MONDO INDIPENDENTISTA

 

MOVIMENTI INDIPENDENTISTI IN GÏO PE-O MONDO

"Ä fin a l'è anæta ben ..." . E o dixe sensa tante äie .
" Perchè quella nêutte tra l'8 e o 9 de mazzo do 1997 , mentre stavimo libëando o Campanin de San Marco a Veneçia , saveivimo che a nostra miscion a l'avieiva avûo due söe poscibilitæ de sciortïa : o piggiâ 'nna pallottola in ta testa o fâse quarche anno de prexon " .
Fausto Faccia òua de anni o ghe n'ha 35 e i ûrtimi o l'ha passæ in galëa e a-i servissi sociali . O l'ëa lë a cappo do commando di Sereniscimi , l'ommo c'o l'aveiva o sc-ciêuppo càrego ("E ringrassio o Segnô de no avei sparou , scibben ghe fuise stæto 'n momento che o stavo pe fâ : in äia , söo in äia , ma chi o sà cöse saieiva passou") .
Anchêu o l'è libëo , i sò puffi co-a giûstissia o l'ha pagæ . Oua , di dozze Sereniscimi condannæ pe-a liberassion do Campanin , söo o Segato e o fræ do Faccia devan ancon scontâ quarche meise , sempre co-i servissi sociali .
"Pentïo ? E comme porrieiva ?". Gh'è 'n lampo d'orghêuggio in ti êuggi de st'ommo chi dä voxe mite , assettou in salotto , jeans e maggion , mentre che a primma nëgia a l'inghêugge a villetta de famiggia , a Agna , 4 milla anime in to Basso Padovan  .
"Son fëo se m'appenso che quella nêutte  semmo riûscïi a piggiâ ûn tòcchetto de tæra ä sovranitæ do Stato italian . E a no l'ëa ûnna tæra quarsevêuggia , ma o scimbolo de Veneçia : a l'è comme se , grassie a noiätri scibben söo pe êutto öe , a fuise resûscitâ a Repûbbrica de San Marco , a gloria di Dogi . Emmo dimostrou che existan ancon di Veneti che no se rassegnan a ëse vêuæ de tûtto : identitæ religiosa , storica , cultûale e territoriale ..... O spirito c'o n'ha portou in sciö Campanin o l'è o mæximo c'o l'animava i indien d'america : amô pe-a nostra tæra e  'n sentimento de frûstrassion pe l'omogeneizzassion c'a l'avansa "
Ma o sà , Faccia , che tanti ve veddan comme de invasæ ?
" Segûo , no poendo dâne di terroristi , ne tïan sövia a figûa do redicolo, çercando de fâne passâ pe-i soliti veneti imbriegoin e 'n tantin deficienti "
Ma l'è o faieiva ancon l'assalto?
" Oua no saieiva ciû in graddo de poei affrontâ da-o punto de vista economico e psicologico ûnn'impreisa scimile . E dappêu i tempi son cangiæ , oua o l'è o momento de parolle "
O pensa c'a segge ingiûsta a condanna ?
"No , noiätri saveivimo de anâ incontro a de bæghe , o Stato o no poeiva che difendise"
Cöse l'è che quella nêutte o no rifaieiva ?
"L'errô prinçipalle l'ëa stæto quello de sequestrâ o traghetto . Ma no g'aveivimo i scûi pe poei mette sciû 'nna barca , s'eivimo za mangiæ tûtto . E dappêu , 'nna votta montæ in sciö Campanin , a speransa a l'ëa de rexiste de ciû ....."
Ghe son stæti di momenti de puïa ?
"N'arecordo duì . Sûbito partïi da-o Padovan , emmo rischiou de finî in te 'n canale cö camion , dove aivimo càregou o blindou da 150 quintæ . Doppo m'arecordo che anando verso Veneçia gh'ëan momenti che speravo c'o camion o se rompisse : quæxi 'nna scûsa pe tornâsene a câ"
O vostro fin o l'ëa l'indipendensa do Veneto . E oua ?
"Se pe indipendensa s'intende avei 'n parlamentin regionale e quarche strassetto de ötonomia , a no me interessa . Quello che se deve recûperâ o l'è o spirito e i valoî da Repûbbrica Veneta , natûalmente vista co-i êuggi de anchêu ."
A Lega Nord a l'ëa in quelli anni lì secescionista : quante o l'ha inflûïo o Bossi in sciä vostra assion ?
"Ninte . I nostri contatti co-a Lega Nord s'ëan rotti a-o tempo da Liga Veneta do Rocchetta . Noiätri e Bossi semmo lunxi"
Comme v'han açettou in prexon ?
"A Modena doveivo gïâ co-a scorta za che tanti detegnûi meridionali , credendo a nostra assion antisûddista , aivan creou attorno a mi 'n climma pesante . Doppo però han capïo ..."

O goerno belga o sta çercando , in to silençio di media europpei , de cancellâ pe via giûdiçiäia o Vlaams Blok . In ti proscimi giorni s'arvià a Bruxelles o processo d'appello c'o domanda de serrâ o movimento fiammingo c'o l'ha a söo corpa de lottâ contra a societæ multirassiale e contra l'immigrassion clandestinn-a . Ascì in Belgio donca s'attrovemmo davanti a 'n processo contra e idee di çittadin e contra a libertæ de associassion e de esprescion . O prinçipale accusatô in ta parte çivile do Vlaams Blok a l'è in ti fæti o "Çentro pe-a legalitæ e lòtta a-o rassismo " , 'nna associassion c'a depende direttamente da-o goerno e finasiâ da-o Stato Belga con ciû de 11 milioni de Euro ogni anno . In ta realtæ a l'è ûn vëo e propio Grande Fræ incaricou da-o goerno de çercâ e perseguitâ tûtte e idee politicamente scorrette . O Vlaams Blok o rappresenta ûn di partïi d'oppozission ciû dinamici in te Fiandre , e o g'ha çirca o 15% di voti in Belgio . Solidarietæ doppo Batasuna acì a-o Vlaams Blok !!!