Ascì quest'anno a Lavagna , o 14 de agosto , emmo posciûo asciste a-o grande spettacolo de nosse tra Opizzo Fiesco e Bianca dei Bianchi . Ûnna tradission c'a se repette da-o 1949 , frûto de 'n patrimonio stöico e cultûale che Lavagna e o sò entrotæra vêuan ancon mantegnî vivo . Ûnna dë tradissoin ciû belle in to panoramma folcloristego italian .

Tûtti  i anni , Lavagna a se anima de lüxi , de colori , de costûmmi e de mûxiche antighe : o l'è o tradissionale appuntamento co-a rievocassion stöica da "Torta di Fieschi" , manifestascion organizzâ da-i "Sestieri de Lavagna" e che a ne vêu fâ ricordâ ûn di capitoli ciû belli da stöia de sta çittadinn-a ligûe . O periodo  o l'è quello ligou a-o dominio da famiggia di Fieschi , che finn-a aivan avûo dui Pappi , Innocenso IV e Adriano V .  A cerimonia a vêu rievocâ e famose nosse do 1230 tra Opizzo Fiesco , conte de Lavagna , e a nobildonna seneize Bianca dei Bianchi , che in te sta occaxon aivan vosciûo regalâ ä çittæ ûna torta gigantesca .

I "Sestieri" de Lavagna

A distansa de 7 secoli , Lavagna a vêu ancon ricordâ sto momento , tûtti i 14 de agosto , con 'n corteo stöico medioevale c'o passa pe-a çittæ arrivando finn-a ä Töre di Fieschi , dove gh'è 'nna torta de 15 quintali . A sto punto commensa o spettacolo vëo e propio : ogni personn-a a pêu accattâ ûn o ciû biggetti , rêusa pë donne e blêu pe-i ommi , dove gh'è scrïto 'n nomme de fantasia . Pe poei arrivâ a gûstâse 'n tòcchetto de torta , besêugna che ogni personn-a a trêuve in te sta grandiscima quantitæ de gente , "l'anima gemella" saieiva a dî , l'ommo o a donna c'a g'ha o mæximo biggetto de colore despægio . E manifestascioin commensan za giorni primma : o 13  de agosto , davanti ä Baxilica di Fieschi a San Sarvou de Cogorno , o Conte Opizzo , çircondou da damme e cavalieri , o parteçipa a 'nna disnata c'a va sotta o nomme de "Addiu du fantin" . Giorni avanti ghe son stæti sbandieratoî , o tïo con l'arco , o palio d'armi , danse rinascimentali e mûxiche antighe .  O tûtto o se concludde con 'nna grande sfilata in abiti medioevali c'a passa attraverso e vie antighe da çittæ .

O Conte Opizzo e Bianca dei Bianchi in ta çerimonnia dë nosse