O Caton o l'à scrïto ûnna votta in scï Ligûri :" Son tanto äxi , che no san manco e sò origini !". Vediemo coscì in ti proscimi capitoli e legende ma ascì e föe che parlan da nostra region . L' è segûo che i Ligûri ean a-o scûo do proprio passou , però gh'an o merito de no avei mai fæto ricorso a quarsevêuggia Divinitæ  pe inventâse ûn pûin illûstre .

<vanni a toua di argomenti>

Pe Caton dunque i Ligûri ean äxi perchè ninte saivan di so messiavi . Gh'è da dî però che in sciö nostro popolo existan väe föe . A stâ a sentî ûnn-a de queste chi , i ligûri avieivan di messiavi nobili . Ûnna legenda a conta de comme Ercole , a-a föxe do Rodano , a l' avesse atrovòu 'na fëa rexistensa da parte di Ligûri , che comme cappi gh' aivan Albion e Ligûre , dïto asci Bergion , figgi de Poseidon ( Nettûn ) , segnô de-e ægue .
A ûn çerto punto a Ercole ghe son mancæ e armi e coscì l' è doviu intervegnì Zeus tiando 'na gragnêua de prie a-i sordatti ligûri pe fäli scappâ . Questa föa chi , a l'è stæta dappêu repiggia asci da ätri autori do passou , comme Eschilo e Apollodoro . Questi , ûn atenieise do segundo secolo A.C. , o conta de comme dui fræ ligûri , Albion e Bergion , avessan röbòu di bêu a Ercole . Ma pâ che o primmo autore a ciætezzâ in sciä nostra gente o segge stæto o Esiodo : o poeta çitando i popoli ciû lunxi da-a  Grecia , o parla di Etiopi a Sud , di Scïti a Nord e di Ligûri a Ovest . A prêuva  che i ligûri fuisan o popolo ponentin ciû famoso , o n'o dïxe Erodoto in to quinto secolo A.C. , che o parla da lö presensa in tæra spagnolla .

<vanni a toua di argomenti>

Ghe son stæti tanti ätri autori e scrïtoi greci che han ciætezzou di ligûri  . Ûn de questi chi o l'è stæto Euripide , che in ta meitæ do 400 a.c. o l'ha scrïto " E Troiann-e" , dove contando da maga Circe o a ciamma ligûre , foscia voendo fâ capî che l' ïsoa dove a viveiva a l'ea sotta o controllo di Ligûri . 
Quarched'ûn , savendo e doti canore dä maga e visto o significou da poula greca Ligus , che a se pêu tradûe con ligûre ma asci con melodioso , o l'è stæto portou a pensâ che i ligûri fuisan 'na manega de cantori .
Ûn atro , ûn çerto Filisto de Siracusa , in to 380 a.c. o ne conta de sordatti ligûri che doppo aveile buscæ da i Umbri e da i Pelasgi se n' ean anæti in Sicilia , region ch'a l'ha piggiou o nomme proprio da o Re di ligûri Sikelos , mitico puin d' Italia . Quello che l'è segûo l'è che i nostri vëgi tegnivan ûnna region ben ciû grande de quella de anchêu : ma no se sa ben perchè segge dappêu successa questa regrescion chi , ne se conosce l' origine etnica di ligûri . Gh'è chi vorieiva fâli passâ pe indoeuropei , dä mæxima famiggia di Greci , Italici e Çelti , gh'è chi dixe seggian de origine libica , asci gh'è quarched'ûn che i vedde comme i Baschi , và a dî parenti a-a lontann-a co-i Berberi , finï in Europa dä Mesopotamia .

