Cultûa grande in te 'n paise piccin . O paise o l'è Peagna , in scï monti sovia Albenga e Ceriale , in provinçia de Savonn-a . A cultûa a l'è quella  portâ comme tûtti i anni , da vint'anni a oua , dä rassegna "Libri di Liguria " , organizzâ da-i Amixi de Peagna e anchêu consciderâ comme a mëgio mostra de libbri a tematica regionale e locale , asci visto a grande quantitæ de ospiti illûstri presenti in te serate . 
A fin de agosto , asci quest'anno chi , pe 'nna settemann-a  a Peagna s'è söo parlou de stöia , de çiviltæ , de letteatûa e de tradissoin ligûi , co-a poscibilitæ de dâ 'n aggueito a tantiscimi libbri sciortïi in ti ûrtimi vint'anni in te questo argomento chi . O vintennale da manifestassion o l'è stæto averto da-o professô Francesco Gallea , amante e cultô de letteatûa ligûe , c'o l'ha illûstrou a tematica de questo anno chi ; o l'è stæto mandou a tanti doçenti de Ûniversitæ de tûtta Europa o romanzo do ligûe Giovanni Boine " Il peccato " con l' invitto a fâne ûnn' analixi . 
Eive chi ûnna mainea de fâ conosce a letteatûa contemporanea , matûrâ in ta nostra region , propio mentre sta pe sciortî ûn travaggio comme quello de Federica Merlanti , " Genova tra le righe " , dove a spiega a forma e o stile dêuviou da scrittoî ligûi de l' ottoçento e do noveçento pe trattâ a çittæ da Lanterna . De fæti o porto e i caruggi , ûn tempo , ean conscideræ di ambienti ideali pe di romanzi . O prof.Gallea o l'ha spiegou che in Ligûia o 60% di prodotti librari no passan pe librerie , che preferiscian mette in mostra i bestsellers mondiali . Coscì passa che a gente a no pêu conosce quelli che son i prodotti da cultûa locale , pensando che oramai a segge cösa da antiquäi e da vëgi romantici . L' editoria ligûa a-o conträio a l'è ricchiscima e vitale , e o se pêu vedde da o nûmmero e da ricchessa de contegnûi di libbri presenti in ta rassegna de Peagna . 
A novitæ de quest'anno chi a l'è stæta " Peagna , nel segno di Anthia " , 370 paggine co-e poule de tanti stûdiosi ligûi che in te questi vint'anni son intervergnûi ä rassegna , ciû quarche stûddio in sciö paise de Peagna c'o rappresenta ancon anchêu comme se possa fâ ûnn'ottima cultûa locale .
In te questa rassegna chi l'ea poscibile attrovâ a Peagna ogni ben do Segnô : da " la Liguria di ieri e di oggi " , a " La via del sale " , " Gli antichi Liguri del Golfo della Spezia " , " Delle magie e dei miti , l'arte contemporanea  in Liguria " ,  " Liguria amore mio " . In sciä çittæ de Zena gh'ea 'nna quantitæ de libbri : da " L'identita nascosta . Genova nella cultura del secondo novecento " di Enrico Baiardo a "Recitare in Liguria , atti del convegno sul teatro in dialetto tenuto a Chiavari nell'autunno del '99" a cura della Consulta Ligure , i bei volûmmida "Letteratura in genovese " do Fiorenzo Toso , , vocaboläi väi e o " Ma se ghe penso " di Luca Garibaldi in scï cantaötoî da Lanterna.
Ûnna rassegna che o proscimo anno va a penn-a de no perdîse . Grassie Peagna .