EDITORIALI 2003

2003 : L'ANNO DË VERDI REFORME(zennâ '03)	I MÄ DA GIÛSTIÇIA(marso '03)
PAX€ € ANTIAM€RICANÏXIMO : NO IN TO MÆ NOMME (arvî '03)	CIAO E SEMPRE .... LIGÛIA LIBËA (mazzo '03)

 
 

2003 :l'anno dë verdi reforme do Il Faro Ligure Cöse a l'è sta smangiaxon che ghe piggia in te sti ûrtimi tempi ä scinistra italiann-a e a-i sò rëziballe do vëgio çentro ? Perchè ancon òua , a distansa de quæxi dui anni dä baccâ elettorale , gh'è quarcösa che agita a coalission cattocomûnista ? Perchè n'han ancon attrovou l'ûnitæ "Ûlivista" ? Gh'è ben ben de puïa drento a scinistra e no söo pe 'nna ûnitæ scindicale che , grassie a-o "Sò tûtto mi" de quarche scindacalista con aspirassoin politiche , a l'è stæta destrûta ; no söo pe-o corrî derrê  de tanti esponenti , magara ascì a tittolo personale , a-e divertenti manifestassoin de riönde e di no-boh-sci-global , che dappêu i costrinzan davanti a l'opinion pûbbrica a tante ötocritiche e a figûe de merda ; no söo perchè quande o Rutelli o dixe 'nna cösa , o Fascin o ne dixe ûnn-a conträia e o Castagnetti op no sà cöse dî . No !!! No gh'intran ninte ste cöse chi , scibben g'aggian a lö rilevansa . O problema de tûtta sta agitassion chi da scinistra son e reforme . Reforme che a scinistra a no l'ha sacciûo fâ e che òua a së vedde passâ davanti sensa savei comme mesciâse . A dî a veitæ 'nna reforma a scinistra a l'ha fæta : a modifica do Tittolo Chinto da Costitûssion . Ûn imbroggio incasinou fæto sempre pe-a puïa dë Reforme !!!!!! Chi no s'arecorda quande o D'Alema primma de elessoin do '96 o l'ëa anæto a-o congrescio da Lega Nord a dî che a Lega a l'ëa 'nna costiggêua da scinistra ??? Ma , da bon pûglieize , a-o fedealiximo nordista o l'ha preferïo o stataliximo meridionale . L'è passâ 'nna legislatûa e o sciö D'Alema o no l'ha fæto nisciûnn-a dë Reforme Fedealiste che sta sò costiggêua a ghe domandava . Doppo l'accordio pë regionalli do 2000 tra a Lega e o Polo dë Libertæ , a scinistra a l'ha çercou de corpî a base de st'accordio chi co-a finta Reforma Fedealista do Tittolo Chinto . E l'è sciortïo tanti mastrûssi foscia ben ciû peigosi che a Devolûssion do Bossi . Ma l'ëa da capîli meschinetti , s'ëan reizi conto che in çinque anni n'aivan fæto 'n belin . Peccou che e cöse fæte de sprescia e ciû votte son e pëzo . O Tittolo Chinto o l'insegna , comme o ne dixe ciû sotta o Corrê da Seia . D' ätronde no se pêu negâ che propio sta desperâ Reforma  de l'ulivo a l'agge averto 'nna stradda , da dove o Bossi e i sò alleati intendan partî . O Tittolo Chinto , donca , comme punto de partensa e no d'arrivo do Fedealiximo . Ma ritornemmo ancon 'n pittin ä doî de pansa da scinistra , ma ascì de çerta parte do çentro-drita , veddi UDC : besorrieiva de fæti ben distingue tra e due parti in question . Allöa partimmo da l'UDC , a chinta colonna drento o goerno . I classici conservatoî  pe eccellensa , i nostalgiçi da vëgia democrassia cristiann-a , i ereddi do meridional-çentraliximo Andreottian e Demitian , quelli che in to programma da Câ da Libertæ no han sacciûo scrive manco 'nna riga . Sensa idee politiche , son söo attaccæ a-o cäro de chi guagna ......... L'ûrtima rêua do cäro , in poche parolle .... Sti chi son ancon ligæ a-o vëgio moddo consociativo de goernâ , g'han insito drento de loiätri a capaçitæ politica de tegnî o pê in te due scarpe . San fä gïâ ben e parolle , quello scì , ma dappêu no agiscian de conseguensa : e in to caxo de menasse de sciortïa da-o goerno , no g'avian mai o coraggio do Bossi do '94 e do Bertinotti do '97 perchè no son