Emmo visto in Pilloe de Ligûia e föe in sce origini di Ligûi e da çittæ de Zena . In ta realtæ l'è molto ciû credibile che i vëi fondatoî de Zena seggian stæti di Ligûi chinn-æ da-e valli e che i primmi foresti a dêuviâ o so porto natûale seggian stæti di mainæ feniçi e no profughi greçi . Foscia i mæximi mainæ che 'nna votta arrivæ in Corsica , e attrovando ben ben de salinn-e , aivan dæto inizio ä via do sâ verso a Padania e a Svissera lungo a direttrice Besagno Trebbia . Sta ipotexi chie , de 'nna via do sâ tra Ligûia e Svissera porrieiva ëse ascì confortâ dä scimilitûdine tra GENUA e GENAVA , antigo nomme de Ginevra .
Oua ammiemo quante a l'ea grande a Ligûia e da quæ tribû a l'ea formâ . Pe quello che se conosce , in to 6° secolo a.c. , a Ligûia a l'anava da l'Arno a-i Piënei ; ûnna region ben ben vasta , donde i indigeni han piggiou poco ä votta infiltrassoin de elementi foresti . 

Partindo da Est attrovemmo e seguenti tribû :

• APUANI  a Capo Mesco e in ta zona de Levante ; 
• FRINIATES sövia i Apuani , finn-a ä Garfagnann-a ;
• TIGULLI  da Capo Mesco finn-a a Portofin ;
• VELEIATES a nord di Tigulli , in te l'entrotæra ;
• GENUATI da Portofin a-o torrente Leron , tra Aensen e Coghêuo ;
• VITURI a nord di Genuati , insinuæ verso o mâ a Vötri ;
• SABAZI da-o  Leron a-o torrente Pora , vixin a Finâ Ligûe ;
• INGAUNI da-o Pora a-o torrente Impero ;
• INTEMELII a ovest di Ingauni ;
• VEDIANTI , NERUSII, OXYBI , DECIATES , LIGAUNI , ANATELLI a ovest di Intemelii

• STATIELLI , EPANTERI , BAGIENNI , ORATELLI ,
• ECTINI , VELAUNI ,  SUETRI , ALBICI .

• MARICI , LIBICI , LAEVI , LEPONTII , SEDUNI ,
• NANTUATES , VERAGRI , CEUTRONES , SALASSI ,
• MEDULLI , TAURINI , SEGUSSINI , GRALOCELLI ,
• BRIGIANI , SOGIONTII , CAVARES e SALLUVI .

