IGÛE
QUANDE IN PERÛ SE PARLAVA LIGÛE
IGÛE
QUANDE IN PERÛ SE PARLAVA LIGÛE
| In tûtti i paixi de l'America do Sûd che son stæti de colonie spagnolle gh'è sempre stæta 'nna forte presenza italiann-a e zeneize , za a partî da-o secolo XVI . Sto fæto chi o l'ëa dovûo a-o motivo che tanti stati italien g'aivan 'nna streita alleansa co-a Spagna , tippo a Repûbbrica de Zena , mentre ätri stati gïavan in te l'orbita da famiggia reale spagnolla , comme o Regno de Napoli ò o Dûcato de Milan . A quelli tempi i zeneixi ëan i ciû rappresentæ in Spagna , soviatûtto in ti porti de Cadiçe e Seviggia , donde commercianti e mainæ zeneixi poeivan gödî de permessi speçiali . Da sti porti chi dappêu i zeneixi se imbarcavan verso e colònie dë Americhe . A primma emigrassion a no l'ëa stæta donca 'nna emigrassion diretta , ma indiretta . Saieiva a dî che ëan personn-e che emigravan primma in Spagna , pe dòppo passâ a-e colonie spagnolle . Scibben a fuise 'nna presensa ridêutta ( poche çentanâ de personn-e) , comunque a colonia zeneize a l'ëa a ciû numerosa in sûd america fra quelle europpee (fæta eccession pe-i spagnolli ) . Questo perchè i spagnolli no permetteivan 'nna libëa emigrassion in te lö tære americann-e , ma i zeneixi ëan ben tolleræ . Ansi , gh'è da dî che in to secolo XVI tanti mainæ e commercianti faxeivan parte de l'Armâ Spagnolla . |
Casa de chucuito |
| De fæti no besêugna
ascordâse che tra i primmi conquistatoî gh'ëa o
nobile zeneize Gian Battista Pastene , c'o l'aiva combattûo in Perû
(1545-1548) pe dòppo passâ in Cille donde o l'ëa stæto
tra i fondatoî dë çittæ de Valparaiso e Santiago
. Tanti ätri mainæ e capiten de navi zeneixi vegnivan reclûtæ
dä Spagna vista a scarscitæ che aivan de capiten esperti .
Ciû avanti , in ti secoli XVII e XVIII , vegniva levòu o blòcco de emigranti no spagnolli , coscì che ëan posciûi intrâ ben ben de italien , che pe-o ciû clandestin , cangiavan o lö nomme spagnollizandolo . Dä segonda meitæ do secolo XVIII , con a montâ di Borboin ä coronn-a spagnolla , a presenza zeneize in Perû a l'ëa diventâ ciû nûmerosa , za che stava anando in declin o monopòlio commerciale spagnollo co-e colonie d'America . I commercianti zeneixi n'aivan profittòu , öumentando a lö presensa in ti porti do Paxifico meridionale . In fin se pêu dî che a presensa italiann-a in ti secoli XVI-XVII a l'ëa stæta indiretta , ma a l'ëa servïa pe i arrivi sûccescivi . De segûo se pêu dî che in ta presensa coloniale italiann.a in Perû gh'è stæta 'nna "matrice coloniale" contraddistinta da l'origine regionale , c'a l'ëa soviatûtto ligûe , e da-e caratteristeghe do travaggio , za che sti emigranti chi ëan soviatûtto mainæ e commercianti . Ä fin do XVIII secolo o monopòlio commerciale spagnollo o s'ëa sempre ciû indebolïo , e sto fæto chi l'aiva reciammòu a presensa de commercianti e mainæ de quella che a l'epoca a l'ëa ancon a Repûbbrica de Zena . De ciû l'invaxon napoleonica a l'aiva favorïo l'emigrassion de profughi politiçi , ma soviatûtto de commercianti che sciortivan da-o lö paize pe-a crixi economica prodûta da l'invaxon franseize . O 1821 o l'è 'n anno importante pe-o Perû : con l'indipendensa öumenta l'immigrassion italiann-a , che da sto momento chi a no saià ciû indiretta , ma òua a l'arrivià direttamente da-o porto de Zena . E quelli che arrivavan vegnivan piggiæ a travaggiâ da quelli che gh'ëan zà . Ma gh'è ascì da dî che tanti emigræ arrivæ in to '900 ëan mainæ che disertavan da-e navi che arrivavan da-o porto de Zena . O ciû grande nûmmero de immigræ in Perû o l'ëa stæto tra o 1840 e o 1880 , soviatûtto da-e region nordoçidentali italiann-e , l'allöa Regno de Sardegna , dä Ligûia in particolare . E sta gente chi , arrivâ in te sto nêuvo paize do sûdamerica , a s'arviva 'n negoçio piccin o a continuava a fâ o mainâ . I mainæ disertoî ëan tanti , zà che attrovavan in Perû de boin motivi pe fâlo : e condissoin de travaggio ëan favorevoli visto che l''economia perûann-a a l'ëa in te 'nna fase de espascion mercantile . E attivitæ pòrtuali e commerciali se stavan svilûppando grassie ascì a-o sfrûtamento do "guano" , lungo e ïsoe do litorale . Se primma l'arrivava in Perû soviatûtto mainæ , in particolare da-e zone de Ciavai , da-o 1850 in avanti arrivan ascì i contadin , i paisen , da-e zone interne da Ligûia ; a lö partensa dä Ligûia a l'ëa dovûa ä crixi economica . E sta gente chi a l'anava in Perû pe costitûi a classe sociale ciû bassa, zà che attrovavan travaggio in të attivitæ ciû ûmili (garzoin , besagnin , bûttegâ ....) . L'emigrassion italiann-a in Perû a no l'aiva mai toccòu i valori de l'emigrassion in ti paixi do versante atlantico pe väi motivi . Primmo pe-a lontanansa dë rotte do Paxifico , zà che Streito de Panamà o no gh'ëa ancon, e dappêu perchè in Perû no gh'ëan grendi estenscioin de tære comme in Argentinn-a o in to Braxî . In Perû a poca tæra disponibile a l'ëa da pòpolassion indigena , che a s'òffriva ascì comme manodopëa pe-i latifondi . In ciû l'origine regionale di immigræ italie (genuensis ergo mercator) , a l'aiva condissionòu l'economia perûann-a , dandoghe 'n ruòlo mercantî e commerciale . De ciû assemme ä grande maggioransa de agricortoî , de garçoin e de commercianti commensava a formâse 'nna classe dirigensiale . Tanti capiten de mâ diventavan pòco a vòtta capiten de impreiza . Tra i ciû famosi s'arecordemmo do Giöxe Canevaro(1803-1875) che da capitan de mâ o l'aiva fæto grande fortûnn-a cö commercio marittimo , designòu Console do Regno de Sardegna e dappêu primmo console do Regno D'Italia . Sêu figgio Napoleon (1838-1926) o l'ëa anæto a stûddiâ in Italia , dove o l'aiva fæto 'nna bonn-a carriera arrivando a-o graddo de ministro . Ma in te sto periodo chi gh'ëan di ätri grendi imprenditoî ligûi : Denegri , Larco , Figari e Basso . Gh'è da dî che in genere tûtti i ligûi arrivæ in te sti anni chi da-o 1800 a-o 1880 aivan commensòu a montâ verso sitûassoin econòmiche ciû erte . Da bûttegæ a commercianti a l'ingroscio , pe arrivâ finarmente investî in tære e in immobili . I nommi dë impreize n'arecordan foscia quarcösa : Cogorno e Nicolini in te l'indûstria alimentare , Queirolo in te quella do vin ecc..ecc... Ascì chi in Perû i zeneixi aivan portòu l'insegnamento a-o risparmio . Mentre in ta societæ perûann-a dominava o consûmmo e o sperpero ereditòu da-i spagnolli , i zeneixi ëan impegnæ in to travaggio e in to risparmio , fâ i dinæ pe poei 'n giorno ritornâ in Ligûia . Grassie a-o travaggio e a-o risparmio i imprenditoî ligûi pe primmi aivan costitûio a borghexïa moderna do Perû , no söo pe-o stile de vitta ma soviatûtto pë idee che g'aivan . In ti emigranti ligûi , di quæ tanti ëan profughi politiçi o esuli da-e guære de indipendensa , dominava l'ideòlogia do nassionaliximo risorgimentale . Dòppo i casin do 1848 in Italia , ëan arrivæ ätri esûli : tra sti chi s'arecordemmo do mëgo de Ciavai Manueo Solari (1808-1854) , cuxin do Giöxe Massin , c'o l'ëa arrivòu a Limma pe insegnâ ä Facoltæ de Mëxinn-a . Tra l'ätro o s'ëa dedicòu ascì ä politica arvendo 'nn session da "Giovine Italia" e agiûttando o Garibaldi quande o l'ëa arrivòu in to 1851 pe-o sêu segondo exilio in America . L'è stæto in te sti anni chi che o Garibaldi o travaggia pe 'n commerciante ligûe , o Denegri , comme capitan de nave in te de spedissoin commerciali verso a Cinn-a . L'è pe ste cöse