sostegnûi da nisciûn ideale politico . Ghe manca a motivassion politica pe poei sciortï da-o goerno : cöse fan ? Sciortan pe di punti do programma che loiätri aivan firmou ??? Ghe faieivan due votte a figûa di scemellen ............. L'è comme 'nna scatöa vêua , donde de votta in votta ghe mettan drento quello che serve pe fäse notâ da-i ätri , de solito sempre in moddo conträio a-o pensâ do goerno ätrimenti no i caghieiva nisciûn . Ansi pe 'nna cösa se son fæti notâ : a lezze Cirami , ûn de l'UDC . Son tanto nesci che i mettan finn-a a firmâ e pëzo lezzi poscibili . Posso capî pe contra a scinistra , che l'è duì anni c'a sta criando in scë tûtto quello che fà o goerno . No che segge sbagliou , ansi , ma foscia raxonnâ de ciû no saieiva 'nna brûtta cösa . Aivan commensou co-e penscioin minime issæ a  'n mion a-o meise . Ëan conträi ascì lì , scibben se segge trattou de agiûttâ i ciû pövei . Ascì mi ëa conträio , pe caitæ , scibben se pe ätri motivi , che a scinistra però a no l'ha vosciûo dî : "se stravolgian e casce de l'Inps"  han sostegnûo Rutelli e o Fascin . Dimmose invece a veitæ : issâ e penscioin minime l'ha vosciûo dî  de dovei dâ ciû scûi a da gente c'a no l'ha mai versou 'n bello belin in te casce de l'Inps !!! Perchè chi l'ëa co-a penscion minima , voeiva dî in poche parolle quello . Sto chi , cäi Fascin e Rutelli , l'ëa o vëo problema : ma perchè no l'avei dîto ????? Foscia perchè finn-a òua quella gente a v'aiva dæto o voto e aveivi puïa de offendili ??? Ma quello che l'è ciû grave son stæte sempre e previxoin catastrofiche che o Violante ò o Fascin ò o Rutelli anavan a fâ davanti a-i media doppo ogni decixon ò lezze proposta da-o goerno . Chi no s'arecorda in to 2000 , primma dë elessoin regionali , o pericolo pe l'ûnitæ e l'indivizibilitæ do paize se e regioin do Nord fuisan anæ ä Câ da Libertæ co-i  secescionisti leghisti  ? V'arecordæ quante balle in scï patti segreti tra o Berlûsca e o Bossi pe dividde o paize ???? Ma no l'ëan dappêu coscì segreti , se belin o saveivan tûtti e o Veltroni , o Violante , finn-a o Scalfari in sciä Repûbbrica , çercavan de mette puïa a-i italien . Chi no s'arecorda de quanti pedofili ò mafiosi ò terroristi saieivan dovûi sciortî da-e galëe italiann-e doppo a reforma dë rogatöie internassionali ??? Quante zoeni dovieivan ëse pe-a stradda co-a reforma-prêuva de l'articolo 18 firmou da tûtti fêua che da-o Cofferati ???? E poi a Lezze Cirami , a lezze in scë l'immigrassion , o Libbro Gianco do Biagi , o Patto pe l'Italia firmou da tûtti fêua che da-o Cofferati propio pe no fâ 'n dispiaxei a-o D'Alema ....... Ûn anno fæto söo de tanti NO e de tante musse c'aivan söo l'intento de spaventâ i italien !!!! A mæxima puïa che in te ste ûrtime settemann-e chi a l'ha corpïo ascì o Prescidente Ciampi : ammïa 'n pò , s'è commensou a parlâ de prescidensialiximo e t'ou lì che ascì Lë o sciorte a dî a sò . "E reforme no se fan a corpi de maggioransa " o l'ha dïto . Ma poscitoëse , cäo Ciampi , dove belin t'ëi quande in to 2001 , quelli che t'han misso in scë quella carèga , han votou 'nna reforma costitûssionalle a 4 giorni dä serrâ dë Camie e con söi 4 voti in ciû ??? Ûnna votta in ciû , ûnn'occaxon pe poei stâ sitto ............... E òua a finansiäia , a primma veamente de scinistra da 60 anni in chi . Manco i goerni ulivisti in 5 anni aivan sacciûo diminûi e tasce pe-i ceti ciû bassi . Gh'è vosciûo a "costiggêua da scinistra" , cäo D'Alema , pe avei o coraggio de fâlo . Basta pensâ che ciû de 8 mioin de personn-e no paghian de tasce e che gh'è