Cosci o Diodoro Siculo , scrittô do primmo secolo a.c. o descriveiva i Ligûi de l'etæ romann-a :
" Passiemo oua a parlâ di Ligûi . Ste gente chi abitan in te 'nna region aspra e sterile , in ta quæ a vitta a l'è dûa , pinn-a de fatighe e patimenti . Defæti za che a lö tæra a l'è pinn-a de monti e coverta de  boschi , quarchedûn de loiatri o taggia tûtto o giorno di grendi tronchi , mentre ätri che fan i agricortoî devan sempre taggiâ de prie , visto che no pêuan mesciâ ûn tocco de tæra sensa attrovâne ...... "
"..... Passan a nêutte in campagna , a votte in recinti o in te de capanne , a votte çercando o cädo de 'nna grotta natûale . A-o mæximo moddo , dêuviando mainëe primitive , fan e ätre cöse da vitta .  Pe dîla in breive , in ti sti paixi chi e donne son ben misse comme fuisan ommi , e i ommi son robûsti e fëi comme e bestie sarvæghe . Pe questo tante votte se arecordan che in te lö guære segge passou che ûn ligûe piccin o segge stæto sfidou ä lotta da ûn guerriero Gallo molto ciû grande  e o ligûe o l'agge ammassou .
Besêugna dî che son fëi e coraggiosi no söo in guæra , ma ascì in te tûtti i caxi da vitta . Navigan pe fâ di commerçi con sardi e libici ,  e scibben g'aggian propio di angæzi de barche no g'han puïa de anâ pe o mâ e de attrovâ de burrasche ."
De segûo in te poule do Diodoro Siculo gh'è da veitæ , ma foscia tûtto o l'è ûn po esagerou , in to tentativo de mostrâ i Ligûi a-i so conçittadin comme gente ligâ a ûn tippo de çiviltæ ben ben ciû primitivo de quella romann-a o greca . E alloa t'ou li che ne presentan di ommi coraggiosi e valorosi , ma barbari e inçivili , ben lunxi da loiätri . 
Ma semmo segûi che i Ligûi fuisan propio di barbari ? De segûo l'è che e tribû di monti e di lêughi isolæ de l'entrotæra se portessan ancon comme i lo messaivi primitivi , ma e tribû che ëan in sciä costa aivan za avûo ûn bon svilûppo : aivan commerçi con ätri popoli ( amê , marmo , legne ) , ëan za di boin agricortoî ( oia , ûga , orzo ) e grassie ä navigassion stavan intrnado in commerçio con popoli nord africhen e do levante . 
A Zena a popolassion a stava crescendo a vista d'êuggio e za stavan pe nasce i primmi magasin pë merçi in arrivo e in partensa . No l'è ûn caxo che o Strabon ( 1° secolo a.c.) o parlava de Zena comme de "Emporio" di Ligûi e za o fæto che o l'existesse ûn emporio a Zena o fava pensâ a ûnna organizzassion soçiale e economica ben avanzâ . 
Ma pe i romani i Ligûi ëan barbari : doveivan creâse ûnna scûsa pe attaccâli , e coscì l'ëa asci logico che dovessan presentâ a-i posteri ûnna immagine poco vëitea do nostro popolo .
< vanni ä toua di argomenti >

Za dûrante a primma guæra pûnica ( 264-261 a.c.) quarche contingente de sordatti Ligûi o l'ëa anæto a combatte pe Cartagine contra e trûppe romann-e . Finïa a guæra , Romma a s'ëa attrovâ besognosa de ciû commerçi e ciû traffiçi . Za a l'ëa in boin rapporti co-a çittæ de Marseggia , ma doppo a conquista da Corscica e da Sardegna oua a l'aiva besêugno ascì de piggià o controllo di porti ligûi . O porto ciû vixin o l'ëa quello de Portus Lunæ .
In to 238 a.c. e legioin romann-e aivan attaccou i ligûi apuani , e l'aivan battûi . Ma i Ligûi no ëan propio coscì dòmi se l'è vëo che annni ciû tardi ( o 234 a.c. e o 233 a.c.) Romma a l'aiva dovûo intervegnî , mandando o Quinto Fabio Mascimo , dïto "Temporeggiatô" .
Oua mentre Romma a controllava a Valle Padann-a e a l'ëa riuscïa a intrâ in contatto con Zena attrraverso a fascia costëa , a Ligûia de Levante a s'attrovava serrâ comme in te 'nna tenaggia . E a-o nasce da nêuva guæra pûnica a Ligûia a se dividde ancon : con Cartagine van i Ligûi de Ponente e de l'appennin orientale , con Romma van Zena , i Taurin e a rivëa de levante .
Quande Annibale o l'ëa introu da-e Alpi , sûbito a çittæ ligûe de Taurasia a l'aiva dovûo arrendîse , Zena invece a l'ëa diventâ a base navale de Cornelio Scipione . 
Se conta che Annibale o segge ascì arrivou in rivëa , passando quarche giorno a San MIchê de Pagann-a . A Rapallo gh'è ancon ûn ponte c'o porta o sò nomme .
Tito Livio , ûn scrittô romano , o conta che in ta battaggia do Ticino Cornelio Scipione o segge stæto salvou grassie a-o sacrifiçio de 'n servo de nassion ligûe . 
Ma i sacrifiçi da gente ligûe ean stæti enormi sovia tûtte in vitte ûmann-e : sordatti ligûi combatteivan e möivan  da 'nna parte e da l'ätra . In to 205 a.c. a çittæ de Cartagine a prêuva a zûgâ l'ûrtima carta ; a fâ arriva in Ligûia o Magon , fræ de Annibale .
A flotta cartagineise a l'arriva de sorpreisa e pe Zena no gh'è ninte da fâ : a vegne completamente destrûta , pagando coscì a sò fedeltæ a Romma . Se dixe che segge propio da sto fæto chi , che segge nasciûo o moddo de dî "Avei o Magon !" .
Foscia in tanti Ligûi no conoscian Cartagine , no san chi l'è stæto Annibale , ma san cöse o l'è stæto pe Zena  o generale Magon , perchè san  che o dô o se ciamma magon .
L'intervento do Magon in Ligûia però o no l'aiva dæto i frûti previsti . E trûppe cartagineixi in poco tempo ëan stæte sconfitte dai romani . In ta battaggia do 202 a.c. a Zama , se conta che Annibale , parlando a-i sordatti ligûi , o g'avesse promisso e cianûe da val padana in cangio di monti ligûi , aspri e difficili da coltivâ . Ma o Scipione o l'aiva guagnou e pêu dâse c'o no l'agge infierïo in sci Ligûi arecordandose de quello servo de nassion ligûe c'o g'aiva salvou a vitta .
< vanni ä toua di argomenti >