<vanni a toua di argomenti>

Oua vegne da domandase 'na cösa : comme mai i Ligûi no n'han lasciou ninte do lö passou ? Ûnna reçente teoria a dixe che i popoli son comme e personn-e : pêuan avei di traumi da desastri o ätri casin che i han gravemente corpïi . L'è dunca poscibile che 'na tragedia a l'agge corpio l' ovest e che i Ligûi ne seggian stæti i ciû corpïi ? Ûn pittin de anni in derrè gh'è stæto chi l'ha fæto l' ipotesi che o popolo di Lapponi , oua vivente tra svessia , norvegia e finlandia , o fuise 'na discendenza de ûn grûppo etnico ligûe : g'han 'na canson popolare che a parla de 'n desastro in te 'na lontann-a tæra do sö che i costrinse anâ a nord . A canson lappone a parla de ûnna grande burrasca , de ûnna miagia marinn-a che sciaccando tûtto a l'imbösava tûtte e tære : o l'è nint'ätro che l'eco de ûn gran desastro do passou comme quello che aivan za contou in to battaggia tra Ercole e i ligûi , dove Zeus l'agiûtta so figgio tiando prie a Ligûe e Albion faxendoli scappâ .
Se dixe che e föe e i miti piggian sempre quarcösa da di fæti vëi e l'è pe questo che e föe di popoli Ligûi han sempre quarcösa de scimile e che pêu dâse ch'a segge quella freguggia de veitæ da dove son nasciue .
Se dunca l'è vëo che 'n desastro l'ha corpïo e fermou l'evolussion di popoli de l' ovest , l'è ciæo perchè i ligûi n'aggian nisciun recordo do passou . Scibben che no ghe segge nisciun segno de questo desastro chi , gh' è però , insemme a canson di Lapponi , ûnn'ätra föa c'a porrieiva mëgio spiegâne o choc di ligûi  . A föa de Atlantide .

<vanni a toua di argomenti>

Tra e tante föe che parlan de origini di Ligûi ghe n'è ûnn-a che i fa ëse figgi di antighi abitatoî do continente perdûo : Atlantide . In te 'n testo do Platon , o " Timeo " ,  l'öto o fa dî a ûn stregon egissian :" Gh'ea 'n ïsoa davanti a-e colonne d'Ercole ........ e ciaschedûn poeiva passâ da quell'ïsoa a-e ätre ïsoe e da quelle passâ a-o continente c'o sta da l' ätra parte do mâ . Atlantide , dä nostra parte a tegniva a Libia finn-a a l' Egitto e l'Europa finn-a ä Tirrenia .......... Dappêu ghe son stæti terremoti e cataclismi e i vostri sordatti in te 'n gïo de 'nna notte e de 'n giorno son stæti mangiæ dä tæra e cosci asci Atlantide a scomparve in to mâ " 
Ste poule chi ne fan capî che i egissien za saveivan quarcösa de nêuvo continente . Platon o conta comme  Atlantide e l' oçeano atlantico piggiessan o nomme da Atlante , figgio ciû grande do Poseidon : ma noiatri savemmo che Albion e Ligûe , dui sordatti ligûi , ean ätri dui figgi do Poseidon , segnô dë ægue . Za in te föe , dunca , a l' existe ûnna parentela tra i Ligûi e i Atlantidi . Chi o stûddia l'existensa de Atlantide o a stimma ben primma  do 10000 A.C. e o a mette geograficamente de fronte ä Florida , a nord de l'ïsoa de Cuba  . E cimme di vëgi monti de Atlantide oua saieivan e ïsoe de l' arçipellago de Bimini . A crisi de Atlantide a saieiva comensà verso o 9500 A.C. e visto che l'ïsoa a stava pe ëse crovia da-o mâ , quarche atlantide o l'avieiva çercou agiûtto e scampo a ovest , passando pe Cuba e anando a finî in te coste do Mescico  . Ätri pe contra saieivan anæti a est , arrivando in Egitto e passando dappêu pe-a Spagna e in ta Ligûia . I grafiti che ghe son in sciö Monte Bego g'han de scimilitûdini  co-e incisoin che se pêuan attrovâ in të Canaie e con ätri grafiti presenti in te prie do Nêuvo Mescico , da Colombia , do Venezuela e de l'Honduras . Tanto pe fâ 'n esempio , in tanti stûdioxi faieivan derivâ i Aztechi da scampæ de Atlantide , i aztechi de Aztlan . Atlante e Aztlan : che caxo che dui nommi tanto pægi se attrovavan a-i dui lati de 'n oçeano c'o l'ea invalicabile . Ma asci comme se pêu dâ 'nna spiegassion dë disegni de ommi co-a barba in te l'ameica çentrale dove i abitatoî ean sensa pei e de ommi rosci in Egitto ? E asci comme spiegâ piramidi religiose azteche e egissiann-e tanto pægie ? Nisciûn l'è in graddo de dî se Atlantide a segge veamente existïa o se i Ligûi seggian i so figgi , ma l'è segûo che ghe son di legammi tra i popoli di dui continenti . Asci a mania de tinzise a pelle con ocra a l'ea tipica di popoli do yucatan , ma asci di ligûi de Finale o di abitanti dë Canaie . Comme o se pêu spiegâ ? Foscia dixendo che "  Gh'ea 'n ïsoa davanti a-e colonne d'Ercole ........ e ciaschedûn poeiva passâ da quell'ïsoa a-e ätre ïsoe e da quelle passâ a-o continente c'o sta da l'ätra parte do mâ . Atlantide , dä nostra parte a tegniva a Libia finn-a a l' Egitto e l'Europa finn-a ä Tirrenia .......... Dappêu ghe son stæti terremoti e cataclismi e i vostri sordatti in te 'n gïo de 'nna notte e de 'n giorno son stæti mangiæ dä tæra e cosci asci Atlantide a scomparve in to mâ "............