stæta l'inverscion de tendensa de quande a-o goerno gh'ëa propio o D'Alema . O D'Alema o l'aivo misso a DIT : e grendi impreize pagavan çirca o 19 % de tasce , i operai 'nna media do 29% e i bacchen piccin quæxi o 60% . Òua i grendi capitali paghian çirca o 32% ( se capisce perchè o Sô 24 öe o dagghe contra a devolûssion , Bossi e o Tremonti ...) , mentre i dipendenti e i bacchen piccin paghian molto meno .... Pe-a primma votta gh'è di incentivi ä famiggia : agiûtti a-e nêuve coppie pe poei accattâse a câ  e agiûtti in te speize pe mantegni 'n figgêu , con bonus pannolin e mëxinn-e . Invece NO!!! O Rutelli , o Fascin e o Violante ëan conträi in scë tûtto : fin-a o Bertinotti ghe gïavan e cugge a vedde che a-i sò operai ghe restiâ ciû scûi in te stacche . Han fæto casin in scë tûtto , invece che conçentrâse  contra quello che veamente o no l'anava da finansiäia : condoni väi ò aumenti do canone rai . Han vosciûo fâ de tûtta 'n erba 'n fascio pe fâ credde che ninte l'anava ben . L'ûnica raxon logica che posso vedde , pe sto comportamento chi , l'è che i leader de scinistra possan pensâ de riconchistâ o paize mettendo sciû 'n climma de caos e de  conflitto sociale , za che con e lö idee politiche saià quæxi imposcibile . Oramai , ascì in parlamento , dêuvian sempre e mæxime fraxi . L'è 'nna cösa sta chi c'a m'è arestâ impressa : " O discorscio do ministro .... o l'è stæto indecente , offenscivo pe-o Parlamento e pe-i italien " . Sta frase chi a l'è za stæta dêuviâ minimo 3 votte in to gïo de 6 meixi ( son söo e votte che m'arecordo mi !!!) . E pe l'intervento difenscivo do Scajola , e pe-o discorscio de presentassion da Devolûssion do Bossi , e pe-a relassion da finansiäia do Tremonti . Da quello che posso vedde , contra e verdi reforme , l'ûnica arma arestâ in te man da scinistra l'è quella de paralizzâ o paize , çercando de fermâ e politiche reformiste che porrian dâ ripreiza , crescita e soviatûtto libertæ . E alloa avanti perchè gh'è ancon tanto da reformâ : da-o 2003 , dòppo a devolûssion , se dovià partî pe vedde nasce a Camia de Regioin , a modifica da Corte Costitûssionalle con l'intrâ di rappresentanti regionali , a modifica do Tittolo Chinto pe poei armonizzâ e nòrme concorrenti , a reforma da Giûstiçia co-e carriere separæ , a lezze elettorale e o prescidenzialiximo ........ Da chi a-o 2006 ghe n'è do travaggio !!!!! A cösa c'a ghe fâ ciû mä , a tûtta sta gente chi , da-o Bertinotti ä-o Casin passando pe-o Ciampi , l'è che e prinçipalli reforme che sto goerno o sta proponendo nascian tûtte in te 'nna chinn-a verde , verde speansa . Queste reforme ätro no son che e vëgie battaggie che tanto tempo fa ( son söo passæ êutto anni ma me paggian quæxi êuttoçento ) m'aivan portou speansozo a Veneçia . Ciû difeiza da famiggia , ciû rigô in scë l'immigrassion clandestinn-a , ciû ötonomia , impoxitiva e legislativa , pë Regioin , meno poteri a-o Stato çentralle , ciû regolamentassion pë tante bagasce in gïo pë stradde , giûstissia meno politicizzâ , abolission dë lezzi fasciste ........ L'è stæto comme aspëtâ e vedde nasce 'nna figgëua . Ebben scì , mi , òua , doppo 'nna gestassion de êutto anni posso finarmente vedde sgraiâ quella creatûa , ä faccia de tûtti quelli che ne voeivan "l'aborto" , che s'öugûravan a morte prematûa . I peigoi no son però ancon finïi : quella figgêua c'a sta pe nasce , de nomme Libertæ , vorrian ammassâla appenn-a nasciûa e tocchià a noiätri difendila , ä gente mettise davanti a-i assascin . Pe fâ cresce a Libertæ sempre ciû sann-a e forte .............