chi che o Garibaldi o vegne accûsòu de ëse stæto 'n "scafista" : avei portòu sc-ciavi da l'asia in Perû pe chêugge o guano . Da-o 1880 l'emigrassion di ligûi verso o Perû a diminuisce de bòtto : a crixi econòmica do paize e a guæra , persa , di anni dòppo contra o Cille , aivan portòu o paize a 'n tracollo dë attivitæ commerciali . I pòchi emigræ ëan ciammæ da-e cadenn-e familiari , za che no existeivan in Perû e condissoi pe poei reciammâ grendi flûsci migratöi scibben l'ëa o periodo de mascima emigrassion da l'Italia . In pratica se pêu dî che intravan in Perû söo quelli che ëan in graddo de diventâ imprenditoî in breive tempo . O Perû o l'è ûn di pòchi caxi a-o mondo dove l'emigrassion italiann-a a l'ëa composta in maggioransa da emigræ de 'nna mæxima region d'Italia ; o ruolo che àn esercitòu in te l'ecònomia perûann-a o l'è stæto quello de imprenditoî indipendenti . Pe sto motivo chi a collettivitæ italiann-a in Perû a l'è stæta ûnn-a dë ciû ricche de tûtto o Sûd-America . Ascì grassie a-o fenòmeno de l'immigrassion pe "ciammâ" familiare l'aiva permisso che no ghe fuise mai disoccûpassion tra i ligûi . L'è in to perido 1880-1920 che commensan a nasce dë istitûssoin tra i immigræ italien : a primma a l'ëa stæta a Societæ Italiann-a de Beneficensa , segûïa da-e Compagnie di Pompê . A primma Compagnia di Pompê a l'ëa nasciûa in to 1866 dòppo i incendi do pòrto do Callao , quande gh'ëa stæto 'nna battaggia tra i mainæ perûen e 'n pò de navi spagnolle arrivæ in pòrto pe 'nna miscion pûnitiva . |
| Çertamente
l'è ascì ciæo che no tûtti i italien arrivæ
in Perû àn avûo a mæxima fortûnn-a . A sociòloga
Julia Alfaro Vallejos in te 'nna sêu riçerca ancon da conclûdde
. a l'à demostròu che i pescoei de Chucuito , in te 'nna
gran parte Zeneixi e Sicilien , no ëan riûscïi a prosperâ
econòmicamente , limitandose a fâ parte dë classi popolari
.
Sti pescoei chi ëan emigræ in Perû in duì momenti despægi : in to 1905 ëan arrivæ i sicilien ( Ciccirello , Larosa , Motta , Macunco , Alibrandi ....) , dòppo tra o 1914 e o 1921 i zeneixi ( Musso , Bisso ....) . Tûtta sta gente a s'ëa stabilïa in te 'n tòcco de tæra conosciûo comme Piti-piti ("menn-a pe cûxî") , in ta zona de Chucuito do Callao , 'n pòsto ancon òua caratterizzòu pe ospitâ gente pövia c'a travaggia in mâ . De fæti Chucuito fina da-o XVIII secolo o l'ëa 'n paize de pescoei , pe-a precixon o pòpolo originäio o l'ëa quello di Collas . Ûnna vòtta arrivæ in te ste còste chi , za che no gh'ëan guei pescoei locali , no g'aivan misso tanto a piggiâ in man e redini da pesca da zona . I pescoei italien aivan però avûo ascì a generositæ de condividde co-i pescoei locali quarche segreto da pesca : g'aivan insegnòu pe esempio a cûxî e ræ e i segreti in scë caratteristeghe dë ræ . De fæti e i sicilien e i zeneixi aivan portòu in Perû i lö tippi de ræ (palamito , lampara ) e de pesca , coscì comme aivan commensòu a fâ e barche e i gossi segondo e caratteristeghe italiann-e , ma adattæ a-o nêuvo tippo de mâ . I zeneixi s'ëan coscì specializzæ in ta pesca de 'n tippo de pescio , in perûan o "pejerrey" . I pescoei ligûi in Perû aivan sacciûo tegnî o tippo de vitta italiann-a grassie ascì a-o dialetto , ä mûxica , a-e tradissoin religiose ..... Elementi c'àn fæto do quartê de Chucuito no söo 'nna zona de pescoei , ma 'n canto de Ligûia in Perû . E case son fæte in stile zeneize , e o l'è diventòu ascì 'nna menn-a famosa pe poei fâ i bagni in te sêu ægue ziæ . Anchêu o 90% di Ligûi in Perû o vive in ta çittæ de Limma , scibben oramai l'è dä fin da segonda guæra mondiale che no gh'è ciû immigrassion . |
|
|
www.callao.org
: o rion dove s'ëan stabilïi i primmi ligûi
|