Ûnna votta battûa e destrûta Cartagine , Romma a s'ëa missa a fâ i conti con quelli popoli che aivan dæto aggiûtto a-i cartagineixi . Zena , c'a l'ëa stæta completamente destrûta da-o Magon , grassie a l'aggiûtto di Romani e in particolare do pretô Spûio Lucressio , a l'ëa stæta reconstrûïa in quattro e quattrêutto . 
Sann-a , pe contra , a l'aiva da scontâ e so origini cartagineixi e soviatûtto l'ospitalitæ c'a l'aiva dæto a-o fræ de Annibale . A föa in sce origini de Sann-a , contâ da-o cronista Pietro Gara in to 1300 , a dixe che a çittæ , Savo , a saieiva stæta fondâ da ûn capitan cartagineize , Priamar , comme presidio antiroman e comme base navale . 
Priamar , battûo e ammassou da-i romani , o saieiva dappêu stæto vendicou da ûn ätro condottê african , Sago . Sto chi o l'avieiva  reconstrûïo e ampliou a çittæ , dandoghe o sò nomme e faxendo ascì 'nna rocca in sciö mâ . 
I romani pero ëan de nêuvo intræ in ta çittæ e in to forte , ruinandoghe e töri . O Gara o conta che "i romani , savendo che a çittæ a l'ëa stæta reconstrûïa da-i cartagineixi pe fâ ûn despëto a Romma , aivan deciso de ciammâla Sagona , pe dâghe quaxi ûn tòno de dispresso , ûn nomme femminile " 
Romma a no l'aiva sacciûo mai perdonâ a Sann-a de avei dæto aggiûtti a-o Magon e pe questo , pe tanti e tanti secoli , a l'ëa arestâ ascosa e fêua da-i gïi romani .
I Ingauni invece ëan riûscïi a stabilî con Romma ûn"foedus" . Grassie a quest'opëa de diplomassia ste popolassoin do ponente Ligûe no ëan stæta attaccæ da Romma . 
< vanni ä toua di argomenti >