< vanni a toua di argomenti >
 
 

I MÄ DA GIÛSTIÇIA do Il Faro Ligure Giûstiçia : mi penso che no ghe segge parolla ciû bella de sta chi . E a l'è stæta sempre coscì , fin da-i tempi remotiscimi ; söo che allöa  a l'ëa ascì 'nna parolla  temûa perche a giûstiçia a l'ëa divinn-a , gh'ëa o Segnô c'o giûdicava chi l'aiva fæto ben e chi l'aiva fæto mä . Söo Lë , l'infallibile e l'ingiûdicabile , o poeiva castigâ i ommi sensa fâ di erroî . A distansa de miggiâ de anni e cöse son cangiæ , ascì se dappêu no creddei che seggian cangiæ coscì tanto . Scì , vabbè , no gh'è ciû o Segnô a deçidde , ma i giûdiçi son arestæ infallibili , ingiûdicabili e soviatûtto intoccabili , di nêuvi Segnoî . O se n'è accorto quello pövio ommo de Zena , condannòu da ' giûdiçe infallibile söo perchè o g'aiva a macchina pægia e do mæximo colore do vëo delinquente e che dòppo ësise fæto ben ben de anni de galëa òua o l'è stæto ritegnûo innoçente e o deve ëse resarçïo da-o stato con 'nna magnâ de miliardi . Òua mi m'adomando comme l'è stæto poscibile , con quæ cosciensa quello giûdiçe o l'agge condannòu 'n òmmo innoçente ä galëa söo pe-o colore da macchina . Çerto che se quello giûdiçe infallibile o l'avesse sacciûo che ghe saieiva toccòu tiâ fêua 'n pò de quelle palanche pe mette 'nna pessa a-o sò errô o se ghe saieiva pensòu 'n pò de ciû primma de dâ quella condanna . Se gh'è 'n potere che in te sto momento chi o deve ëse reformòu o l'è propio a giûstiçia . Vabbè lascemmo perde l'Ûnitæ che davanti a 'n sondaggio in sciä giûstiçia c'o dava o 50 % di italien soddisfæti da scistema giûdiçiäio a tittolava che i italien no vêuan e reforme da giûstiçia . Peccòu c'a se segge ascordâ l'ätra meitæ . Ma quello c'o l'è sotta i êuggi de tûtti l'è che o scistema o l'è a-o collasso e i magistræ son sempre ciû improdûttivi . No se vêu dî con questo che travaggen pòco , de segûo g'avian i lö boin motivi primmo fra tûtti propio o scistema da giûstiçia di nostri giorni besognoso de reforme . No l'è tante settemann-e che gh'è stæta l'ìnöugûrassion de l'anno giûdiçiäio e ascì cö discorscio  do PG Favara s'è posciûo vedde ciæamente che i processi öumentan , scibben i arrivi de nêuve pendense diminuiscian , coscì comme e pronunçie de sentense . Sto fæto chi o l'è stæto definïo da-o Pg Favara comme , testualli parolle : "decremento de prodûttivitæ" . Comme se pêu tradûe in italian ??? Che i magistræ travaggian de meno , za che riescian a fâ öumentâ l'arretròu scibben e denunçie e i nêuvi proçedimenti seggian sempre meno .  Dappêu son sciortïi dä bocca do Favara i nûmmeri do sfascio : 3,5 mioin de processi çivî pendenti 5,7 mioin de processi penali pendenti 2,3 mioin de delitti dove i ötoî son arestæ sensa nomme (81%) 96% di ötoî de röbi che son arestæ sensa nomme 26 milla carçeræ in atteiza de giûdiçio 1509 giorni : l'è quante o dûa mediamente 'n processo penale 3,5 anni : l'è quante dûa mediamente o primmo graddo do processo çivî 1500 i proçedimenti averti contra a lentessa da giûstiçia O cormo l'è che mentre da 'nna parte i magistræ dan i datti do sfascio lamentandose cö Stato , da l'ätra refûan e reforme dixendo che tûtto va ben coscì , che ninte se deve toccâ . Òua lezendo sti datti chi , tiæ fêua propio da-i mæximi giûdiçi ,  finn-a 'n nescio o capisce che quarcösa da reformâ sotta sotta ghe saieiva . Ascì perchè o scistema giûdiçiäio in te 'n Stato o l'è ûn di elementi baxilari . Se manca a giûstiçia vegne a mancâ ascì a fiduccia do çittadin verso e istitûssoin . Ne sa quarcösa quella famiggia zeneize o quæ figgio o gh'è stæto ammassòu da 'n marocchin ä fin do 2001e òua pe 'n errô do giûdiçe , pe-o solito cavillo c'o premmia i delinquenti invece che i onesti , o l'è a pê libëo . In to senso che avendoghe dòu l'obbligo de firma 'na vòtta a-o giorno in questûa , o l'ha pensòu ben de no fâse ciû vedde . E coscì addio giûstiçia . Òua i magistræ se son presentæ a l'inöugûrassion