêu quelle poche c'o g'ha o no riesce a difendile ?
E oua m'aspeto che a-o giûdiçe Garzon ghe daggan a "Gran Cruz Gamada" pe-i meriti di sò serviçi prestæ a-o goerno fascista spagnollo .
Vêuggio serrâ o mæ intervento coscì comme l'aivo commensou . Me sento felice de fâ parte de sto popolo chi , fëo e sofferto , c'o no l'è disposto a çedde ûn citto de tæra quande se tratta de defende o nostro futûo comme popolo libëo .
Zorionak! Euskal Herria aurrera!
< vanni a toua di argomenti >
 
 
"CHI DI CODICE ROCCO FERISCE , ...."
Son stæto indeciso scin a l'ûrtimo primma de deçidde che argomento toccâ pe l'editoriale de l'ûrtimo nûmmero do 2002 . Finansiäia , Riforme Fedealiste , a condanna de Andreotti , l'attivitæ do conseggio comûnale de Zena contra e ciû minime forme de cultûa locale , a Devolûssion ecc..ecc.. . Ä fin l'è sciortïo o caxo di NoGlobal arrestæ pe atti sovverscivi e forme de tûrbativa a l'assion do goerno . Ancon quande sto scrivendo no sò se seggian invensoin , sospetti o se ghe segge 'n strasson de prêuva . Çerto l'è che in Italia ancon existan i reati de opinion , e famose lezzi do Codice Rocco , de ereditæ fascista , che propio no se riesce a cancellâ .
A dî o vëo primma de l'intrâ in to goerno da Lega Nord manco s'ëa pensou de cancellâle . Do resto propio in ti ûrtimi anni ëan vegnûe ben a-i rassisti e fascisti goerni de scinistra pe poei scatenâ çerti giûdiçi , veddi o Papalia , contra e manifestassoin de penscëo de çerti depûtæ do Nord . O caxo di NoGlobal oua o no l'è dappêu coscì tanto differente da i caxi do Papalia , de quande spillin o mandilli verdi cö Sô dë Arpi , vegnivan sequestræ in casa de militanti do partïo comme elementi d'accûsa . Ascì a mi me pâ che e motivassoin di arresti do Caruso e de ätre 20 personn-e seggian ben ben "inventæ" .
Dimmoselo ciæo , se i voeivan mette drento avieivan posciûo attrovâ tanti ätre motivassoin : in te l'ûrtimo anno e mëzo , violense , devastassoin , rexistense a pûbbriçi offiziali ghe n'è stæto pe coscì , da Napoli a Zena . Ma saià 'n caxo che seggian anæti a piggiâ propio de lezzi fasciste ? Dappêu a "turbativa dell'azione di governo" ? E alloa perchè o Follini , o Voentæ , o Buttiggion e o Tabacci son ancon a pê libêo ? Chi pëzo de loiätri o l'ha creou tûrbativa a-e assoin do goerno ????
Oua çerta scinistra "democratica" a crïa a-o scandalo : doppo tûtto chi se no a scinistra a s'è sempre fæta passâ comme ûnica paladinn-a di drïti de l'ommo ? Chi se no i comûnisti son stæti i difensoî da libertæ de penscëo  e de stampa ?
A parolle l'è sempre stæto coscì : ma mi e tanti ätri no s'ascordan , cäi scinistrorsci , i vostri fäsi comportamenti davanti a-e rassiste inissiative do Papalia . E approvassoin ä magistratûa antipadania do Prodi , do D'