<vanni a toua di argomenti>

Oua anemmo a parlâ de quella c'a l'ea a  religion di primmi ligûi . Tornando ä föa dïta chi süvia , o mito de Atlantide , in tanti arrissan o naso dixendo comme prêuva che se egissien e aztechi han tegnûo e vëgie tradissoin religiose di atlantidi , faxendo de piramidi , i Ligûi no g'han avûo questa caratteristica . Ma foscia asci chi se sbaglian : i Ligûi no g'aivan di erticien o de cianûe comme in Mescico o in Egitto dove poei costrûî e piramidi , ma han attrovou za pronte de piramidi natüali : i monti da Ligûia . Nasce in te l'ëa eneolitica a ciû antiga tradission religiosa di nostri "vëgi" : o cûlto da Grande Montagna , o Segnô do Monte Bego . Monte Bego o se trêuva in ta Val Roja , vixin a San Dalmazzo de Tenda , e o l'arriva finn-a a 2873 metri . A cimma do monte a l'è quæxi sempre crovia da spesse nûvie , dove sc-ciêuppan forti temporali . Foscia asci questa forza da natûa a l'ha fæto do monte Bego o ciû grande santuäio natûale da Ligûia . Là in cimma i pastoî , che ean asci agricortoî , pensavan ghe fuise o segnô dë nûvie e dë ægue , o segnô c'o mandava i sciûmmi pe bagnâ i so campi . E finn-a lasciû a gente ligûe a migrava tûtti i anni , comme o fuise 'n pellegrinaggio , comensando ûnna tradission c'a l'è prosegûia pe generassoin . E bestie , pëgoe , bæ , vacche , vegnivan lasciæ in ti cien ciû bassi e dappêu i pastoî montavan finn-a ä cimma ciû erta , a fâ 'nna sorta de procession . Arrivæ a-i quæxi 2000 metri , ogni pria a diventava ûn artâ . E rocce vegnivan scorpie e disegnæ co-i grafiti , inspiræ da 'nna sacra devossion . Oua se pêuan vedde , montando verso a cimma do monte , quæxi 6000 grafiti e a meitæ rappresentan ûn Bêu .
L' è dunca probabile che l'adorassion da Montagna Sacra , simbolo da potensa divinn-a, a se seggie cö tempo mesc-cià con quella do bêu . Gh'è da dî che asci in ätri popoli se attrêuva  l'identificassion do bêu (bus taurus) co-a montagna : ûnna prêuva a ne vegne dæta dä reixe de quarche monte o de quarche çittæ dove gh'ea o cûlto do bêu : Mons Taurus in asia minô , a çittæ de Epitaurus in Grecia , Taormina in Sicilia , pe finî con Taurasia ( Torin) . Ancon no se sà se tûtti i grafiti do Monte Bego fuisan travaggi  individûali o se invece faxessan parte de'n rito collettivo , guidou da'n sacerdote . Gh' è in sce 'nna pria dïta "dell'orante" a figûa de'n sacerdote in preghiera , con l'immagine de'n bêu in scio vestïo . Ræe son e figûe ûmann-e , mentre ghe son disegnæ ben ben de scene de vitta e de strûmenti de lou , comme se ogni pastô o mettesse a so piccinn-a proprietæ sotta a protession do Segnô do Monte Bego . Disegnâ i strûmenti de lou , e propie bestie , i campi e casette , ne fan vedde ûn vëo senso religioso da fatiga e do travaggio ! Quæxi che l'ommo ligûe o vedesse in to lou o drïto de vive , de no fâse abbatte da-e difficultæ da vitta . Foscia prpio da chi deriva a stöia do popolo Ligûe , fæta de lou e de proprietæ privâ, de fatiga e de coæ de libertæ .
<vanni a toua di argomenti>