co-a Costitûssion sotta o braço , pe sottalineâ l'indipendensa e l'ötonomia da magistratûa respetto a-o scistema politico  . E chi no ghe saieiva ninte da dî , tûtto ciû che legittimo , ma semmo sempre a-e solite : de fæti besorrieiva che a Costitûssion a lëzessan ben tûtta e no söo a parte che ghe interessa a loiätri . De fæti m'ou spiegan 'n pò sti magistræ perche lö mæximi se dividdan drento a lö còrporassion in Magistratûa democratica e Magistratûa Indipendente , ûnn-a de scinistra e l'ätra de drïta ???? Ma comme pòsso credde che 'n giûdiçe o segge imparsiale , ötònomo e indipendente politicamente quande o fà parte de ûnn-a de due correnti ???? Ma comme posso credde imparsiale politicamente o Sansa , scindico (?) de Zena pe 'nna parte politica ? E cosci tanti e tanti magistræ che chinn-an in politica ??? L'art.101 da Costitûssion o dixe che a Giûstiçia a l'è amministrâ in nomme do pòpolo e che o giûdiçe o l'è soggetto söo ä lezze . L'art.70 da Costitûssion o dixe che a funsion legislativa a l'è eserçitâ da-o Parlamento , do quæ quelli che ghe fan parte rappresentan a sovranitæ pòpolare . Questi duì articoli chi me paggian ciû che ciæi , ma foscia sta parte chi lö , i giûdiçi , preferiscian no lëzila . Allöa analizzemmola noiätri 'n pittinin : noiätri vivemmo in te 'n Stato , pe coscì dî , democratico . A parola greca democrassia a scignifica "potere a-o pòpolo" . E o pòpolo o l'esercita o sò potere in te 'n mòddo söo : cö scistema elettorale . O goerno çernûo da-o pòpolo o fà e lezze vosciûe dä maggioransa di çittadin che l'han vötæ e che i giûdiçi dappêu devan fâ respettâ . A cösa a pà sencia ,  ma in te sti ûrtimi tempi no l'avvegne propio coscì . Òua l'è sciortïa fêua "l'interpretassion da lezze " da parte do giûdiçe che raxonnando politicamente , Lë c'o se definisce "ötònomo dä politica" o se compòrta  de conseguensa : se 'nna lezze fæta da 'n goerno politicamente avverso a no ghe piaxe , o faià de tûtto pe no fâla applicâ dandoghe l'interpretassion che ciû ghe còmmoda . Propio quello che in ti ûrtimi meixi sta passando co-a Bossi-Fini : clandestin co-e fedinn-e penali inciastræ , che vegnan rimissi in libertæ in base a di cavilli quæxi da rïe , invece che rispedïi a-o lö paize comme o pòpolo ( quello c'o g'ha o potere) o l'ha deciso elezzendo chi l'ha fæto e lezze . Ma cösa ancon ciû grave l'è che sta interpretassion da lezze a no l'existe , s'a son inventâ za che l'art. 12 dë Dispozissoin in sciä lezze in generale premesse a-o Codiçe Civî o dixe :" In te l'applicâ a lezze no se ghe pêu dâ ätro senso se no quello dæto da-o scignificato dë parolle e da l'intension do legislatô" . Tra i descorsci ciû appressæ in ti Palassi de Giûstiçia in occaxon de l' avertûa de l'anno giûdiçiäio gh'è stæto quello do PG de Zena Mènego Porcello . E sò parolle son stæte quæxi in contrasto co-a protesta di sò colleghi :" Noiätri magistræ gh'emmo 'n compito ben preciso definïo dä Costitûssion , quello de applicâ e lezze , che poemo condividde ò no . Donca mi son conträio a-o "rexiste , rexiste , rexiste" do Borrelli , za che o nostro compito istitûssionalle o l'è 'n ätro ." No gh'è ninte de ciû peigoso che i giûdiçi possan çerne se applicâ o no applicâ a lezze fæta da-o parlamento : vorrieiva dî piggiâ o pòsto di eletti da-o pòpolo . E sto chi no l'è che a punta de 'n iceberg c'a l'asconde tante e tante magagne do mondo corròtto da giûstiçia italiann-a . Tra i tanti scandali sc-ciûppæ in ti ûrtimi meixi s'è scoverto che a casta di giûdiçi a l'ha visciûo foscia troppi anni ritegnindose intoccabile , tanto che manco i Palassi de Giûstiçia fan ciû applicâ e lezze interne ; de fæti gh'è vosciûo o Ministro Castelli pe denûnçia tanti e tanti graviscimi caxi de incompatibilitæ di magistræ drento i Palassi de Giûstiçia , caxi che nisciûn di sò predecessoî aiva avûo o coraggio de denûnçiâ . O caxo ciû clamoroso o l'è quello de Cagliari , dove çirca o 