A l'è 'nna stöia de tanto tempo fa , ma pe-a sò attualitæ a và ancon a penn-a de contâla . L'ëa o 218 a.c. e con a vegnûa de Annibale quæxi tûtte e tribû ligûi e çeltiche s'ëan ûnïe con lë , pe poei liberâse dä reçente e sanguinäia opprescion romann-a e pe portâ a guæra in câ di nemixi . Za chi se pêu vedde o primmo importante elemento de tûtta sta vicenda : quello "quæxi" o ne fà capî che no gh'ëa ûnitæ in ti nostri poæ : i Cenomani , o popolo veneto , e quarche ätra tribû s'ëan ciammæ fêua . E tûtti savemmo come a l'è anæta a finî : i Romani han profittou dë divixoin di alleati e , 'nna votta fæti fêua Annibali e i Cartagineixi , se son ripresentæ con ciû raggia a-e porte dë çittæ ligûi . I Ligûi però no s'arrendan e insemme a-i Boi , a-i Insubri e , doppo tante inçertesse , ascì a-i Cenomani , riescian a difendise e a contrattaccâ . A cappo di nostri gh'è ûn zoeno generale cartagineize , Amilcare , c'o l'aiva refûou de consegnâse a-i Romani  e o l'aiva deciso de combatte insemme a-i sò compagni ciû fedeli . O l'aiva taggiou i ponti co-a sò tæra , dedicandose ä causa da libertæ di popoli do Nord . Ä nostra gente o gh'ëa ligou da lunghi anni de guæra contra i maxellæ de Romma , ma ascì da legammi identitäi : i Ligûi defæti  ëan streitamente ligæ da parentela co-e popolascioin da sò tæra .
Amilcare o guidda l'attacco contra a çittæ romann-a de Piaxensa , c'a vegne piggiâ , e contra Cremonn-a , dove vegnan respinti .
Paieiva che in te sta battaggia o seggie stæto ammassou , ma o sò nomme o l'è presente ascì in te battaggie de anni doppo . A sò figûa a diventa ûn mito , a sò immagine a mette puïa a-i nemixi .
Amilcare o diventa coscì o simbolo de l'amô pe-a libertæ e do spirito de resistensa di nostri popoli . A macchina da guæra romann-a però , ä fin , a vinçe in sciö disperou eroismo di çelto-ligûi . Ascì chi Romma a vinçe grassie a-e divixoin : i Cenomani lascian a coaliscion do Nord e van a-o fianco di Romani . In to gïo de dexe anni , anni de massacri e violense , a cianûa padann-a a vegne sottomissa . 
E cause da sconfitta son sempre e mæxime :
1) a divixon de nostre tribû
2) avei creddûo a-e offerte di romani .
I Cenomani , che aivan tradïo i Ligûi , saian disarmæ in to 187 a.c. da-i lö nêuvi alleati e insemme a-i Veneti , da sempre alleati de Romma , saian trattæ comme i Galli , và a dî sensa quarsevêuggia autonomia , tanto che a Padova in to 174 ghe saià 'nna rivolta asmortâ in to sangue .
Cenomani e Veneti aivan creddûo a-e offerte de Romma e aivan misso a difeisa da lö libertæ in te man de rappresentanti nesci e corrotti che s'ëan fæti infenoggiâ da-e promisse e da l'öu .
Ascì oua , in ti momenti ciû diffiçili pe-a libertæ de'n popolo vegnan fêua i diäi da divixon e rappresentanti abbelinæ , opportûnisti do tradimento e do compromisso . Speremmo che ascì a-i nostri giorni sarte sciû 'n ätro Amilcare , c'o segge bon a dâne ancon quella coæ de no avei ciû nì bacchen nì alleati traditöî e de lottâ pe-a libertæ .
Pe 'nna Ligûia veamente Libëa e Indipendente !
< vanni ä toua di argomenti >