Emmo visto i vëgi Ligûi venerâ pe ben ben de anni o Segnô do Monte Bego , o Bêu . I Ligûi de l' etæ primma da grande Romma , pe contra , g'aivan o cûlto do çigno . Za Virgilio in te l'Eneide  e , ancon primma , Esiodo e Ovidio contavan che Fetonte , figgio do Sô , o l'aiva vosciûo piggiâ  o cäro do poæ , ma no savendolo dêuviâ o l'ea cheito in to sciûmme Po . O re di Ligûi Cicno , poæ de Fetonte ,  pe sta disgraçia chie , o l'ea morto vegnindo transformou in te 'n çigno . E mæxime sêu do Fetonte , che ean in ta cä do Cicno , son stæte cangiæ da-o dô in arboe e e lo lägrime , vegnindo dûe , se son cangiæ  in Ambra . 
A föa a l'è stæta ripreisa da ciû ötoî con de sfûmatûe despægie : Pausania o dixeiva che o çigno o l'ea 'n öxello mûxicale e o contava de 'n mûxico de nomme Cicno , re di Ligûi a-o de là do sciûmme Po , c'o l'ea stæto cangiou in çigno da Apollo . Servio invece o contava che o re Cicno doppo ëse stæto transformou in çigno , o l'ea stæto misso fra e stelle da Apollo . Ma a cösa importante che se pêu vedde a l'è a presenza de l'Ambra .  Con sta föa chi intran in ta stöia do nostro popolo i scangi commerciali de l'ambra , che i Ligûi piggiavan in sce rive do mâ do Nord . Aivimo lasciou i Ligûi a travaggiâ ossa e prïe , e de corpo i attrovemmo commercianti de ambra . Cöse l'ea passou pe fâghe fâ ûn cangio cosci ? Pe o poeta Avieno (4°secolo d.c.) l'origine di Ligûi a saieiva da çercâse in te ïsoe da Manega ( pensando ä Manega se acordemmo che Albion o l'ea in to mito ûn eroe Ligûe , ma o l'è asci l'antigo nomme de l' Inghilterra ) . Propio da ste tære chi saieivan stæti costreiti a anâ ciû a sud , pe corpa de l'avanzata di Celti . Questi ommi che arrivavan dä Manega se ciamavan Ambrones . A questo propoxito gh'è ûn fæto de istöia presente , strano a dîlo , asci in ti libbri de schêua contou da-o Plutarco e riferïo ä battaggia do 102 a.c. de Aquæ Sextiæ  (Aix en Provence ) , dove i Ligûi presenti in te l'esercito di Romann- i se son scontræ co-i eserciti di Cimbri e di  Teutoin . Coscì o scriveiva Plutarco :
" I ciû cattïi tra i nemixi se ciamavan Ambrones ....e batteivan a ritmo e armi e marciavan tûtti co-a mæxima cadensa , criando o lö nomme , e pe dâse animo e pe spaventâ i nemixi . I primmi italici a chinn-â in battaggia contra i Ambrones son stæti i Ligûi . Questi comme han sentïo i crïi de guæra di Ambrones , han risposto ä mæxima mainea, cö mæximo nomme , za che dixeivan a l'ea l'antiga denomminassion do lö popolo . I Ligûi dunca son da stessa stirpe di Ambrones ."
A ste gente chi dunca dovemmo o cûlto do çigno  e i commerci de l'ambra . Propio in te sti anni chi i Ligûi perdan pe sempre o rito do pellegrinaggio a-o Monte Bego e nasce a cultûa do commercio c'o caratterizzia dappêu o futûo do popolo Ligûe .
Segondo di stûddi reçenti l'origine di Ambrones a se dovieiva çercâ in Germania oçidentale  e in ta penïsoa do Jutland . Co-i Ambrones i ligûi se saieivan abitûæ a beie læte , bïra e a fâ formaggi , cangiando e abitûdini de vitta , passando da pastoî e agricortoî a abili commercianti .
<vanni a toua di argomenti>