30% de l'organico do Tribûnalle o l'è interessòu da sta incompatibilitæ : moggê , maïi , fræ , sêu , cûgnæ , cûxin tûtti insemme appascionatamente in to mæximo Palasso de Giûstiçia violando i articoli 18 e 19 de l'ordinamento giûdiçiäio . Quello de Cagliari o l'è 'n vëo e propio Tribûnalle a condûssion famigliare . Dove sta o problema ve poei domandâ voiätri  . Ebben t'òu chi a cöse pêuan portâ st'intrecci chi : a Cagliari l'ëa in corso o proçedimento pe bancarotta contra o Finansê Flavio Carboni . O PM c'o portava avanti e indagini  o l'ëa Paolo De Angelis . Difensô do Carboni o l'ëa l'avvocato Schirò , a quelli tempi soccio de stûddio do fræ do PM , l' avvocato Luca De Angelis . Pe conclûdde o fræ do PM o l'ëa soccio do stûddio legale do difensô de l'indagòu . Conclûxon : o proçedimento a l'è anæto in prescrission ........ Sta giûstiçia maotta che garansie a pêu dâ a-o çittadin italian ? Ben ben poche . E o CSM cös'e o fà ? E voiätri cöse pensæ c'o posse fâ ? Di giûdiçi che devan giûdicâ ätri giûdiçi : te a lì dove a nasce l'impûnitæ ...........  Ma l'informassion a l'ha ascì e sò corpe : perchè pochiscimi giornali e televixoin han denûnçiòu i caxi come quello de Cagliari ? Perchè se ascondan sti caxi chi ? A gente a no deve savei ? L'è peigoso mettise contra sta casta chi ; Nicky Grauso c'o l'aiva denûnçiòu sto scandalo chi , o ne sa quarcösa . G'han portòu via tûtto , giornali e televixoin . Ansi l'informassion se pêu dî che a ghe dàgghe 'nna man a crovî çerte porcaie . Basta avei visto comme o scinistrorso Secolo XIX o l'ha presentòu e ispessoin a-o tribûnalle de Vareize . Mi che no son giornalista me saieiva  verghêugnòu a scrive 'n articolo coscì , perchè o l'ëa ciæamente scrïto no pe informâ obbiettivamente o lettô , ma söo pe fâ credde çerte cöse dandoghe l''interpretassion che ciû ghe faxeiva còmmodo politicamente . E ûn c'o no saveiva ninte de sta stöia chi o poeiva çertamente credde a quello che o Secolo o l'aiva scrïto . Tanto pe commensâ o Secolo o l'ha tittolòu a notissia comme s'a fuise 'nna vendetta da Lega contra o Giûdiçe Abate . E chi se ghe porrieiva ascì creddighe , za che o sciô Abate o l'è stæto 'n de quelli magistræ meridionalfascisti c'han vosciûo applicâ e lezze do Codiçe Rocco . Ma dappêu o giornalista o s'è afermòu lì , o no l'ha ciû spiegòu ninte : pe lë , e pe i lettoî a-i quæ o doveiva fâlo credde , a motivassion a l'ëa söo a vendetta . E zû a scrive i pareri di òmmi de scinistra , sensa però mette nisciûnn-a spiegassion dä contraparte . Bello esempio de giornaliximo ......... O giornalista in question o s'è ascordòu de scrive che l'ispession in te "tûtto" o Palasso de Giûstiçia e a Procûa de Vareize , e no söo pe l'Abate , a l'ëa commensâ 'n anno primma , e che i ispettoî aivan segnalòu a-o ministeïo 'nna lunga seïe de disfunsoin e irregolaritæ . Dòppo l'ispession dûâ 'n anno , a concluxon di ispettoî , che son di giûdiçi e no son leghisti , a l'è stæta che contra duì magistræ , Abate e Novara , se doveiva portâ avanti 'nna assion disciplinare pë tûtta 'nna serie de mancanse e de erroî . O Secolo o s'è ascordòu de scrive o nomme do Novara , accûsòu de avei fæto de intercettassoin telefoniche sensa ötorizzassion , e de dî che sto magistròu chi , l'Abate , o l'ha , in te 'n tempo de 4 anni , portòu ä prescrission ciû de 190 proçedimenti e portòu a scadensa do termine de indagini preliminari ciû de 2000 proçedimenti . O s'ëa foscia ascordòu de travaggiâ  quello sant'òmmo de l'Abate ????? S'è scoverto che o no l'aiva manco provvedûo ä delega de indagini e manco a esaminâ i fascicoli che g'aivan dæto !!! Pensæ che in to mæximo tempo de 4 anni o l'ëa riûscïo söo a definî 311 rinvïi a giûdiçio , 'nna percentuale ben ben inferiô a quella di ätri magistræ do sò mæximo ûffiçio . Ma cäo giornalista do secolo , se quella do Castelli a fuise söo vendetta perchè ninte ispessoin e punissoin contra o Papalia ??????