3 anni doppo a sconfitta de Piaxensa , Romma a deçidde de fâla pagâ cäa a-i Ligûi . 
In poco tempo Q. Minucio Rufo o conquista Piaxensa e o costrinze çirca 20000 ommi a arrendise . I Ligûi Apuani però no se fan piggià de sorpreisa e impegnan in to lö territöio Romma , in te ûnn-a de ciû eroiche e impari lotte che a stöia a posse recordâ . Pe rendise conto de l'eroismo do popolo apuan bastieiva lëze quello che o Tito Livio o l'aiva scrïto : 
" I Ligûi ëan ûn nemigo fæto apposta pe temprâ i sordatti romani ä disciplinn-a militare , tra 'nna guæra e l'ätra . Nisciûnn'ätra provinsa a serviva pe poei stimolâ e virtû do sordatto . In Asia o splendô dë çittæ , a debolessa do nemigo , e a ricchessa de quelle tære , faxeivan o sordatto ciû ricco che forte .......In Ligûia pe contra , gh'ëa tûtto quello che poeiva servî pe rinvigorî i eserciti : territöi aspri e montagnosi , che i Ligûi occupavan ascì loiätri con difficultæ , e che ëan diffiçiliscimi da conquistâ quande ëan za occûpæ ; stradde e sentëi ripidi e peigosi adatti a-e imboscæ ; o nemigo agile e veloxe c'o no dava 'n momento de tregua ; o paise poveo , c'o l'abituava o sordatto ä parscimonia , e c'o no dava nisciûn bottin de guæra . No gh'ëan servitöi , e manco de mû . Söo armi e ommi che in te armi doveivan mette a lö vitta ."
Pe corpa de sconfitte , i Apuani ëan stæti costreiti a çercâ scampo drento a-e valli do Magra e do Sercio , lasciando e coste in te man di Romani . Ma in to 193 a.c. i Ligûi chinn-an in rivëa e mettan Pisa sotta assedio . I romani con tanta fatiga e con l'agiûtto de nêuve legioin arrivæ da Romma riescian in te 'nna battaggia a ammassâ 9000 ligûi .
In to 188 a.c. Romma a no l'è ancon riuscïa a dâ 'nna lession a-i montanäi apuani , scibben che sti chi fuisan in inferioritæ nûmerica . Söo in to 180 a.c. Romma a porta l'attacco decixivo : 12000 ligûi s'arrendan e devan sottostâ a de  condissoin tremende ; trasferimento de tûtta a popolassion . 40000 famigge devan lasciâ a lö tæra , e lö case , i lö campi pe razzunze o Sannio , in te 'nna localitæ vixin a Benevento . Ciû tardi ätre 7000 famigge , scampæ ä primma retâ , vegnan deportæ in to meridion . 47000 famigge , ommi , donne , figgêu sradicæ dä lö tæra , derixi da-i sordatti nemixi , anavan verso 'nna sorte ignota . Ûn lugno corteo de gente disperâ , ëan e primme vittime da puliçia etnica , che in futûo a l'avia in Hitler e Stalin i sò ciû famosi rappresentanti . I romani donca no son stæti ätro che i meistri de coscì tanti boin allievi . 
Pe ripopolâ e valli do Magra e do Sercio , Romma a l'aiva provvedûo a fondâ a colonia de Luca ( anchêu Lucca ) e ciû tardi quela de Luni . In te l' Appennin orientale ghe restava ancon quarche famiggia de apuani tanto che in to 155 a.c. aivan tentou pe l'ûrtima votta 'nna ribellion , domâ da Claudio Marcello .
< vanni ä toua di argomenti >

A ponente Romma a g'aiva problemi co-e popolassoin ligûi di ingauni . In to 189 a.c. gh'ëan stæte vixin a Finâ väie battaggie con sorti alterne , finn-a che , dòppo 'n tradimento da parolla da parte di prinçipi ligûi , i Romani ëan riûscïi a fâ 2500 prexonnê e ammassa 15 milla sordatti ligûi . 
I Ingauni s'ëan coscì dovûi arrendise , cacciâ zû e miage da lö çittæ , Album Ingaunum , e i sò prinçipi ëan dovûi sfilâ a Romma , ligæ derrê a-o cäro do trionfatô . 
Ma in te sta stöia chi  ghe deve ëse quarcösa che i storiçi romani no n'han contòu , perchè no se capisce a generoxitæ co-a quæ i Ingauni son stæti trattæ a differensa pe esempio di Apuen che in ti mæximi anni vegnivan deportæ . I Ingauni doveivan söo pagâ de tasce e de ciû ëan riûscïi a convinse i Romani a agiûttâli a combatte a tribû di Epanteri , vëgi nemixi da pòpolassion da rivëa fin da-i tempi do Magon . 
Ûnna votta eliminæ i problemi do levante ( Apuen ) e do ponente ( Ingauni ) , Romma a l'aiva posciûo dedicâse con ciû intensitæ a combatte a pòpolassoin ligûi do Basso PIemonte e de l'Appennin Ligûe-Emilian . 
< vanni ä toua di argomenti >