Emmo finn-a chi visto ben ben de föe riguardanti e origini do popolo ligûe . Ammiemo oua , quarche föa riferïa ä nascita de Zena . Existe ûn vëgio mito segondo o quæ a çittæ a l'ea stæta constrûia da-i giganti Janigeni , che s'ean sarvæ da-o dilûvio ûniversale . Sta föa chie a l'è ancon riferïa ä stöia , che emmo za visto primma , di Atlantidi , comme popolo poæ di Ligûi . I janigeni ean di giganti , comme giganti ean i atlantidi , comme giganti ean Nettûn , Albion e Ligûe . 
In sce l' architravo da navata çentrale da Cattedrale de San Löenzo gh'è 'nna testa de Giano , sotta a quæ se pêu lëze :" Janus primus rex italiæ de progenie gigantum , qui fondavit Genuam tempore abrahæ". 
Gh'è di ätri invece che vêuan dâ a paternitæ da creassion de Zena a Noè . O primmo re d'Italia , quande l'Italia a se ciammava ancon Enotria ( paise do vin ) , o l'è stæto Giano . Giano o l'è ûn nomme arameo-ebraico  c'o se componn-e de due poule , JAIN c'o vêu dî "vin" e NO c'o vêu di "famoso" . Da questo quarchedûn o l'ipotizza che Giano e Noè , inventô do vin , fuisan a mæxima personn-a . Che Noè e Giano possan ëse a mæxim personn-a a saieiva confermâ asci da 'nna föa c'a se ricorda a Bergamo e a Brescia .  E due çittæ saieivan stæte constrûie pe  volontæ de Cicno "figgio do Ligûe e discendente diretto de Noè ". Quello che se vedde , dunca , l'è che in tûtte e leggende quello c'o l'ha fondou Zena , o l'ea arrivou da-o mâ : Jacopo da Varagine  e Jacopo Döia  contan de 'nna stöia do Giano , nobile greco , scappou con Enea da Troia , doppo a distrûssion da çittæ , e arrivou in te nostre coste ............
<vanni a toua di argomenti>

O mediterranneo o stava diventando ûn campo de battaggia commerçiale tra Greçi , Etrûschi e Cartagineixi .
Questi ûrtimi aivan piggiou o controllo de coste africann-e , da Spagna e de tante ïsoe compreise Sardegna e Sicilia . I etrûschi g'aivan invece o controllo de coste do Tirren finn-a a Framûa , mentre i Greçi comensavan a colonizzâ o Mä Jonio arrivando finn-a a Napoli . A Ligûia a diventava coscì ûnna testa de ponte importante pe o controllo do Mä Mediterraneo . Gh'è 'nna föa , contâ da o Aristotele , segondo a quæ a costa de l'attuale Marseggia a l'ea abitâ da-i Ligûi Segobrigi ( ûnna tribû do popolo di Sallûvi ). O re , Nanno , o stava faxendo çelebrâ e nosse da figgia Gyptis , quande son arrivæ di greçi foceixi , con a cappo o prinçipe Protis . I nêuvi arrivæ ean stæti accolti ben e invitæ a-o banchetto dë nosse , dove Gyptis a l'avieiva dovûo çerne o so sposo dandoghe 'n gotto . Gyptis , coscì , a l'ea anæta a dâ o gotto a Protis e questi o l'avia açettou gyptis comme moggê , riçevendo da-o re Nanno , comme dêutte , o terren pe poei fondâ 'nna nêuva çittæ , Massalia , che oua a l'è Marseggia . Seguan anni de battaggê pe mä tra Foceixi e Cartagineixi e Etrûschi . Battaggê , espansoin territoriali e commerçiali che comensan a dannezzâ ascì i Ligûi , che se dan da fâ pe constrûî i primmi castelli e e primme erte miägie . Son i anni dove comensa , assemme ä scomparsa di Etrûschi , a sciortî 'nna nêuva potensa militare : Romma . Pe i Ligûi se imponn-e 'nna scelta : e tribû ponentinn-e deçiddan de alliâse con Cartagine , coscì comme i Apuani , mentre Zena a se mette con Romma . Nascian da chi tante guære tra popoli fræ , chi pe difende a propia indipendensa chi pe difende o propio svilûppo economico e commerçiale . 
<vanni a toua di argomenti>