< vanni a toua di argomenti >
 
 

PAX€ € ANTIAM€RICANÏXIMO : NO IN TO MÆ NOMME (do perchè mi son paxifico e no paxifista ) do Il Faro Ligure E ä fin a guæra a l'è sc-ciûppâ . A dî a veitæ no ghe voeiva guei a capîlo , visto o grande remescio dë sordatti americhen pe quæxi duì meixi verso o Gorfo .Ma tant'è a spëansa a l'ëa sempre l'ûrtima a möî . L'ûrtima spëansa a l'ëa che Allah o mettesse 'n pò de sâ in to çervello do Saddam e o convinçesse de anâ in exilio , in mòddo da no dâ ciû ätri patimenti a-o sêu pòpolo . E donca a ninte l'è servïo i cortei di "fascio-paxifisti" Casarini e Agnoletto , a ninte l'è servïo d'avei piggiòu a prionæ e sedi de Forsa Italia , de An e da Lega Nord , a ninte l'è servïo d'avei brûxòu e bandëe americann-e e/o israeliann-e . Ma soviatûtto a ninte l'è servïo avei accattòu a 6€ l'ûnn-a e miggiâ de bandëe da destende da-i barcoin . Mi a bandëa da pax€ no l'ò missa e no perchè mi segge a favô da guæra , pe cäitæ , ma perchè sta bandëa a l'à piggiòu , o saieiva mëgio dî gh'àn fæto piggiâ , 'n colore politico e antiamerican . Comme sempre i soliti onnipresenti fascisti de scinistra se son piggiæ l'appalto de "paxifisti" . E me dispiaxe ma mi , da bon paxifista , no posso fâ rappresentâ e mæ idee de pax€ da gente comme Casarini e Agnoletto . Che pax€ me pêu garantî ûn c'o picca polissiotti , c'o gïa co-i estintoî da tïâ a-o primmo carbinê che ghe passa davanti , c'o tegne i cotelli in te stacche , e molotov sotta a giacca ? Dixan che a pax€ a no l'à colore politico , ma a-i cortei paxifisti se veddan söo bandëe rosse o verdi ; provæ 'n pò a anaghe co-e bandëe di partïi de drïta e veddiei che razza de paxifisti e democratiçi son !!!!!!! A sti cortei de pax€ ò visto gente co-e bandëe co-e messuie e martelli e allantoa , ä faccia da pax€ e di massacri americhen , ò sûbito pensòu a-i ottanta mioin de morti do comuniximo .Ò visto bandëe cubann-e e allantoa ò pensòu de bòtto a tûtti quelli pövei cuben streiti in to morscio do regimme castrista e a quelli cuben morti in to tentativo de scappâ da l'ïsoa .Ò visto gente co-a bandëa do Che Guevara assemme a-e bandëe da pax€ : foscia o Agnoletto e o Casarini avieivan dovûo çercâ de spiegâ a-i lö militanti che o Che Guevara o no l'à fæto revolûssoin co-e bandëinn-e , co-i slogan o co-i cortei da pax€ , ma co-a guæra , co-e armi e ammassando a quelli che no a pensavan comme lë , libëando i cuben da 'n regimme pe dâghene 'n ätro foscia pëzo . Devan , da boin comûnisti , monopolizza tûtto , finn-a a pax€ . Ma l'ipocrixia ciû gròssa a l'è che sti paxifisti de l'ûrtima öa , se son adesciæ òua pe sta guæra , ma adormivan finn-a a vëi quande gh'ëan e ghe son ancon anchêu ciû de 50 guære in to mondo . Ma perche in to porto de Zena , i nostri compagni camalli no àn mai pensòu de boicottâ e navi rûscie , za che o Putin o sta guerrezzando co-i ceceni ?  O e navi franseixi pe-i casin ch'àn fæto in Costa D'Avöio ?  