Chissa se a Söi san che o lö paise , c'o l'ha avûo rapporti co-a  Spagna pe avei dæto i natali a-i avi do Picasso , con l'Inghiltæra pe avei dæto ospitalitæ a tanti ingleixi , o l'ha avûo ascì legammi ben ben profondi co-a Rûscia ?
No creddo che o saccian in tanti . 
E allöa và a penn-a de mettîse in scë tracce do scrittô rûscio , Michail Osorgin (1878-1942) che dä zïâ Rûscia o l'ea arrivou a-o paise de Söi a çercâ rifûggio , perchè perseguitou dä poliscia zarista doppo che o l'aiva piggiou parte ä rivolussion do 1905 . O l'aiva deçiso dunca de fermâse a Söi comme primma tappa do so esilio italian .
Segondo äte riçerche fæte da slavisti , se saveiva che o scrittô ,  insemme a ätri esuli , o l'ea stæto a Söi da-o 1906 finn-a a-o 1908 , e intorno a lë s'ea formou a primma colonia rûscia da Rivëa Ligûe . Quello che ancon no se saveiva l'ea dove Osorgin o l'avesse soggiornou . Osorgin o l'ea 'n avvocato , membro do Partïo socialrivolussionäio . Doppo c'o l'ea stæto arrestou e rilasciou 6 meixi doppo , o l'ea scappou primma in Finlandia e dappêu in Italia , dove o l'aiva travaggiou comme giornalista . Comme emmo dïto l'identificassion da Villa dove sti rûsci aivan soggiornou a l'ea ancon ignota , ma a riçerca a l'è commensâ ascì in base a-i scrïti e a-e lettïe do scrittô . L' impreisa a no l'è stæta çerto façile , ascì perchè Osorgin o s'ea fermou a Söi söo ûn pâ d'anni . O poco tempo e o lêugo ûn po deçentrou da Villa han fæto sci che manco i ciû ançien aggian conservou in to lö memöia ûn piccin recordo do scrittô rûscio .
Allöa preçiose son e descrissoin dche Osorgin o fà sövia tûtto do giardin , dove o l'elenca tûtte e piante : fighi , çetroin , limoin , perseghi , bricoccale , nespöe , çexe , mei , pei , çipressi , oivi , öfêuggio ,  parme ........ Tra tûtti sti erboi chie son stæti i çipressi a limitâ a zona de indagine , za che se trêuvan söo in ta region da Contra , dove l'è sitûâ a Villa . 
L'è commensou coscì e vixite de esperti pe conosce mëgio i dentorni söexi e i mæximi abitanti . Ascì e vixite in ti archivi  e in ti enti  son servïi pe trovâ l'atto notarile c'o çertificava a posission de Villa Maria , do tûtto sconosciûa in to paise . Doppo l'è bastou rifâ o percorso de l'Aurelia , comme o l'aiva fæto l'allöa scrittô rûscio , da Recco verso Zena " doppo ëse passæ vixin a 'nna villa con 'nna torretta merlâ , a ûnna serie de villette constrûie ciû tardi , vixin a di spendidi srtapiombi in sciö mâ , l'edifiçio o spunta de colpo " e o corresponde a-o nûmmero 32 de Via Crispi .
Oua a villa a se presenta tinta de rosso , mentre ûn tempo  a l'ea gianca . O giardin de allöa , tipicamente ligûe , o no l'existe ciû , disseminou de tante villette . 
Se Söi o s'ea ascordou pe 'n çerto tempo do so illustre figgio adottivo , coscì no se pêu dî de Osorgin , cha mai o l'ha ascordou i so anni söeixi : a prêuva son quelli continui riferimenti e çitassoin che se pêuan attrovâ in ti so opëe e sövia tûtto in to libbro " Passi , passaggi , passioni " dove gh'è o racconto "La vecchia villa " dedicou pe intëo ä Villa Maria de Söi . In te questo libbro i microcosmi ligûe e rûsci pe 'n attimo se mesc-cian ; ûn omaggio a Söi e a-i söeixi .

Brano di
Lucia Bonello Galatioto
pubblicato sul"Notiziario di Sori"
liberamente tradotto da il faro ligure 

A "Villa Maria " a Söi , dïta Villa di Rûsci

---