A veitæ a l'è che o motivo de tûtto sto remescio chi misso sciû e cavalcòu dä scinistra italiann-a , o l'è da riçercâ in to solito sentimento antiamerican presente da ciû de 55 anni , primma in to PCI òua da-i DS a Rifondassion a-i grûppi da scinistra estraparlamentare . Quello che sta gente chi a no perdonn-a a-i americhen l'è d'aveine liberòu no söo da-o naziximo , ma soviatûtto , arrivando in Italia primma di rûsci , d'aveine liberòu da-o ancon ciû peigoso comûniximo .  Quelle che gh'è stæto pë stradde italiann-e no ëan cortei de pax€ , ma de odio antiamerican . Basta dî che parlando con ûn zoeno c'o g'aiva 4 barcoin con 4 bandëe da pax€ appeize , dòppo che l'ëa commensâ a guæra , sto chi , da perfetto paxifista , o m'à dïto :" Speremmo che i irachen n'ammassen o ciû poscibile !" , dixendo d'ëse contento perchè paiva che a guæra a no fuise breve comme s'aspetavan , ma che l'esercito irachen o poeiva rexiste pe de lungo .  Òua diggo , se ûn o l'è 'n vëo paxifista a primma cösa c'o dovieiva spëâ a l'è che ghe seggian pochi morti e che a guæra a dûe o meno poscibile . Sti chi no , perchè no son paxifisti , ma propio comme ò dïto son antiamerichen . Dappêu no parlemmo da strûmentalizzassion politica : l'Italia a no l'è in guæra , perchè no gh'è l'ötorizzassion de l'ONU , perchè a no l'à mandòu nè sordatti nè mëzi , ma tant'è s'è dïto e s'è fæto che segondo l'ûlivo semmo in guæra . L'art.11 da Costitûssion o gh'ëa ascì in to '99 , quande o D'Alema sensa ötorizzassion de l'ONU o l'aiva fæto bombardâ i pövei "compagni" serbi . A l'epoca ascì a Fransa , che mai in ta sêu stöia a l'è stæta paxifista , a l'ëa pe bombardâ i serbi , ma òua cö Saddam no . No perchè a segge diventâ de bòtto paxifista , ma perchè derrê a gh'à i sêu interesci . De fæti o petrolio o l'è tiòu fêua da compagnie franseixi , a Fransa a l'è o segondo paise fornitô de armi a Saddam . Segondo i dati fornïi da-o "Center for strategic & international studies" , da-o 1973 a-o 1991 i prinçipalli fornitoî de armi a l'Iraq son stæti : RUSCIA FRANSA CINA GERMANIA USA 31.800 mioin de $ 9.240  mioin de $ 5.500  mioin de $ 995  mioin de $ 5  mioin de $ Manco a fâlo apposta i primmi 4 fornitoî de armi a l'Iraq son i coscì dïti "paixi paxifisti" . Se donca no àn parteçipòu ä guæra o motivo o l'ëa ciû che ciæo . Chi g'òu dixeiva dappêu ä lö opinion pûbbrica che i lö sordatti ëan stæti ammassæ da miscili franseixi o ëan sartæ in scë minn-e tedesche ? Òua avendo visto chi son i difensoî da paxe internassionale e chi son e comme son i paxifisti italien co-e bandëe da-i barcoin e i Che Guevara tatuæ in sciö braço , mi , fin che saiò libëo de deçidde , comme l'è ancon poscibile in te l'Italia do Bossi e do Berlusconi e no comme in ta Cuba do Fidel Castro , no vêuggio che sta gente a me rappresente e a parle de pax€ in to mæ nomme ...... E allantoa ò capïo che mi no pòsso ëse paxifista , ma paxifico . T'ou lì chi son quelli che vêuan a vëa paxe : i "paxifiçi" no i paxifisti . < vanni a toua di argomenti >